ඉරාන උත්තරීතර නායකයාගේ ප්‍රිය බිරිය මන්සූරේත් ඝාතනය වූ හැටි…

ඉරානයේ උත්තරීතර නායක අයතුල්ලා අලි කමේනි  සමග දශක හයකට අධික කාලයක් ජීවිතය බෙදා ගත් ඔහුගේ ප්‍රිය බිරිය මන්සූරේ කොජස්තේ බගර්සාදේ (Mansoureh Khojasteh Bagherzadeh) අද (02)  අවසන් ගමන් ගියාය.

මාර්තු 28 දා  ඊශ්‍රයාලය ඉරානයට එල්ල කරන ආරම්භක ප්‍රහාර මාලාවේ ප්‍රමුඛ ඉලක්කය වූයේ  කමේනිගේ නිල නිවස වන Leadership House ය. එම ප්‍රහාරයෙන් කමේනි සමග    කමේනිගේ   දියණිය, ඇයගේ සැමියා (බෑණනුවන්) සහ කුඩා මුණුබුරෙකු හෝ මිනිබිරියක ඝාතනය වූ අයුරු ඉරාණ මූලාශ්‍ර තහවුරු කළේය. මුණුබුරාගේ ස්ත්‍රී පුරුෂ භාවය පිළිබඳව පරස්පර වාර්තා තිබුණද  අවම වශයෙන් එක් දරුවෙකු මිය ගිය පිරිස අතර විය මීට අමතරව, කමේනිගේ ලේලියක ද මියගොස් ඇති බව වාර්තා විය. එදින බෝම්බ ප්‍රහාරයෙන් කමේනිගේ පවුලේ  පස් දෙනෙක් ඝාතනය කර තිබිණි.  ඒ අවස්ථාවේ නිල මැදුරේ  විශේෂ සාකච්ඡාවක සිටි ඉරාන විප්ලවීය ආරක්ෂක බලකායේ (IRGC) අණදෙන නිලධාරී මොහොමඩ් පක්පූර් සහ බුද්ධි අංශ අමාත්‍ය එස්මයිල් ඛතීබ් වැනි ඉහළ පෙළේ නිලධාරීහු ද ජීවිතක්ෂයට පත් වූ අය අතර වූහ.

ඊයේ තහවුර කළ  මරණ අතර කමේනිගේ බිරිය මන්සූරේ කොජස්තේ බගර්සාදේ  සිටියේ නැත.  ඉරාන මාධ්‍ය වාර්තා කිහිපයකට අනුව, 79 හැවිරිදි මන්සූරේ කොජස්තේ බගර්සාදේ    සිටියේ  එල්ල වූ ප්‍රහාරවලින් පසු කෝමා තත්වයකය. මාර්තු 2 වන දින ‘Press TV’ සහ ‘Tasnim’ වැනි රාජ්‍ය මාධ්‍ය ඇයගේ මරණය නිවේදනය කළේ ඇය ප්‍රහාරයෙන් ලද තුවාල හේතුවෙන් “සාන්තුවරභාවයට (martyrdom) පත් වූ” බව සඳහන් කරමිනි.  ඒ අනුව මේ වනවිට ප්‍රහාරකයින් ඉරාණ උත්තරිතර නායක අයතුල්ලා අලි කමේනි ඇතුළුව පවුලේ හය දෙනෙක් ඝාතනය කර ඇත.

1964 දී කමේනි සමඟ විවාහ වූ මන්සූරේ, මහජන දෘෂ්ටියෙන් බොහෝ දුරට සැඟවී ජීවත් වූ චරිතයකි. ඇය ඉරානයේ දේශපාලනික-ආගමික ප්‍රභූ පැලැන්තියේ පෞද්ගලික ජීවිතයේ සංකේතයක් විය. ඇයගේ භූමිකාව වූ ආදරණීය බිරිඳ සහ මව යන කරුණට එහා ගිය තොරතුරු බොහෝමයක් කිසිවෙක් දන්නේ නැත. රාජ්‍ය මාධ්‍ය ඇයගේ වියෝව ජාතික කැපකිරීමේ සංකේතයක් ලෙස හුවා දැක්වා තිබිණි.

 කමේනි පවුලේ පසුබිම

කමේනි සහ මන්සූරේට දරුවන් හය දෙනෙකු සිටියහ. ඒ  පුතුන් සිව්දෙනෙකු (මොස්තාෆා, මොජ්තාබා, මසූඩ් සහ මේසම්) සහ දියණියන් දෙදෙනෙකු (බොෂ්රා සහ හොඩා) ලෙස ය. පූජක සහ දේශපාලන පෙළපත්වලින් මුල් බැසගත් ඔවුන්ගේ පවුල් ගස, 1989 සිට ඉරානයේ අභියෝග කළ නොහැකි අධිකාරියක් බවට පත් වූයේය. කමේනිගේ  වැඩිමහල් පුත් මොස්තාෆා ප්‍රමුඛ පූජකවරයෙකි. කමේනිගේ උරුමය  මොජ්තාබා වෙත ලැබෙනු ඇති  බවට යම් මතයක් තිබුණද, ටෙහෙරානය තුළ එවැනි අනුමාන කිරීම් තහනම්ය.

කමේනිගේ දියණියන් ප්‍රසිද්ධියේ පෙනී සිටියේ ඉතාම කලාතුරකිනි.    හොඩා සහ බොෂ්රා ඉඳහිට පුණ්‍යාධාර හෝ අධ්‍යාපනික කටයුතු සමඟ සම්බන්ධ වී උන්හ. මෙම යුවළට මොහොමඩ් බාගර් කමේනි ඇතුළු මුණුබුරන් කිහිප දෙනෙකු ද සිටියහ.  කෙසේ වෙතත් මේ ඝාතනය වූ කණ්ඩායම අතර සිටින කමේනිගේ දියණිය බොෂ්රා ද,  හෝඩා ද යන්න පිළිබඳව ජාත්‍යාන්තර මාධ්‍යයන්හි නිශ්චිත තහවුරුවක්  නැත.

ඉරාන ඉතිහාසයේ පාලක පවුලකට එල්ල වූ දරුණුතම ප්‍රහාරය කමේනි පවුලට එල්ල කළ මෙම බිහිසුණු ප්‍රහාරය ය.  ඇමරිකානු චින්තන ගැති කවයට  මෙම ප්‍රහාරය   ඉරානයේ කලාපීය බලපෑම මර්දනය කළ  තීරණාත්මක ජයග්‍රහණයකි.    ඉරානය සහ එහි මිත්‍ර පාක්ෂිකයන්ට  මේ පතිතව ඇත්තේ දරුවන් ඇතුළු සිවිල් වැසියන් ඉලක්ක කළ තිරශ්චීන ත්‍රස්තවාදයකි.

ගැටුම නිමාවන හැඩක් නැත.   ලෝකය මීළඟට සිදුවන දේ පිළිබඳව බියෙන් බලා සිටී.