අකුරේගොඩ ප්රදේශයේදී ප්රසිද්ධ නීතිඥ බුද්ධික මල්ලවආරච්චි සහ ඔහුගේ බිරිඳ වෙඩි තබා ඝාතනය කිරීමේ සිද්ධියට සම්බන්ධ සැකකරුවන් පැමිණි බවට සැකකෙරෙන මෝටර් රථය ගාල්ල, බද්දේගම, අගලිය ප්රදේශයේ අතහැර දමා තිබියදී පොලිසිය විසින් සොයාගෙන ඇත.
ශ්රී ලංකාවේ ත්රිවිධ හමුදා මූලස්ථානය පිහිටි අකුරේගොඩ ආරක්ෂක මූලස්ථාන සංකීර්ණයට මීටර 500ක් නුදුරෙන් සිදුවූ මෙම ද්විත්ව ඝාතනයෙන් පසු සැකකරුවන් මාකුඹුර පිවිසුමෙන් අධිවේගී මාර්ගයට පිවිස නිරුපද්රිතව ගාල්ලට පැමිණ ගාල්ල බද්දේගම අගලිය ප්රදේශයේ දී අද (පෙබරවාරි 15) අලුයම සොයාගනු ලැබූවේ ගිනි ගනිමින් තිබිය දී ය. මෙම EP KI-7738 දරන මෝටර් රථය, සාක්ෂි විනාශ කිරීමේ අරමුණින් ඝාතකයින් විසින් සම්පූර්ණයෙන්ම ගිනි තබා විනාශ කර තිබිණි.
මේ වනතුරුත් අපරාධකරුවන් පිලිබඳ හෝඩුවාවක් නැත. උන් සොයා ගැනීම සඳහා පොලිසිය ජනතා සහාය පතා තිබේ.
දැනට විදේශගතව සිටින බවට සැකකෙරෙන ‘කරන්දෙණිය සුද්දා’ (ජයලත් සිල්වා) නමැති පාතාල කල්ලි නායකයා විසින් මෙම ඝාතනය මෙහෙයවා ඇති බවට අපරාධ පරීක්ෂණ දෙපාර්තමේන්තුව සැක කරයි.
මියගිය නීතිඥවරයා මීට පෙර ‘කරන්දෙණිය සුද්දා’ වෙනුවෙන් පෙනී සිටියද, මෑතකදී ඔහුගේ ප්රතිවිරුද්ධ පාර්ශවය වන ‘ලොකු පැටී’ නමැත්තා වෙනුවෙන් අධිකරණයේ පෙනී සිටීම මෙම වෛරයට මුල වී ඇති බව පෙනී ගොස් තිබේ.
තම රහස්ය තොරතුරු ප්රතිවිරුද්ධ කල්ලිය වෙත නීතිඥවරයා හරහා කාන්දු වනු ඇතැයි පැවති බිය මෙම අපරාධයට ප්රධාන හේතුව ලෙස මූලික විමර්ශන වලදී අනාවරණය වී ඇත.
ඝාතකයින් කොටු කර ගැනීම සඳහා අපරාධ පරීක්ෂණ දෙපාර්තමේන්තුව (CID) සහ විශේෂ කාර්ය බලකාය (STF) ඇතුළු විශේෂ පොලිස් කණ්ඩායම් 10 ක් මේ වන විට දිවයින පුරා පරීක්ෂණ පවත්වයි.
පසුගිය පෙබරවාරි 13 වන දින සන්ධ්යා කාලයේ හෝ රාත්රී කාලයේ හෝමාගම, අතුරුගිරිය, කොට්ටාව හෝ මාකුඹුර ප්රදේශ හරහා ගමන් කළ වාහන හිමියන්, තම Dashcam දර්ශන පරීක්ෂා කර ඉහත කී මෝටර් රථය සම්බන්ධ තොරතුරක් වෙතොත් වහාම දැනුම් දෙන ලෙස පොලිසිය ඉල්ලා සිටියි. බස්නාහිර පළාත් දකුණ අපරාධ කොට්ඨාසය – 071 8592279 අංකය ඒ සඳහා ලබා දී තිබේ.
සිද්ධිය සම්බන්ධව නුගේගොඩ කොට්ඨාස අපරාධ විමර්ශන කාර්යාංශය වැඩිදුර විමර්ශන පවත්වයි.
