හිටපු ජනාධිපතිනි චන්ද්රිකා බණ්ඩාරනායක කුමාරතුංග සහ සෞඛ්ය අමාත්ය වෛද්ය නලින්ද ජයතිස්ස අතර විශේෂ සාකච්ඡාවක් සෞඛ්ය හා ජනමාධ්ය අමාත්යාංශයේදී පැවැත්විණි.
මෙම සාකච්ඡාවේ ප්රධාන අරමුණ වූයේ සීදූව විජය කුමාරතුංග අනුස්මරණ රෝහලේ වර්තමාන තත්ත්වය සමාලෝචනය කිරීම සහ එහි ඉදිරි සංවර්ධන කටයුතු පිළිබඳව තීරණ ගැනීමයි.
මෙහිදී විශේෂයෙන්ම රෝහල මගින් සපයනු ලබන අක්ෂි ප්රතිකාර සහ ශල්යකර්ම සේවාවන් තවදුරටත් ශක්තිමත් කිරීම කෙරෙහි අවධානය යොමු විය. මීට අමතරව බාහිර රෝගී අංශය (OPD), දන්ත වෛද්ය ඒකකය සහ රසායනාගාර සේවාවන්හි ක්රියාකාරිත්වය මෙන්ම රෝහලේ පරිපාලන හා මූල්ය කටයුතු පිළිබඳව ද මෙහිදී දීර්ඝ වශයෙන් කරුණු විමසා බලන ලදී.
මෙම අවස්ථාවට සෞඛ්ය අමාත්යාංශයේ ලේකම් වෛද්ය අනිල් ජාසිංහ, අතිරේක ලේකම්වරුන් වන ජනක කිත්සිරි ගුණවර්ධන සහ චාමික ගමගේ, නියෝජ්ය අධ්යක්ෂ ජනරාල්වරුන් වන වෛද්ය අර්ජුන තිලකරත්න සහ සමිද්ධි සමරකෝන්, ප්රධාන මූල්ය නිලධාරී ජී.එස්. කරුණාරත්න සහ රෝහල් අධ්යක්ෂ වෛද්ය ගයාන් රණවීර ඇතුළු නිලධාරීහු පිරිසක් සහභාගී වූහ.
සීදූව සහ අවට ප්රදේශවාසීන්ට වඩාත් ගුණාත්මක සෞඛ්ය සේවාවක් සැලසීම වෙනුවෙන් රෝහලේ පහසුකම් ඉහළ නැංවීමට මෙහිදී එකඟතාව පළ විය.
