කොළඹ ජාතික රෝහලේ ශල්යාගාරයක සිවිලිමේ සඟවා තිබිය දී රුපියල් මිලියන 8.8ක් පමණ වටිනා ශල්ය උපකරණ තම නිලධාරීන් මැදිහත් වී සොයා දුන් බවත්, එසේ සොයා දුන් පසුත් සිද්ධිය සම්බන්ධව මේ වනතුරුත් නිසි ක්රියාමාර්ගයක් ගෙන නැති බවත් පාර්ලිමේන්තුවේ රජයේ ගිණුම් පිළිබඳ කාරක සභාවේදී විගණකාධිපති ඩබ්ලිව්. පී. සී. වික්රමරත්න හෙළි කළේය.
විගණකාධිපිතවරයා කීවේ සෞඛ්ය ක්ෂේත්රය මේ තරම් අර්බුදයකට ගොස් ඇති අවස්ථාවක දී අතට අල්ලා දුන් අපරාධයක් විෂයෙහි ක්රියාත්මකවන ආකාරය විමසන විට මේ රටේ ප්රධාන ජාතික රෝහලේ කළමනාකරණය පිළිබඳ බරපතල ප්රශ්නයක් ඇති වන බවය.
සෞඛ්ය අංශයේ ඉහළ බලධාරීන්ව කැඳවා තිබූ අදාළ ගිණුම් පිළිබඳ කාරක සභා රැස්වීමේ දී විගණකාධිපතිවරයා මෙසේ ද පැවසීය.
“රුපියල් මිලියන 8.8ක් වටිනා අලුත්ම ශල්ය වෛද්ය අයිතම තොගයක් කොළඹ ජාතික රෝහලේ එක්තරා ශල්යාගාරයක සිවිලිම උඩ තිබිලා මගේ නිලධාරින් සොයා ගන්නවා. ඒ සොයා ගන්නෙ ලැබෙන තොරතුරක් අනුව. “
“සිවිලිමට නිකම් ශල්ය වෛද්ය අයිතම යන්න විදිහක් නෑ. මේ එක සිද්ධියයක් විතරයි. මේකට බැඳුන තවත් සිද්ධි ගණනාවක් තියනවා. අප මේ ගැන පරීක්ෂණයක් කරන්න කියලා බලධාරීන්ට කිව්වා. ඒ් තවම මේක වෙලා නෑ. “
“මේවා මේ විදිහට වෙන්නෙ කොහොම ද?. ශල්ය අයිතම නෑ. කියලා රටක් කෑ ගහනවා. තියන ශල්ය අයිතමවලට මොකද වෙන්නේ කියන එක විශාල ගැටලුවක්. “
“මේ වගේ දෙයක් නැවත සිද්ධ නොවෙන්න මීට වඩා විධිමත් ක්රිියාමාර්ග ඉක්මනින් ගත යුතුයි. මේක අවුරුද්දක් තිස්සේ ඇදි ඇදි ගිහිල්ලා මේකට සම්බන්ධ පොඩි නිලධාරියෙක් සමහරවිට සේවයෙන් පහ කරයි. හැබැයි ඒ ප්රශ්නය එතනින් ඉවර වෙන්නේ නෑ. මීට වඩා ඍජු විදිහට, මිට වඩා විනිවිද දකින විදිහට මේ වැඩේ වෙන්න ඕන.”
අපරාධ පරීක්ෂණ දෙපාර්තමේන්තුවට දීලා මේකේ පිටිපස්සේ කවුද ඉන්නෙ කියන එක හොයන්න ඕන. මොකද හේතුව මේ ශල්ය අයිතම ආයෙත් වෙන කාටවත් යන්නේ නෑ . යන්නේ මේ රටේම තියන ෆාමසිවලට. නැතිනම් වෙනත් වෙළෙඳ සමාගම්වලට. මේවම තමයි නැවතත් ආයේ රෝගින්ට දෙන්නේ. “
“ අපේ රටේ තියන ප්රධානම රෝහලේ තත්ත්වය මේක නම් ඒ අපරාධය සම්බන්ධව සොයා දුන්නට පස්සේ ඒ සම්බන්ධ ක්රියාකිරීම මේ තරම් අකාර්යක්ම නම් මේ රෝහලේ කළමනාකරණය සම්බන්ධව විශාල ප්රශ්නයක් තියනවා.”
විගණකාධිපතිවරයා කීවේය.
