අන්තර්ජාතික සමාජ පර්යේෂණ ක්රමවේදයන් අනුගමනය කරමින් පසුගිය ජනවාරියේ දී රට සම්බන්ධව වූ ජනතා තෘප්තිය විමසූ සමාජ පර්යේෂණය රටේ ජනතාවෙන් සියයට 94ක් රට කරවන ආකාරය ගැන අතෘප්තියෙන් සිටින බව හෙළි වී තිබේ.
පසුගිය ජනවාරියේ දී දිවයින පුරා ජන වර්ග ලෙස නියෝජනයවන ශ්රී ලාංකික වැඩිහිටියන් 1021 නියෝජනයවන ප්රතිචාර නියැදි මත පදනම්ව වෙරිටේ රිසර්ච් ආයතනය මෙම පරීක්ෂණය සිදු කර තිබේ. ජනමත විමසුම සඳහා ලෝකයේ වඩාත්ම කීර්තිමත් ආයතනයක් වූ ගැලප් ආයතනය ඇමරිකා එක්සත් ජනපදයේ ජනමත විමසුම් සිදුකරන නිර්නායකයන් අනුදනිමින් එම ක්රමවේදය ලංකාවට ගලපාගෙන මෙම පර්යේෂණය වෙරිටේ රිසර්ච් විසින් සිදුකර ඇත.
වත්මන් රජය වැඩ කරන ආකාරය ගැන සියයට 90ක් තමන්ගේ අප්රසාද පළ කර ඇත. රජයේ වැඩපිළිවෙළ අනුමත කර ඇත්තේ සියයට 10ක් පමණි.
රට ගැන තෘප්තිමත් ද , පොදුවේ ගත් විට ශ්රී ලංකාව තුළ මේ වනවිට සිදුවන දේ ගැන ඔබ සෑහීමකට පත් වෙනවා ද, නැති ද යන ප්රශ්නයට සියයට අනූ හතරක් පිළිතුරු දී ඇත්තේ සෑහීමකට පත් නොවන බවය. සියයට 6ක් පමණක් සෑහීමකට පත්වන බවට පිළිතුරු ලබා දී ඇත.
ආර්ථික තත්ත්වය ගැන විශ්වාසය ජනනය කිරීම සඳහා අද රටේ පවතින ආර්ථික තත්වය සහ එහි ගමන් පථය පිළිබඳ බහුවරණ ප්රශ්නාවලියක් පර්යේක්ෂකයන් විසින් භාවිතා කර තිබිණි.
ලකුණු – 100 සිට + 100 දක්වා පරාසයක් තුළ ලබා දී තිබිණි. ආර්ථිකය විශිෂ්ට හෝ හොඳ තත්වයේ පවතින බව සහ එය හොඳ අතට හැරෙමින් ඇති බව සියලු දෙනා සිතන්නේ නම් ලකුණු ධන (+) 100 ලෙස සටහන් කරන අතර ආර්ථිකය දුර්වල මට්ටමක හෝ නරක අතර හැරෙමින් තිබෙන බව සිතන්නේ නම් ලකුණු ඍණ (-) 100 අගයක් වේ. ආර්ථික නරක අතට හැරෙනු ඇතැයි සිතන අයගේ ප්රතිශතය සියයට 83ක් විය. ඒ අනුව එහි ලකුණු අගය සටහන් වූයේ – 83%ට ලෙසිනි.
මෙම පර්යේෂණ නියැදි සහ ක්රමවේදයය සැලසුම් කර ඇත්තේ සියය 95ක විශ්වාසනීය පරතරයක දී සියයට 3ට උපරිම දෝෂ ආන්තිකය කරන ආකාරයෙන් බව පර්යේෂණ ආයතනය කියයි.
එම සමීක්ෂණ වාර්තාව පහත දැක්වේ.
