කීර්ති ප්රනාන්දු –
ජලාශවල ජල මට්ටම අඩුවෙමින් ඇති බව සැබෑ නමුත් මේ අර්බුදකාරී අවස්ථාවේ නව ලක්ෂපාන බලාගාරයත්, නිසි නඩත්තුවක් නොමැතිවීම නිසා කැනියොන් බලාගාරයත් වැඩිදියුණු කිරීමට යෝජිත විමල සුරේන්ද්ර බලාගාරයේ කටයතුත් අක්රීය වී ඇතිබව ලංකා විදුලි සේවක සංගමයේ ලේකම් රන්ජන් ජයලාල් පවසයි.
රොන් මඩ හිරවීම හේතුවෙන් අක්රීය වී ඇති සොරොව් පද්ධතිය හේතුවෙන් මාව්සාකැලේ ජලාශයේ ජලයෙන් ක්රියාත්මක වෙමින් මෙගාවොට් 100ක ධාරිතාවක් ජනනය කළ හැකි ලක්ෂපාන බලාගාරයෙන් දැනට නිපදවිය හැක්කේ මෙගාවොට් 10ක් බව ද, මෙගාවොට් 90ක් ජාතික පද්ධතියට එක් කළ කැනියොන් බලාගාරය මුලුමනින්ම අක්රීයව ඇති බව ද, අසාර්ථක ප්රසම්පාදනයන් නිසා ජාතික විදුලි බල පද්ධතියට මෙගාවොට් 16ක් එකතු කිරීමට සකස් කළ සැලසුම විමල සුරෙන්ද්ර බලාගාරයේ දී අසාර්ථක වූ බව ද ඔහු පෙන්වා දෙයි.
මේ සමගම ප්රකාශයක් නිකුත් කරන ලේකම්වරයා පවසන්නේ නීතිය ක්රියාත්මක කරන සියලුම අංශත්, මහජන උපයෝගීතා කොමිසමත්, ඇමතිවරයාත් ඉන්නේ රජය පාර්ශවයේ බැවින් විදුලි කප්පාදුව කඩාකප්පල්කාරී වැඩක් නම් වහාම ඒ සම්බන්ධව නීතිය ක්රියාත්මක කර ඒ ජාතික අපරාධරකරුවන් සොයා දඬුවම් කළ යුතු බවය.
ඒ අපරාධකරුවන් අත්අඩංගුවට ගෙන දඬුවම් කිරීම සම්බන්ධව කිසිම වෘත්තීය සමිතියක් එරෙහි නොවන බැවින් වහාම මහජන උපයෝගීතා කොමිසමේ සභාපතිවරයාගෙන් කටඋත්තරයක් ගෙන පොලිස් පැමිණිලි දැමූ පුද්ගලයාගේ තොරතුරු පදනම මත මේ පරීක්ෂණය ඇරඹිය හැකි බවද ඔහු පෙන්වා දෙයි.
කෙසේ වෙතත් මේ අර්බුදය විකෘති කිරීමේ වගකීමක් ආණ්ඩුවට නැතැයි ද ඔහු කියයි.
ඉතිහාසය පුරා කොමිස් සඳහා බාල වැඩ කර කරවටක් සිර වූ පසු හතර අතට චෝදනා කිරීමේ අයිතියක් කිසිම රජයකට නැති බව ද පවසයි.
