මෙවර 5 ශ්රේණිය ශිෂ්යත්ව විභාගයට අදාළව සියලු උපකාරක පන්ති, දේශන, සම්මන්ත්රණ සහ වැඩමුළු පැවැත්වීම අද (11) මධ්යම රාත්රියේ සිට තහනම් බව විභාග කොමසාරිස් ජනරාල් අමිත් ජයසුන්දර පවසයි.
පාසල්වලට සිසුන් තෝරාගැනීමට සහ ශිෂ්යාධාර ප්රදානය කිරීම සඳහා පැවැත්වෙන 2024 වර්ෂයට අදාළව 5 ශ්රේණිය ශිෂ්යත්ව විභාගය සැප්තැම්බර් මස 15 වන දින පැවැත්වීමට නියමිතය.
ඒ අනුව අද මධ්යම රාත්රියේ සිට 5 ශ්රේණිය ශිෂ්යත්ව විභාගයට අදාළව අනුමාන ප්රශ්න ඇතුළත් ප්රශ්න පත්රය මුද්රණය කිරීම සහ ඒවා බෙදාහැරීම ද තහනම් වන බව කොමසාරිස් ජනරාල්වරයා සඳහන් කරයි.
තවද විභාග ප්රශ්න පත්රවල ප්රශ්න ලබාදෙන බවට හෝ ඒ හා සමාන ප්රශ්න ලබාදෙන බවට පෝස්ටර්, බැනර්, අත්පත්රිකා, විද්යුත්,මුද්රිත හෝ සමාජ මාධ්ය මඟින් ප්රසිද්ධ කිරීම සහ එවැනි දෑ ළඟ තබා ගැනීම ද සපුරා තහනම් වේ.
කිසියම් තැනැත්තෙකු, ආයතනයක් හෝ පාර්ශවයක් මෙම නියෝග කඩකිරීම හෝ උල්ලංඝනය කිරීම සිදුකරන්නේනම් ඒ පිළිබඳව ළඟම ඇති පොලිස් ස්ථානය, පොලිස් මූලස්ථානය හෝ විභාග දෙපාර්තමේන්තුව වෙත පැමිණිලි කළ හැකි බව විභාග කොමසාරිස් ජනරාල්වරායා සඳහන් කළේය.
විභාගය පැවැත්වෙන 15 වැනිදා උදෑසන 9.30 සිට 12.15 දක්වා ශබ්ද විකාශන යන්ත්ර භාවිතයෙන් වලකින ලෙස සියලුම මැතිවරණ අපේක්ෂකයින්ගෙන් ඉල්ලා සිටින බවද විභාග කොමසාරිස් ජනරාල්වරයා ප්රකාශ කළේය.
