සූරියවැව නුවන් ජයසේකර –
තංගල්ලේ පිහිටි මැණික් හා ස්වර්ණාභරණ වෙළදසලක් කොල්ල කා සැඟව සිටි සැකකරුවන් තිදෙනෙකු තංගල්ල කොට්ඨාශ අපරාධ විමර්ශන ඒකකයේ නිළධාරින් විසින් ඊයේ (11) අත්අඩංගුවට ගෙන තිබේ.
මෙලෙස අත්අඩංගුවට ගෙන ඇත්තේ මෙම සොරකමේ ප්රධාන සැකකරු වන කිරම, බටගස්ස ප්රදේශයේ පදිංචි 27 හැවිරිදි පුද්ගලයෙකු හා ඔහුට මෙම සොරකම සඳහා අධාර අනුබල දෙමින් සොරබඩු ලඟ තබා ගත් බව කියන කිරම ප්රදේශයේ පදිංචි 23 හැවිරිදි පුද්ගලයෙකු හා නාරාහේන්පිට පොලිසියට අනුයුක්තව සේවය කල ප්රධාන සැකකරුගේ ඥාති වරයෙකු වන 22 හැවිරිදි පොලිස් කොස්තාපල් කෙනෙකි.
අත්අඩංගුවට පත් 27 හැවිරිදි ප්රධාන සැකකරු තංගල්ල ගොඩැල්ලවල ප්රදේශයේ පිහිටි මෙම මැණික් හා ස්වර්ණාභරණ අලෙවි සැලේ සේවකයෙකු ලෙස කටයුතු කළ අයෙකු වන අතර ඔහු 2024.05.24 වන දින මෙම ස්වර්ණාභරණ අලෙවි සැල කඩා රුපියල් තුන් කෝටි හතලිස් හය ලක්ෂයක් (3,46,00,000)ක් වටිනා රන් ආභරණ, මැණික් හා විදේශීය මුදල් සොරකම් කරගෙන ගොස් තිබුණි.
සිද්ධිය සම්බන්ධයෙන් තංගල්ල මුලස්ථාන පොලිසියට ලද පැමිණිල්ලට අනුව තංගල්ල කොට්ඨාසභාර ජ්යෙෂ්ඨ පොලිස් අධිකාරීවරයා විසින් එහි විමර්ශන කටයුතු තංගල්ල කොට්ඨාශ අපරාධ විමර්ශන ඒකකයට පවරා තිබේ. ඒ අනුව සිදුකළ විමර්ශනවලදී සැකකරු සම්බන්ධ තොරතුරු සී.සී.ටී.වි දර්ශන මගින් තහවුරු කරගෙන ඒ ඔස්සේ විමර්ශන සිදුකර තිබේ. එහිදි මෙම සොරකමේ ප්රධාන සැකකරු තණමල්විල බලහරුව ප්රදේශයේ සිටින බවට ලද තොරතුරකට අනුව විමර්ශන නිළධාරීන් කණ්ඩායමක් එහි ගොස් ඇත.එහිදි සැකකරු බලහරුව ඌරුහොර පන්සල අසලදී අත්අඩංගුවට ගෙන ඇත් අතර එහිදි සැකකරු සන්තකයේ තිබී සොරකම් කරන ලද මැණික් හා ස්වර්ණාභරණවලින් කොටසක්ද අත්අඩංගුවට ගෙන ඇත.
අත්අඩංගුවට පත් සැකකරුගෙන් සිදුකල ප්රශ්න කිරීමේදී ලද තොරතුරුවලට අනුව නාරාහේන්පිට පොලිසියේ සේවයේ නිරත ප්රධාන සැකකරුගේ ඥාතියෙකු වන පොලිස් කොස්තාපල්කෙනෙක් හා තවත් මිතුරෙකු ඔවුන් සතුව සගවාගෙන සිටි රණ් ආභරණ හා මැණික් සමග අත්අඩංගුවට ගෙන තිබේ.
අත්අඩංගුවට පත් සැකකරුවන්ගෙන් ප්රකාශ සටහන් කර ගැනීමෙන් අනතුරුව වැඩිදුර විමර්ශන සදහා තංගල්ල මුලස්ථාන පොලිසියට බාර දි තිබේ. සැකකරුවන් තංගල්ල මහේස්ත්රාත් අධිකරණයට ඉදිරිපත් කිරීමට නියමිතය.
තංගල්ල කොට්ඨාසභාර ජ්යෙෂ්ඨ පොලිස් අධිකාරි කේ.බි.කීර්තිරත්න,තංගල්ල කොට්ඨාස අපරාධ විමර්ශන ඒකකයේ ස්ථානාධිපති ප්රධාන පොලිස් පරික්ෂක ජයවීරගේ උපදෙස් පරිදි පොලිස් සැරයන්වරුන් වන (44974)මංජුල,(19894)උදයංග,(68435)චමින්ද හා පොලිස් කොස්තාපල් වරුන් වන (68664)දේශාන්,(74437)ප්රතාපසිංහ යන නිළධාරීන් එක්ව සැකකරුවන් අත්අඩංගුවට ගෙන තිබේ.
