ලලිත් චාමින්ද –
රුහුණු මහා කතරගම දේවාලය තිස්සමහාරාම විවිධ සේවා සමුපාකාර සමිතියේ ඉන්ධන පිරවුම්හලින් රුපියල් නව ලක්ෂ, අසු නවදහස්, හාරසිය හෑත්තෑවයි ශත අනූ තුනක (9,89470.93යි) ඉන්ධන දැනට වසර කිහිපයක සිට ණය පදනම මත වරින්වර ලබාගෙන ඇතත් මේ වනතෙක් එම ණය මුදල ගෙවා නොමැති බැව් තිස්සමහාරාම විවිධ සේවා සමුපාකාර සමිතිය පවසයි.
රුහුණු මහා කතරගම දේවාලයේ ඇසළ මහා මංගල්ය විදුලි අලෝක කරණය, විදුලි ජනක යන්ත්ර හා වාහන සඳහා මෙසේ ණයට ඉන්ධන ලබාගෙන තිබුණි.
ණය පදනම මත පෙට්රල්, ඩිසල්, භුමිතෙල්, යන ඉන්ධන වර්ග තිස්සමහාරම විවිධසේවා සමුපාකාර සමිතියේ ඉන්ධන පිරවුම්හලෙන් කතරගම මහා දේවාලයේ පාලන අධිකාරිය විසින් මෙසේ මිලදී ගෙන ඇත.
රුහුණු මහා කතරගම දේවාලයේ මිට පෙර පැවති පාලනය විසින් රුපියල් හයලක්ෂ, පනස් හය දහස්, පන්සිය හතලිස් අටයි ශත හතලිස් තුනක් වටිනා (6,56548.43) ඉන්ධන ණයට ගෙන තිබුණි. වත්මන් පාලනය විසින්ද රුපියල් තුන් ලක්ෂ තිස්තුන් දහස්, එකසිය විසි දෙකයි ශත පනහක් (3,33122.50) විටිනා ඉන්ධන ණයට ගෙන තිබේ.
රුහුණු මහා කතරගම දේවාලය විසින් ලබාගත් මෙම ඉන්ධන සඳහා අය විය යුතු මුදල් ගෙවන ලෙස තිස්සමහාරාම විවිධසේවා සමුපාකාර සමිතිය විසින් අවස්ථා කිහිපයකදි රුහුණු මහා කතරගම දේවාලයේ පාලනාධිකාරිය වෙත ලිඛිතව දන්වා ඇතත් එම මුදල් ගෙවිම දිගින් දිගටම පැහැර හරිමින් සිටින බව තිස්සමහාරාම විවිධ සේවා සමුපාකාර සමිතිය පෙන්වදෙයි.
පසුගිය කාලයේ දේශපාලන බලපුළුවන්කාරකම් පෙන්වමින් කතරගම මහා දේවාල පාලන අධිකාරිය කිසිදු ඇපයක් හෝ නොමැතිව තිස්සමහාරාම විවිධ සේවා සමුපාකාර සමිතියේ ඉන්ධන පිරවුම්හලින් ඉන්ධන ලබාගෙන ඇති බවට අනාවරණය වි ඇත.
මේ පිළිබද තිස්සමහාරාම විවිධසේවා සමුපාකාර සමිතියේ සාමාන්යධිකාරි කේ.එච්. සුනිල්ගෙන් අප කළ විමසුමකදි මෙසේ කිවේය.
“ඉන්ධන මිලදි ගැනිම වෙනුවෙන් සමුපාකාර සමිතියට අයවිය යුතු මුදල් ලබාදෙන්න කියලා රුහුණු මහා කතරගම දේවාලයෙන් කිහිප අවස්ථාවකදිම ලිඛිතව ඉල්ලිම් කළා. මේ පිළිබද දේවාලයේ පාලනාධිකාරිය සමග සාකච්ඡා කළා. පසුගිය පාලන කාලයේ ලබාගත් ඉන්ධන සඳහා වගකීම ගන්න බැහැ කියලා වත්මන් පාලනධිකාරිය කියනවා. මේ සඳහා මැදිහත් වෙන්න කියලා බෞද්ධ කටයුතු කොමසාරිස් ජෙනරාල්තුමාටත් ලිඛිතව දැනුම් දිලා තියෙනවා”. යැයිද සමුපාකාර සමිතියේ සාමාන්යධිකාරිවරයා සදහන් කළේය.
රුහුණු මහා කතරගම දේවාලය බෞද්ධ කටයුතු කොමසාරිස් ජනරාල්වරයාගේ අධික්ෂණය යටතේ පාලනය වන ආයතනයකි. රුහුණු මහා කතරගම දේවාලයේ සිදුවු අක්රමිකතා සම්බන්දයෙන් බෞද්ධ කටයුතු කොමසාරිස් ජනරාල්වරයා විසින් 2018 වර්ෂයේ මාර්තු මස 26 දිනැති ලිපියක් මගින් විගණකාධිපතිවරයාගෙන් කරණු ලැබු ඉල්ලිමකට අනුව විශේෂ විගණනයක්ද සිදුකරණු ලැබිය. එම විගණන වාර්තාව 2019 වර්ෂයේ දි ප්රකාශයට පත්කොට තිබුණි.
