2024 වන විට රනිල් වික්රමසිංහ මහතාගේ නායකත්වයෙන් නියත වශයෙන්ම එක්සත් ජාතික පක්ෂ ආණ්ඩුවක් පිහිටුවන බව එම පක්ෂයේ සභාපති වජිර අබේවර්ධන මහතා ලංකාසරට පැවසීය.
රනිල් වික්රමසිංහ මහතාගේ නායකත්වයෙන් ගොඩනගන ආණ්ඩුව පිළිබඳ මේ වන විටත් වත්මන් ආණ්ඩුවේ ප්රබල ඇමතිවරු රැසක් සාකච්ඡා ආරම්භ කර තිබෙන බව හෙතෙම අනාවරණය කළේය.
වත්මන් ආණ්ඩුව යන ගමන් මග පිළිබඳ කළකිරී සිටින ආණ්ඩුවේ ඇමතිවරු එම සාකච්ඡාවලදී වහා ඉල්ලා සිටින්නේ රනිල් වික්රමසිංහ මහතාට වහාම පාර්ලිමේන්තුවට පැමිණ බලය ලබාගන්නා වැඩපිළිවෙළ ආරම්භ කරන ලෙස බවද අබේවර්ධන මහතා සඳහන් කළේය.
මීට අමතරව 2024 එක්සත් ජාතික පක්ෂ පාලනයක් ඇති කිරීම සඳහා රටේ ඡන්ද මධ්යස්ථාන 12000 ම ආවරණය වන පරිදි පුළුල් වැඩපිළිවෙළක් දියත් කිරීමට තම පක්ෂය සැලසුම් කර තිබෙන බවද ඒ මහතා අනාවරණය කළේය.
පැවති අඩුපාඩු සියල්ල හඳුනාගනිමින් නව දර්ශනයක් නව වැඩපිළිවෙළක් මේ ඔස්සේ ක්රියාවට නංවන බව පවසන ඒ මහතා විපක්ෂයේ සිටින සෙසු පක්ෂ වලද ආණ්ඩුවේ සිටින ප්රබලයින්ගේ ද සහයෝගය ඇතිව 2024 නව පාලනය බිහි කරන බව ඔහු පැවසීය.
