මාතලේ මහ නගර සභාවේ හිටපු නගරාධිපති සන්දනම් ප්රකාශ් මාතලේ හික්ගොල්ල ප්රධාන මාර්ගයට යාබද මහ නගර සභාවට අයත් වටිනා ඉඩමක් බලහත්කාරයෙන් අත්පත් කරගෙන ඉදිකිරීමක් සිදුකර ඇති බවත් තාවකාලික ඉදිකිරීමක් ලෙස මුලින්ම සිදුකර ඇති ඉදිකිරීම ස්ථාවර ගොඩනැගිල්ලක් බවට පත්වීම සිදුවිය හැකි බව අතීත දේශපාලකයින්ගේ හැසිරීම්වලින් තහවුරු වී ඇති බැවින් මේ සම්බන්ධව වහාම ක්රියාමාර්ගයක් ගන්නා ලෙසත් දන්වමින් මාතලේ නාගරික කොමසාරිස්වරයා වෙත ලැබුණු පැමිණිල්ලක් අනුව අද (12) මූලික විමර්ශන ආරම්භ කරමින් නගරික ඉංජිනේරු අංශය ස්ථානීය පරීක්ෂණයක් සිදු කර තිබේ.
හිටපු නගරාධිපතිවරයා ගේ නිවස ආසන්නයේ පිහිටි මෙම ඉඩමේ කොටසක මාතලේ මහ නගර සභාවේ සේවා ස්ථානය ද පිහිටා තිබේ.
මේ සම්බන්ධව අප කළ විමසීමක දී මාතලේ නාගරික කොමසාරිස් නිශාන්ත මාදුවගේ පැවසුවේ අ මාතලේ මහ නගර සභාවට අයත් අදාල ඉඩමේ හිටපු නගරාධිපතිවරයා අනවසර ඉදි කිරීමක් සිදුකර තිබෙන බව නාගරික ඉංජිනේරු අංශය විසින් තමන් දැනුවත් කළ බවය.
අදාළ ඉඩමේ තේ කඩයක් පවත්වාගෙන යෑම සඳහා තාවකාලික ගොඩනැගිල්ලක් ඉදි කිරීමට අවසර ඉල්ලමින් හිටපු නගරාධිපතිවරයා තමන් වෙත ලිපියක් යොමුකර තිබෙන බව ඔහු කීවේය.
අදාළ ස්ථානයේ නගරසභාවට අයත් ඉඩම් කොටසක් අනීතිකව අත්පත් කර ගැනීම සම්බන්ධයෙන් හිටපු නගරාධිපතිවරයාට එරෙහිව විගණන විමසුමක් ද මෙයට පෙර නිකුත් කර තිබිණි.
කෙසේ වෙතත් මේ සම්බන්ධව කළ විමසුමක දී මාතලේ මහ නගර සභාවේ හිටපු නගාරාධිපති සන්දනම් ප්රකාශ් පැවසුවේ
මෙම ඉඩම නගර සභාවට අයිති එකක් නොවන බවය. තමන් එය ඉදිකිළේ හික්ගොල්ල රෝහලට සහ සුසානාගාරයට පැමිණෙන ජනතාවට ගිමන් හැරීම සඳහා යැයි ද ඔහු කීවේය.
කටුමැටි හා තහඩු යොදා සකස් කළ ගොඩනැගිල්ල තාවකාලික එකක් බැවින් ඕනෑම අවස්ථාවක එය ඉවත්කර ගැනීමට සූදානම් යැයි ද හෙතෙම පැවසුවේය.
