අද දිනයේ ( 15 ) ශ්රී ලංකා නීතිඥ සංගමය (BASL) මහා සභා රැස්වීමක් කොළඹදී පැවැත්වීමට තීරණය කර තිබේ.
මෙය වසර 14කට පසුව පැවැත්වෙන පළමු විශේෂ මහා සභා රැස්වීම මෙය වන අතර අවසන් වරට මෙවැනි හදිසි රැස්වීමක් කැඳවා තිබුණේ 2012 වසරේ අගවිනිසුරුවරියකට එරෙහි දෝෂාභියෝගය අවස්ථාවේදීය.
නීතිඥ සංගමයේ සභාපති නීතිඥ රජීව් අමරසූරිය විසින් ඊයේ පැවති මාධ්ය හමුවක දී ප්රකාශ කරන්නේ නීතිඥ බුද්ධික මල්ලවආරච්චි සහ ඔහුගේ බිරිඳ ඝාතනය කිරීම “නීතියේ ආධිපත්යයට සහ යුක්ති පාලනයට එල්ල වූ බරපතල තර්ජනයක් බවය.
ශ්රී ලංකා නීතිඥ සංගමය මෙම තත්ත්වය දැඩි පිළිකුලෙන් යුතුව හෙළා දකින බවත්, මෙම ම්ලේච්ඡ ඝාතනය මුළු මහත් අධිකරණ පද්ධතිය කෙරෙහි මහජන විශ්වාසය බිඳ දැමීමට සමත් වන්නක් බවත් එම සංගමය පෙන්වා දී ඇත.
ඝාතනයට ලක්වූ නීතිඥවරයා නියෝජනය කළ සේවාදායකයන්ගේ ලැයිස්තුව මත පදනම්ව මෙම අපරාධය සාධාරණීකරණය කිරීමට උත්සාහ කරන මාධ්ය වාර්තා නීතිඥ සංගමය සහ කොළඹ නීතිඥ සංගමය තරයේ ප්රතික්ෂේප කරයි.
ඕනෑම සේවාදායකයෙකු වෙනුවෙන් පෙනී සිටීම නීතිඥවරයෙකුගේ වෘත්තීය වගකීමක් මිස එය අපරාධවලට හවුල් වීමක් නොවන බව අවධාරණය කරන ඔවුන්, වැරදිකරුවන් “සති ගණනක් නොව පැය කිහිපයක් ඇතුළත” අත්අඩංගුවට ගන්නා ලෙස පොලිස්පතිවරයාගෙන් සහ රජයෙන් ඉල්ලා සිටියි.
නීති වෘත්තිකයන්ගේ සහ සමස්ත පුරවැසියන්ගේ ආරක්ෂාව තහවුරු කිරීම රජයේ වගකීමක් වන අතර, අද පැවැත්වෙන විශේෂ රැස්වීමෙන් අනතුරුව ඉදිරි වෘත්තීය ක්රියාමාර්ග සහ නීතිඥවරුන්ගේ ආරක්ෂාව වෙනුවෙන් ගත යුතු නව පියවර පිළිබඳව තීරණය කිරීමට නියමිතය.
මෙම මහා සභා රැස්වීමේ දී හෙට දිනයේ දී උසාවි කටයුතුවලින් ඉවත් වී සිටීම හෝ ඒ අකාරයේ විරෝධයක් දැක්වීම ගැන තීරණ ගැනීම පිළිබඳ සාකච්ඡා කිරීමට සංගමය බලාපොරොත්තු වන බව වාර්තා වේ.
