කීර්ති ප්රනාන්දු – මිනුවන්ගොඩ විශේෂ-
මෙතෙක් පවත්වාගෙන පැමිණි කොවිඩ් මර්ධන ජාලයේ සම්බන්ධීකරණ මූලධර්මය බිඳ වැටීම නිසා ගම්පහ දිස්ත්රික්කයේ කොවිඩ් ආසාදිතයන් ප්රමාණයක් සෞඛ්යය වෛද්ය නිලධාරී කාර්යාලය හෝ අදාල ප්රදේශයේ මහජන සෞඛ්ය පරීක්ෂකවරුන් නොදැන නිවෙස් තුළ රහසේ සිටින බවත්, මේ තත්වය ගම්පහ දිස්ත්රික්කය තුළ අතිශය ව්යසනකාරී වටපිටාවක් නිර්මාණය කිරීමේ හැකියාවක් ඇති කර තිබෙන බවත් ගම්හප දිස්ත්රික් මහජන සෞඛ්ය පරීක්ෂකවරුන්ගේ සංගමයේ සභාපති සමින්ද සමරදිවාකර ලංකාසරට පැවසීය.
සභාපතිවරයා වැඩිදුරටත් අදහස් දක්වමින් මෙසේ පැවසීය.
“ කොළඹ නගරසීමාව තුළ කොවිඩ් ආසාදිතයන් අතිශය බහුතරයක් වාර්තා වීම සමග ගම්පහ සිට කොළඹට සේවයට යන පිරිස් සඳහා බොහෝ අවස්ථාවල ආයතනික මට්ටමින් පී,සී.ආර් පරීක්ෂණ කරනවා. එසේ පී.සී.ආර්. පරීක්ෂණ කළ පසු එහි වාර්තාව එන්නේ එම පරීක්ෂණය සිදු කරනු ලබන සෞඛ්ය වෛද්ය කාර්යාලයට. එම සෞඛ්යය වෛද්ය නිලධාරී කාර්යාලයෙන් මේ වනවිට රෝගියා ජීවත්වන ප්රදේශයේ සෞඛ්ය වෛද්ය කාර්යාලය දැනුවත් කරන්නෙ නෑ.. කෙලින්ම රෝගියාට තමයි ප්රතිඵලය කියන්නෙ. ඔහු බොහෝ වෙලාවට රහසේ නිවෙස් තුළ ඉන්නවා. “
“මහජන සෞඛ්ය පරීක්ෂකවරුන් හෝ සෞඛ්ය වෛද්ය නිලධාරීවරයා මේ ගැන දැනගන්නෙ එක්කො ප්රදේශවාසීන් පැමිණිලි කළොත්, නැතිනම් ආසාදිත පුද්ගලයා අසාධ්ය තත්වයට පත්වන ලකුණු පෙන්නුවොත් විතරයි. මෙවැනි රෝගීන් ගණනාවක් මේ වනවිට ප්රතිකාර මධ්යස්ථාන වෙතත් නොගිහන් සැඟවී සිටින බව අපට වාර්තා වෙනවා.. මේ ක්රමවේදය වෙනස් නොකළහොත් බරපතල තත්වයක් ගම්පහ දිස්ත්රික්කයේ ඇති වෙන්න පුලුවන්..“ යැයි ඔහු පැවසුවේය.
