-
අපේ උන් පැරදුන පැරදිල්ලට දඩ ගැහුවා නම් මෙලහට සෙට් එක පිටකොටුවේ බෝධිය ලඟ හිඟා කනවා…
2026 විස්සයි-20 ලෝක කුසලානයෙන් අන්ත කුජීත ලෙස පරාද වී අප එළියේය. පකිස්ථානයත් එළියේ ය. පකිස්තාන ක්රිකට් අප තරම් කුණු කානු පල්ලට වැටුනේ නැත. උන් අපට වැඩිය බොහෝ ඉහළ තැනක සිට ක්රිකට් ගැසූවේය.
එහෙත්, අවසාන මොහොතේ ඉලක්ක කරා යාමට නොහැකි වීම සහ පිටිය තුළ පෙන්නුම් කළ වගකීම් විරහිත ස්වරූපය හේතුවෙන් පකිස්ථානයට දැන් දරුණු දඬුවම් විඳීමට සිදුව තිබේ. ක්රීඩාව යනු හුදෙක් ජය පරාජය පමණක් නොව, ලබා දෙන වරප්රසාද හමුවේ ජාතියකට සිදුකළ යුතු වගවීමක් බව පසක් කරමින් පකිස්ථාන ක්රිකට් බලධාරීන් සිය සංචිතයට එරෙහිව දැඩි මූල්යමය දඬුවම් පමුණුවා තිබේ.
ඒ අනුව, ලෝක කුසලාන තරගාවලියේ අවසන් පූර්ව වටයට සුදුසුකම් ලැබීමට අපොහොසත් වීම හේතුවෙන් පාකිස්ථාන සංචිතයේ සිටි සෑම ක්රීඩකයෙකුටම පාකිස්ථාන රුපියල් මිලියන 5ක (ඇමරිකානු ඩොලර් 18,000කට ආසන්න) දැවැන්ත දඩයක් පැනවීමට පාකිස්ථාන ක්රිකට් මණ්ඩලය (PCB) තීරණය කර තිබේ.
මෙම දඩය පැනවීමට මූලික වී ඇත්තේ හුදෙක් විනය හේතූන් නොව, ජාතියක වගකීම පැහැර හළ කණ්ඩායමේ අසාර්ථක ක්රීඩා විලාසය බව පාකිස්ථාන ක්රිකට් මණ්ඩලයේ අභ්යන්තර ආරංචි මාර්ග තහවුරු කළේය. විශේෂයෙන්ම පෙබරවාරි 15 වැනිදා ඉන්දියාව හමුවේ ලකුණු 61ක දැවැන්ත පරාජයක් ලැබීමෙන් අනතුරුව පකිස්ථාන ක්රිකට් පාලක මණ්ඩලය ක්රීඩකයින්ට අනතුරු ඇඟවීමක් කර තිබුණේය. ඒ අවසන් පූර්ව වටයට පිවිසීමට අපොහොසත් වුවහොත් මෙම මූල්යමය දඩය ක්රියාත්මක වන බවය.
එපෙබරවාරි 28 වැනිදා ශ්රී ලංකාවට එරෙහිව පැවති තීරණාත්මක තරගයේදී ලකුණු 5ක ජයක් ලැබුවද, අවශ්ය දළ ලකුණු වේගය පවත්වා ගැනීමට නොහැකි වීම හේතුවෙන් පාකිස්ථානයට හිස් අතින්ම තරගාවලියෙන් ඉවත් වීමට සිදු විය. පාකිස්ථාන ක්රිකට් ඉතිහාසයේ පිට පිට සිව්වැනි වතාවටත් ICC තරගාවලියක මූලික වටයෙන්ම ඉවත් වීමෙන් පසුව, ක්රිකට් මණ්ඩලයේ සභාපති මොහ්සින් නක්වි විසින් මෙම දඩ මුදල් අය කර ගැනීම සඳහා නිල අනුමැතිය ලබා දී තිබිණි.
මේ අතර, කණ්ඩායමේ පරාජයේ වගකීම භාර ගනිමින් වත්මන් නායක සල්මාන් අලි අගා සිය ධුරයෙන් ඉල්ලා අස්වීමේ සූදානමක පසුවන බව ජාත්යන්තර මාධ්ය වාර්තා කරයි. තරගාවලිය පුරා පිතිකරුවෙකු ලෙස අසාර්ථක වීම සහ නායකයෙකු ලෙස පිටිය හැසිරවීමේදී පෙන්නුම් කළ දුර්වලතා හේතුවෙන් ඔහු දැඩි විවේචනයට ලක්ව ඇති අතර, ඉල්ලා අස්වීම සම්බන්ධයෙන් ඔහු මේ වන විටත් සාකච්ඡා කරමින් සිටින බව පැවසේ.
පාකිස්ථාන නායකත්වය සඳහා මීළඟට ශදාබ් ඛාන් හෝ ශහීන් ශා අෆ්රිඩිගේ නම් යෝජනා වී ඇති අතර, ඉදිරි බංග්ලාදේශ එක්දින තරගාවලියට පෙර කණ්ඩායමේ මෙන්ම පුහුණුකාරීත්වයේ ද දැවැන්ත වෙනසක් සිදුවනු ඇති බවට ක්රික්බස් (Cricbuzz) සහ ක්රික්ඉන්ෆෝ (Cricinfo) වැනි විශ්වාසවන්ත ක්රීඩා පුවත් සේවා පෙන්වා දෙයි.
මේ පුවත දකිනවිට අපට නම් මොනවා කියන්නදැයි හිතෙන්නේ නැත. අප අවසන් වරට අවසන් පූර්ව වටයට හෝ අවසන් වටයට අයි.සී.සී එක්දින හෝ විස්සයි 20 ශූරතාවයකදී පැමිණියේ වර්ෂ 2014 දී ය. එතැන් සිට වසර 12ක් තිස්සේ ලෝක කුසලාන තරගාවලි 08ක් පැවිත්විනි. එම 08න් සුපිරි 08 දෙනාගේ වටයට හෝ පැමිණි මුල්ම අවස්ථාව මෙයය. මුන්ට වගකීම් පැහැර හැරීම, විනය කඩ කිරීම සහිතව මේ පැරදෙන පැරදිල්ලට ගැන දඩ ගැහුවා නම් මෙලහට කට්ටිය කොටුව බෝධිය ලඟ හිඟා කන ගමන්ය.
ක්රිකට් සෙල්ලමක් නොවන බව අපි අනන්ත කියා ඇත්තෙමු. පකිසථානය එය අද ලෝකය ඉදිරියේ සනාථ කළේය.
