මහ බැංකු නිලධාරීන් දෙගුණයකටත් වඩා වැඩිපුර තම වැටුප් වැඩි කරගෙන ඇත්තේ පනත වැරදි සහගත ලෙස අර්ථකථනය කරමින් නීති විරෝධි ආකාරයට බව අද පාර්ලිමේන්තුවේ දී හෙළි වුනේය.
විපක්ෂයේ ප්රධාන සංවිධායක පාර්ලිමේන්තු මන්ත්රී ලක්ෂ්මන් කිරිඇල්ල පැවසුවේ පනතේ ඉංග්රීසි සහ සිංහල වගන්ති වෙනස් බවත් සිංහල වගන්තියේ ඇති පද පෙරළියකට මුවා වී මෙම වැටුප් වැඩි කරගෙන ඇත්තේ උසාවිය ඉදිරියේ දී පිළි ගන්නේ සිංහල අර්කථනය නිසා බවත් යැයි ලක්ෂ්මන් කිරිඇල්ල පෙන්වා දුන්නේය.
මහ බැංකු නියෝජ්ය අධිපති සිය ලක්ෂ 07ක වැටුප ලක්ෂ 16ක් දක්වා වැඩි කරගැනීම මහ බැංකුවේ ස්වාධීන බලයට යටත් වන බව ප්රකාශ වුන ද පාර්ලිමේන්තුව මගහැර යෑමට කිසිවෙකුට ඉඩක් නැති බව ඔහු පෙන්වා දුන්නේය.
ලක්ෂ්මන් කිරිඇල්ල කීවේ ඔවුන්ට තමන්ගේ වැටුප් සඳහා නිර්ණයන් ඉදිරිපත් කළ හැකි වුව ද එය අනුමත කරන්නේ පාර්ලිමේන්තුව බවත්, ශ්රේෂ්ඨාධිකරණ විනිසුරුන්ගේ වැටුප පවා පාර්ලිමේන්තුවෙන් නිර්ණය කරන විට මහ බැංකු නිලධාරීන්ට පාර්ලිමේන්තුව මග හැරිමේ බලය පැමිණියේ කෙසේ දැයි විමසන බවත්ය.
මෙහිදී නැගි සිටි මුදල් රාජ්ය අමාත්ය රන්ජිත් සියඹලාපිටිය මෙසේ කීවේය.
“මේ වෙලාවෙ අඩුම පඩියකට වැඩ කරන්න පුලුවන් නම් හොඳයි. ඒත් ලෝකයේ හැම තැනම මහ බැංකුවල වැටුප් තලය ඉහළයි. ඒකට හේතුව තමයි ඉතාම ඉහළ ගණයේ ආර්ථික විද්යාඥයින් මෙතන රඳවා ගන්න අවශ්ය නිසා.”
“දැන් අපි බැලුවොත් 2022 සහ 23 කාලයේ මහ බැංකු සේවකයින්ගෙන් සියයට 99ක් ලංකාව අත්හැර ගිහින්. සාමාන්ය ශ්රේණියේ ඉන්නෙ දාහකට ආසන්න පිරිසක්. ඒ කියන්නේ සියයට 10ක්. ඔවුන්ට අවුරුදු තුනකට වතාවක් තියනවාව සාමුහික ගිවිසුමකින් වැටුප් වැඩි කරන්න බලයක්.”
“එවැනි පසුබිමක් තුළ මහ බැංකුවට තියන ස්වාධීන අයිතියක් හැටියට තමයි මේක සිද්ධ වෙලා තියෙන්නේ. නමුත් ඒ වැටුප වැඩි කර නොගෙන මේ වෙලාවෙ සේවය කරන්න පුලුවන්නම් හොඳයි.. අඩුවට වැඩ කරන්න පුලුවන් නම් හොඳයි. ඒත් මේක එහෙම රටක් නෙමෙයි. ආදේශන නොමැති රාජකාරි සඳහා යම් යම් විශේෂතා දක්වලා ඔවුන් රඳවා ගන්න අපේ රටේ වෙලා තියනවා.”
එහෙත් ලක්ෂ්මන් කිරිඇල්ල පැවසුවේ මහ බැංකු නියොජ්ය අධිපතිගේ පඩිය ලක්ෂ 7 සිට ලක්ෂ 16 තෙක් වැඩි කරගන්නා විට කාර්යාල කාර්ය සහාකය තනතුතටත් හැත්තෑ පන් දහසක වැටුප් වැඩිවීමක් සිදුකර ඇති බව ය.
“මේ මොන විශේෂ සේවා ද?. අවුරුදු තුනක් රට බංකොලෝත කියන එක රටට හංගලා රට විනාශ කළේ මේ අය. හරි නම් මේ මිනිස්සු කළ විනාශයට පඩි අඩු කළ යුතුයි “
“සියල්ල කළේ කොළේ වහලා. ඇමති තුමා… ඒ අයට බලයක් නෑ පඩි වැඩි කරගන්න . මේ පනතේ සිංහල සහ ඉංග්රීසි වගන්ති වෙනස්. ඉංග්රීසි පනතේ ඇති වගන්ති සිංහල පනතේ නෑ. අධිකරණය පිළිගන්නේ සිංහල වගන්තිය.”
“ස්වාධීනත්වය පාර්ලිමේන්තුව මගහැරීම නෙමයි. සිංහල සහ ඉංග්රිසි අනුව පුලුවන්. අධිකරණය ගණන් ගන්නේ සිංහල එක. කොලේ වහලා රවට්ටලා නීති විරෝධි ගෙවීමක්. ඉදිරියෙන් මේ අයගෙන් අය කරනවා. නීතිපති උපදෙස් ගන්න.
“රට බංකොලොත් වීම ගැන අවුරුදු තුනක් කොලේ වහපු අය ගැලවුම්කාරයො නෙමෙයි. ශ්රේෂ්ඨාධිකරණයේ විනිසුරුවරුන්ගේ පඩි වැඩි කරන්නේ පාර්ලිමේන්තුව . එයාලට වැටුප තීරණය කරන්න අයිතිය තියනවා. ඒක අනුමත කරන්න පාර්ලිමේන්තුවට එන්න ඕන. පාර්ලිමේන්තුව අයිතිය පාවා දෙන්න එපා.”
විපක්ෂ සංවිධායකවරයා කීවේය. එම අදහස් ද සලකා බලන බව රාජ්ය මුදල් ඇමතිවරයා පාර්ලිමේන්තුවට කිවේය.
