“ඔට්ටුයි රනිල් රට ගොඩදානවා!”
මගේ මිතුරෙක් කීවේය.
රනිල් රට ගොඩදැම්මොත් යැයි සිතී මගේ ඇඟ කිලිපොළා ගියේය. මට මහා බියක් දැනෙන්නට විය.
“ඇත්තටම මිනිහා රට ගොඩදායි ද?”
මම තහවුරු කර ගැනීම සඳහා යළි විමසුවෙමි. එයා තනියම හෝ රට ගොඩ දැම්මොත් වෙන අබග්ගය ගැන මට සිතා ගැනීමටවත් නොහැකිය. එසේ වුවහොත් අපේ මේ ප්රීතිමත් ජීවන රටාව යකාට යනු ඇත.
“රනිල් කතා කරන හැටියට නම් රට ගොඩ නොයා බෑ. මේ තරම් විනිවිදභාවයකින් අවංකව ජනතාවට ඇත්ත කිව්ව නායකයෙක් මීට ඉස්සර කවදාවත් ඉඳලා තියෙනවද?”
මිතුරා මගෙන් ඇසීය.
“අම්මපා මිනිහා ඇත්ත කියාගෙන යන වේගෙට වෙලාවකට මටත් බය හිතෙනවා. ඔහොම ඇත්ත කියාගෙ කියාගෙන ගිහිල්ලා කොයි වෙලාවක හරි මිනිහා ගහපු ගේම් ටිකත් ජනතාවට කියලා දායිද කියල”
මම මිතුරා සමග එකඟ වුනෙමි.
“බලන්න රට ගොඩ එන්න ඉස්සෙල්ලා තවත් අගාධයට යනවා කියලා කියන්න තරම් අවංක වෙච්චි වෙන එක නායකයෙක්වත් මේ රටේ හිටියද?”
මිතුරා ආඩම්බරයෙන් ඇසීය.
“ඒක කියන්න නම් අගමැති වෙන්න ඕනේ නෑනේ. ඕක මටත් ඇස්වහගෙන කියන්න පුළුවන්. අනික ඉස්සෙල්ලා හිටපු අය අර අගාධෙට යන වේගය සීඝ්ර කරන්න දිවා රෑ වෙහෙස මහන්සිවෙලා වැඩ කරපු හින්දා මිනිස්සුන්ට ඕවා කිය කිය ඉන්න වෙලාවක් තියෙන්නෙ නැතිව ඇති”
මම පෙරළා කීවෙමි.
“එතකොට ජූලි වෙනකොට පුද්ගලික ව්යාපාර වැහෙනවා. රස්සාවල් නැතිවෙනවා. වේලවල් දෙකයි ඊට පස්සේ කන්න වෙන්නෙ කියලා කියන එක ගැන මොකද කියන්නේ?”
මිතුරා නොමනාපෙන් ඇසුවේය.
“එහෙම කියලා මිනිස්සුන්ව හොඳටම බය කරලා, මිනිහා යාන්තමට හරි ගොඩදාලා දුන්නොත් කවුද ගොඩ? රටද? රනිල්ද?”
මම ඇසුවෙමි. මිතුරා කල්පනාවේ නිමග්න විය.
“බලනවා බැදුම්කර මගඩිය ඇදපු නන්දලාලුත් තවම වැඩනේ. ඉතිං රනිල් ආදර්ශමත් නායකයෙක් නෙමෙයිද?”
මිතුරා සිය තර්කය ස්ඵුට කරනු පිණිස කීය.
“රනිල් දැන් ආදර්ශෙ දෙන්න ලඟයි කියලා තමයි රට්ටු නම් කියන්නේ”
මිතුරා බණ්ඩක්කා සේ ලිස්සා ගියේය.
“ඒවුණාට හිතනවකෝ රනිල් අගමැති වුණු ගමන් ගිනිගත්ත රට නිවුණනේ. කොටින්ම ගෝල්ෆේස් අරගලේ පවා පිම්මක් පැන්නා. සංගක්කාර පවා පෝලිමේ ඉන්න ගත්තා”
මිතුරා කියවාගෙන ගියේය.
“සංගා නම් ජනාධිපතිවෙන පෝළිමෙත් ඉන්නවා කියලා කතාවක් තියනවනේ”
මිතුරා කුපිත කිරීමට සිතා කීවෙමි.
“එහෙම වුනොත් සංගටත් ඉතිං සංඝරත්නයේ පිහිට තමයි. පේනවනේ දේශපාලනේ තේරෙන්නෙ නැති හාදයෙකුට දීලා දැන් වෙලා තියෙන දේ. මේ රටේ ඉන්න කුපාඩි හැත්ත පාලනය කරන්න නම් ‘ලංකා දේශපාලන විශ්වවිද්යාලේ’ අවුරැදු දහයක් පහළොවක්වත් පාස්වෙවී ෆේල් වෙවී ඉන්න ඕන. නැත්තන් ඇවිත් මාස තුනෙන් එයත් ෆේල් මෙයත් ෆේල් වගේ කුප්ප කතා අහන්න වෙනවා”
මිතුරා සංගාව ලැයිස්තුවෙන් කපා දැම්මේය.
“දැන් එතකොට රනිල් රට ගොඩදායි කියලා තමුසෙට හොදටම විශ්වාසද?”
මම අවසන් වතාවටත් විනිශ්චය කර ගැනීම සඳහා ඇසුවෙමි.
“එක්කෝ අනේ මංදා. මහාවංශෙ වීරවංශෙ වගේ පච කතා ඇරැණම, ලංකාව ගොඩදාපු එකෙක් ගැන අපි කවදාවත් අහලා නෑ නේද?”
මම හිස වැනුවෙමි.
