මෙරට දී එකලස් කළ ලියාපදිංචි නොකළ බී.එම්.ඩබ්ලියු වර්ගයේ මෝටර් රථයක් ලඟ තබා ගැනීමේ සිද්ධිය සම්බන්ධව අත් අඩංගුවට ගත් හිටපු අමාත්ය ජොන්ස්ටන් ප්රනාන්දු රුපියල් මිලියන 05 බැගින් වූ ශරීර ඇප 05ක ඇප මත මුදා හැරියේය.
අද කොටුව මහේස්ත්රාත් අධිකරණයෙන් ඇප ලබා ගැනීමෙන් අනතුරුව ඔහු අධිකරණ භූමියෙන් පිටව යෑමට පෙර පැවසුවේ නඩු කටයුත්තක් ඇති නිසා කිසිවක් ප්රකාශ නොකරන බවත් අධිකරණයේ දී ඇත්ත හෙළිවනු ඇති බවත්ය. එමෙන්ම තමන් මෙවර මහ මැතිවරණයට තරග වදින බව ද ජොන්ස්ටන් ප්රනාන්දු ප්රකාශ කළේය.
කොළඹ හිල්ටන් රථ ගාලේ තිබී සොරාගන්නා ලද ගරාජ් අංකයක් සවි කළ බී.එම්.ඩබ්ලියු රථයක් හමුවූ අතර මෙම රථය ජොන්ස්ටන් ප්රනාන්දු විසින් භාවිතා කරන ලද්දක් බව විමර්ශන අංශ සොයා ගත්තේය. අනතුරුව අන්තර්ජාතික පොලිස් වෙබ් අඩවියේ කරන ලද සෙවීමක දී මෙම මෝටර් රථය ජර්මනියෙන් එංගලන්තයට විකුණා එහිදී යම් අපරාධ සිද්ධියකට සම්බන්ධ සොරකම් කරන ලද කාර් රථයක් බව හෙළි විය.
එමෙන්ම රජයේ රස පරීක්ෂකවරයාගේ වාර්තාවට අනුව අනාවරණය වන්නේ වාහනය නීති විරෝධීව එකලස් කළ වාහනයක් බවය. මේ සම්බන්ධව ප්රකාශයක් ලබා දීමට නොපැමිණ අවස්ථා කීපයකදීම අධිකරණය මග හැරිය ජොන්ස්ටන් ප්රනාන්දු අපේක්ෂිත ඇපයක් ඉල්ලා සිටි අවස්ථාවේ දි අධිකරණය නියෝග කළේ අපේක්ෂිත ඇප ලබා දෙන්නට පෙර අපරාධ පරීක්ෂණ දෙපාර්තමේන්තවට ගොස් කටඋත්තරයක් ලබා දෙන ලෙසය.
අනතුරුව පසුගිය 23 දා අපරාධ පරීක්ෂණ දෙපාර්තමේන්තුවට පැමිණි ජොන්ස්ටන් ප්රනාන්දුගෙන් පැය 04ක් තිස්සේ කටඋත්තරයක් ලබා ගැනීමෙන් අනතුරුව ඔහුව අද දින තෙක් බන්ධනාගාරගත කෙරිනි.
අනතුරුව ඔහු අද මිලියන 05 බැගින් වූ ශරීර ඇප 05ක් මත ඇප ලබා නිදහස් වූයේය.
