දිනසේන රතුගමගේ –
රජය ඔවුන්ගේ දරදඩු ප්රතිපත්තිය වෙනස් නොකොට ජනතාවගේ ප්රශ්න වලට ඇහුම් කන් නොදෙන්නේ නම් සියලුම දෙමළ දේශපාලන පක්ෂවල සහය ලබා ගෙන දෙමළ ජනයා සමග පාරට බැස දකුණේ සිංහල දෙමළ මුස්ලිම් ජනතාව එක්ව දියත් කළ ජන අරගලයට සහාය පලකරමින් විරෝධතා ව්යාපාරයක් දියත් දක්වන බව දෙමළ ජනතා සන්ධානයේ මහ ලේකම් හිටපු පාර්ලිමේන්තු මන්ත්රී එම්.කේ ශිවාජිලිංගම් ඊයේ (11) යාපනයේදී පැවසීය.
ඔහු මේ බව කියා සිටියේ යාපනය මාධ්ය සමාජ ශාලාවේ පැවති මාධ්ය හමුවකදීය.
විධායක ජනාධිපති ක්රමය අහෝසි කිරීම දූෂණය නාස්තිය පිටු දැකීම හා මහජනයාගේ ප්රශ්න වලට කඩිනමින් සහන සලසා දීම යන කාරණා වලදී කොන්දේසි විරහිතව දෙමළ දේශපාලනඥයින් සහභාගී කාරවා ගන්නා ඕනෑම පිරිසකට තම පක්ෂයේ සහය ලබා දෙන බවද මහ ලේකම්වරයා කියා සිටියේය.
දෙමළ ජනතා සන්ධානය යන ඒ ගමනට අනෙක් සියලු දෙමළ දේශපාලන පක්ෂවල සහය ලබා ගැනීම ඉතා පහසු බව කී ශිවාජිලිංගම් හිටපු මන්ත්රීවරයා දැනට රටපුරා සිංහල දෙමළ හා මුස්ලිම් ජනතාව අරගල කරන්නේ ජාති භේදයකින් තොරව බව ද කීවේය. එම අරගලයට දෙමළ ජනතාවට එකතුව සහය දැක්විය හැකි බවද ප්රකාශ කළේය.
ජනාධිපතිවරයාට එරෙහිව විශ්වාස භංග යෝජනාවක් ගෙන ඒමට දේශපාලන පක්ෂ කීපයක් එක්ව කටයුතු කරණ බව කී හිටපු මන්ත්රීවරයා මේ අවස්ථාවේදී දෙමළ දේශපාලන පක්ෂවල මූලික අරමුණ විය යුත්තේද එයම බව කියා සිටියේය.
තම පක්ෂය ජනාධිපතිවරයාට හෝ රජයට කිසිම විරුද්ධත්වයක් නැතත් මේ කාලවකවානුවේදී ජනතාව පීඩාවට පත් කිරීම සම්බන්ධයෙන් දැඩි මතවාදයක් හා විරෝධයක් රජයට හා ජනාධිපතිවරයාට එරෙහිව ඇති බවද සඳහන් කළේය.
දකුණේ ජනතාව ගෙන යන අරගලයට සමාන අන්දමට අරගලයක් දෙමළ ජනතාව විසින්ද ගෙන යායුතු බව කී ඔහු එහිදී ඉදිරිපත් කෙරෙන අන්තර් වාර පාලන ක්රමයට උතුරු නැගෙනහිර දෙමළ ජනතාව සම්බන්ධයෙන්ද පිළිගත හැකි විසඳුමක් ඇතුළත් වියයුතු බවද පැවසීය.
මේ රටේ ජනවාර්ගික ප්රශ්නයට විසඳුමක් ලබා නොදෙන තුරු දෙමළ ජනයාගේ අරගලය නිමා නොවන බවත් ඒ අරගලයන්වල වාසිය දකුණේ ජනතාවටද ලැබෙන බවත් කී සිවාජිලිංගම් හිටපු මන්ත්රීවරයා ජාතීන් අතර සංහිදියාවක් ඇති කිරීමට නම් දෙමළ ජනතාවගේ ප්රශ්නයට අනිවාර්යෙන්ම සාධාරණ පිළිතුරක් ලබා දිය යුතු ව ඇතැයිද කියා සිටියේය.
රටේ දැවෙන ප්රශ්න වලට විසදුම් ලබා නොදී රට තුළ පැහැදිලි ආර්ථික ස්ථාවරයක් ඇති කොට රට දියුණු කිරීමට හැකි බව යමෙක් සිතන්නේ නම් එය මහා අනුවන ක්රියාවක් බව පෙන්වා දුන් හෙතෙම සියලු ජාතීන්ගේ සහයක් නොමැතිව රටක් ආර්ථික වශයෙන් දියුණුවට පත් කළ නොහැකි බවද මෙහිදී වැඩි දුරටත් කියා සිටියේය.
