මනම්පිටිය නිමල් ජයරත්න –
පොලොන්නරුව මහවැලි බී කලාපයේ වැලිකන්ද නාගස්තැන්න ගම්මානයෙ අක්කරයක වට්ටක්කා වගා කළ ගොවිමහතෙකු එම වට්ටක්කා අස්වැන්නෙන් මාස දෙකහමාරක් ඇතුළත රුපියල් ලක්ෂ 17 ක ආදායමක් ලබාගෙන ඇත,
වැලිකන්ද නාගස්තැන්න අංක 03 ඒ ලිපිනයේ පදිංචි 42 වියැති දෙදරු පියකු වන ඩී. චාමර ප්රදීප් සේනාරත්න යන අය එලෙස මාස දෙකහමාරක් ඇතුළත වට්ටක්කා අස්වැන්නෙන් ලක්ෂ 17 ක ආදායමක් ලබාගෙන ඇති බව මහවැලි බී කලාපය නියෝජ්ය නේවාසික ව්යාපාර කළමනාකාර කෘෂිකර්ම ඩබ්ලිව්.එම්.පී.කේ.විජේසුන්දර සඳහන් කළේය.
තමන් අක්කරයක පමණ වට්ටක්කා වගා කළ බවත්, එම වට්ටක්කා කිලෝ එකක් දඹුල්ල ප්රදේශයේට රුපියල් 160 බැගින් අලෙවි කර බවත්, මාස දෙකහමාරක ඇතුළත තමන් එම වට්ටක්කා අස්වැන්නෙන් රුපියල් ලක්ෂ 17 කට ආසන්න මුදලක් ලබාගත් බව වට්ටක්කා වගා කළ ගොවි මහතා වන චාමර ප්රදීප් සේනාරත්න සඳහන් කළේය.
තමන් ඒ සඳහා කාබනික පොහොර භාවිතා කරගත් බවත්, කුකුල් සහ අනෙකුත් පොහොර යොදාගත් බවත් අක්කරයක වට්ටක්කා වගා කිරීමට තමන්ට වැයවූයේ රුපියල් ලක්ෂ හතරකට ආසන්න මුදලක් බවත් ඔහු කීවේය.
වන අලි හා වන සතුන්ගේ තර්ජන මැද කාබනික පොහොර වලින් වට්ටක්කා වගාවක් සිදුකර අස්වැන්නක් හා රුපියල් ලක්ෂ දාහතක ආදායමක් ලබාගත් පළමු අවස්ථාව මෙය බවත්, වී වගාව පමණක් සිදු නොකර වට්ටක්කා ඇතුළු අතිරේක බෝග වගා කරමින් ඉහළ ආදායමක් ලබාගැනීමට තමන් ආදර්ශයට ගන්නා ලෙසත් සියලු ගොවීන්ගෙන් තමා ඉල්ලා සිටින බවද චාමර ප්රදීප් සේනාරත්න කීවේය.
තමන් වට්ටක්කා වගාවට අමතරව තක්කාලි, මිරිස්, වී වගාව, සිදු කළ බවත්, ශ්රී ලංකා මහවැලි අධිකාරියේ මහවැලි බී කලාපයේ නේවාසික ව්යාපාර කළමනාකාර, ඉන්දික රණවීර, මහවැලි බී කලාපය නියෝජ්ය නේවාසික ව්යාපාර කළ කලමනාකාර [ කෘෂිකර්ම] ඩබ්ලිව්.එම්.පී.කේ.විජේසුන්දර, මෙන්ම ක්ෂේත්ර සහකාර හර්ශ කාංචන, කෘෂිකර්ම නිලධාරී ශාමලී සුරවීර අසේලපුර කොට්ඨාස කළමනාකාර එච්.එම්.එල්,එස්. බණ්ඩාර තමන්ට ඒ සඳහා පූර්ණ සහයෝගය සහ උපදෙස් ලබාදුන් බවද චාමර ප්රදීප් සේනාරත්න වැඩිදුරටත් පැවසීය,
