හැටන් – රංජිත් රාජපක්ෂ –
- ප්රවාහන නියොජ්ය ඇමතිත් සමග කථානායකවරයාත් අනතුර සිදුවූ තැනට පැමිණෙයි… රිය අනතුරු අවම කිරීමේ විශේෂ වැඩ පිළිවෙළක් දියත් කරන බව නියෝජ්ය ඇමති ප්රකාශ කරයි..
කතරගම සිට කුරුණෑගල දක්වා ධාවනය වූ ලංගම බස් රථයක් නුවරඑලිය ගම්පොළ ප්රධාන මාර්ගයේ කොත්මලේ රම්බොඩ ගැරඩි ඇල්ල ප්රදේශයේදි අඩි 100ක් පමණ ප්රපාතයට පෙරලීමෙන් සිදුවූ බිහිසුණු අනතුරින් මිය ගිය පුද්ගලයින් 21 දෙනාගේ මළ සිරුරු මේ වනවිට කොත්මලේ ප්රාදේශීය රෝහලේ තැන්පත් කර ඇතැයි පොලිසිය පවසයි.
පොලිසිය පවසන්නේ මිය ගිය පුද්ගලයින් කීප දෙනෙකුගේ සිරුරු බස් රථයට යට වී ඇති බවත්, ප්රදේශවාසීගේ ද සහාය ඇතිව එම සිරුරු මුදා ගැනීමට මේ වනවිට දැඩි පරිශ්රමයක් දරමින් සිටින බවය.
බස් රථයේ රියදුරාද අනතුරින් මියගොස් ඇති බව පොලිසිය කියයි. බස් රථයේ රියදුරු ලෙස කටයුතු කර ඇත්තේ ඩබ්ලිව්. කැළුම් චන්දන නැමැති 38 හැවිරිදි රියදුරු වරයෙකි.
බස් රථය (11) දින අළුයම 4:30ට පමණ මෙම අනතුර සිදු වී ඇති අතර, ධාවනය වෙමින් තිබූ බස් රථය තුළ මගීන් 75 දෙනෙකු පමණ ගමන් කර ඇති බවත්, අනතුරින් තුවාල ලැබූ තුවාලකරුවන් කොත්මලේ ප්රාදේශීය රෝහල, නුවරඑලිය දිස්ත්රික් මහ රෝහල, ගම්පොළ සහ නාවලපිටිය මූලික රෝහල් වෙත මාරු කර යවා ඇති බවත්, ඉන් තුවාලකරුවන් කිහිප දෙනෙකුගේ තත්වය බරපතල බවත් පොලිසිය කීවේය.
ධාවනය වෙමින් තිබූ බස් රථයේ හදිසියේ ඇති වූ කාර්මික දෝෂයක් අනතුරට හේතු වී ඇති බවට අනතුර පිළිබද පරික්ෂණ පවත්වන කොත්මලේ පොලිසිය සැකකරයි.
අනතුර පිළිබද සොයා බැලීමට කථානායක ජගත් වික්රමරත්න සහ ප්රවාහන සහ මහාමාර්ග නියෝජ්ය අමාත්ය වෛද්ය ප්රසන්න කුමාර ගුණසේන එම ස්ථානයට පැමිණ සිටියහ.
මෙහිදි මාධ්යට අදහස් දැක්වූ ප්රවාන සහ මහාමාර්ග නියෝජ්ය අමාත්ය වෛද්ය ප්රසන්න කුමාර ගුණසේන කියා සිටියේ අනතුරින් මිය ගිය සියලු දෙනාගේ පවුල්වලට රජය සිය ශෝකය ප්රකාශකරන බවය.
ඉදිරියේදි මෙවැනි අනතුරු සිදු වීම පාලනය කිරිමට පියවර ගන්නා බවද නියෝජ්ය අමාත්යවරයා කියා සිටියා.
අනතුරින් තුවාල ලබා කොත්මලේ ප්රාදේශීය රෝහලේ නේවාසිකව ප්රතිකාර ලබන රෝගියෙකු කියා සිටියේ තමන් කතරගම සිට මහනුවර දක්වා යෑමට බස් රථයට ගොඩ වූ බවය.
“බස් රථය අනතුරට පත්වන අවස්ථාවේ බස් රථය තුළ 100කට ආසන්න පිරිසක් සිටියා. පාන්දර එක පාරටම බස් එක ඇදිලා යනවා දැනුනා. ඊට පස්සේ බස් එක තේ වත්ත පැත්තට පෙරලෙන ගමන් මම අමාරුවෙන් එලියට ඇවිල්ලා පුළුවන් අයව එලියට ගත්තා.” යනුවෙන් පැවසීය.
