සමනල වැව ජලාශයෙන් උඩවලව ජලාශයට ජලය ලබාගැනීමට අදාළ කැබිනට් පත්රිකාව කෘෂිකර්ම අමාත්ය මහින්ද අමරවීර විසින් අද (07) යළිත් අමාත්ය මණ්ඩලය වෙත ඉදිරිපත් කිරීමට නියමිතව ඇත.
මේ වනවිට දිවයිනට බලපැවැත්වෙන වියලි කාලගුණ තත්ත්වය හේතුවෙන් හිඳී ගිය වලව ජලාශයට සමනල වැවෙන් ජලය ලබා ගැනීම සඳහා මින් පෙර කෘෂිකර්ම ඇමතිවරයා විසින් ඉදිරිපත් කළ කැබිනට් පත්රිකාව පිළිබඳව විපක්ෂවත් අදහස් මතුවීම නිසා කැබිනට් මණ්ඩලය තුළ තියුණු කථිකාවක් ඇති වී තිබිණි.
වලව කලාපයේ ගොවීන් දැඩි පීඩාවට පත් වූ මෙම ව්යසනකාරී තත්ත්වයේ දී සමනල වැව ජලාශයෙන් උඩවලව ජලාශයට ජලය මුදා හැරීම පිළිබඳව කැබිනට් මණ්ඩලයේම ඇමතිවරු ඍජුවම සිය විරෝධය පල කළ බව වාර්තා විය.
කෘෂිකර්ම ඇමතිවරයා දෙවැනි වරට මෙම කැබිනට් පත්රිකාව ඉදිරිපත් කරන්නේ එවැනි පසුබිමකය.
“වලව ගොවීන්ගේ ජල ප්රශ්නය විසඳන්න රජයට වගකීමක් තියෙනවා. ඒකෙන් බැහැරවෙන්න බෑ. මොකද ඒ ගොවි ජනතාව ඉතාමත් අමාරුවෙන් තමා මේ වගා කටයුතු කරගෙන ගියේ. දැන් අවසාන අවස්ථාව. කරල් දැකලා අද වේලෙන තත්ත්වයකට පත්වෙලා තියෙනවා. ඒ නිසා ජලය ලබාදීමේ පළවෙනි ප්රමුඛතාවය තමා පානීය ජලය. දෙවැනි ප්රමුඛතාවය තමා වගාවට ජලය. තුන්වෙනි ප්රමුඛතාවය තමා විදුලිය. දැන් දෙවැනි ප්රමුඛතාවය ක්රියාත්මක කළ යුතුයි. එක ජල මුරයක් දුන්නොත් මේ තියන තත්ත්වයෙන් 65% – 70%ක් හරි බේරගන්න පුළුවන් වෙයි. විදුලිබල මණ්ඩලය මේකට ප්රමුඛතාවය දීලා මැදිහත් වෙයි කියලා බලාපොරොත්තුවෙන් ඉන්නවා. මේක සුළු පටු කාරණයක් නෙමෙයි.”
