එය නම් අති විශිෂ්ට ජයග්රහණයක් බව ආඩම්බරයෙන් ලියා තැබිය යුතුව ඇත. පණ අදින ජාතියකට හුස්ම පොදක් ලැබෙන්නේ මෙවැනි වික්රමයන්ගෙන් පමණි.
ශ්රී ලංකාව ඔස්ට්රේලියානුවන් පරදවා අති විශිෂ්ට කඩුලු 06ක ජයග්රහණයක් වාර්තා කළේය. පැතුම් නිශ්ශංක නැමැති නිහඬ සටන් කරුවා ඔස්ට්රේලියානුවන් බෙහෙවින්ම විඩාවට පත් කළේය. ඔහු පන්දු 147ක දී ලකුණු 137ක් ලබා ගත්තේය.
දැන් ශ්රී ලංකාව තරගාවලියේ 2-1 ලෙස ඉදිරියෙනි.
අද පැවැත්වුනේ ඔස්ට්රේලියා ශ්රී ලංකා එක්දින තරගාවලියේ තෙවන තරගයය. කොළඹ ආර් ප්රේමදාස ක්රීඩාංගනයේ දී තරගය පැවැත්විනි. කාසියේ වාසිය දිනුවේ ඕස්ට්රේලියානුවන්ය. ඔවුහු පන්දුවට පහරදීම තේරූහ.
ඔස්ට්රේලියානු කණ්ඩායම සටන්කාමී පිතිකරණයක නිරත වූහ. නායක ආරොන් ෆින්ච් පන්දු 85ක දී ලකුණු 62ක් ලැබීය. කඩුලු රකින ක්රීඩක ඇලෙක්ස් ග්රේ පන්දු 52ක දී ලකුණු 49ක් ලැබුවේය. ඔස්ට්රේලියා වෙනුවෙන් හොඳම පිතිකරණයේ යෙදුනේ මැද පෙළ පිතිකරු ට්රෙවිස් හෙඩ්ය. ඔහු පන්දු 65ක දී වේගවත් ලකුණු 70ක් රැස් කළේය. පිතිකරු ලයිස්තුවේ හත් වැන්නාව වූ තුන් ඉරියව් ක්රීඩක ග්ලෙන් මැක්වෙල්ගෙන් දැවැන්ත ප්රහාරයක් ශ්රි ලංකා කණ්ඩායමට එල්ල විය. ඔහු පනුද් 18ක් තුළ ලකුණු 33ක් රැස් කළේය. පන්දු ඕවර 50 තුළ කඩුළු 06කට ඔස්ට්රේලියානුවො ලකුණු 291ක් ලැබූහ.
පන්දු යැවීමේ දී ජෙෆ්රි වැන්ඩර්සේ පන්දු ඕවර 10ක් යවා ලකුණු 49කට කඩුළු 03ක් දවා ගත්තේය. දුෂ්මන්ත චමීර, දුනිත් වෙල්ලාලගේ, ධනංජය ද සිල්වා එක් කඩුල්ල බැගින් ලැබූහ.
පිළිතුරු ඉනිම ක්රීඩා කිරීමට පැමණි ශ්රී ලංකා ආරම්භක පිතිකරුවන් දෙපල වූයේ නිරෝෂන් දික්වැල්ල සහ පැතුම් නිශ්ශංකය. පන්දු 26ක දී හතරේ පහර 05ක් සමගින් ලකුණු 25ක් ලබාගෙන සිටි නිරෝෂන් දික්වැල්ල මුළු ලකුණු සංඛ්යාව 42 දී දැවී ගියේය. අනතුරුව පැතුම් නිශ්ශංකට එක් වන්නේ කුසල් මෙන්ඩිස්ය.
කුසල් මෙන්ඩිස් සහ පැතුම් නිශ්ංශක පළමු කඩුල්ල වෙනුවෙන් මතක ඇති කාලයක ක්රිඩා කළ විශිෂටම ඉනිම ක්රීඩා කළහ. පන්දු 85ක දී ලකුණු 87ක් රැස් කරගෙන සිටි කුසල් මෙන්ඩිස් සිය ශතකය පෙනි පෙනී ආබාධයකට ලක් වී පිටියෙන් ඉවත් විය. ඔහු සිය ලකුණු 85ට හතරේ පහර 08ක් එල්ල කර තිබිණි.
අනතුරුව පැතුම්ට එක් වුණු ධනංජය ද සිල්වා පන්දු 17කට මුහුණ දී හතරේ පහර 4ක් සමග ලකුණු 25ක් රැස් කළේය.
මේ තරගය විශිෂ්ටත්වයට පත් කළ ක්රීඩකයා පැතුම් නිශ්ශංකය. පැතුම් ආරම්භක පිතිකරු ලෙස පැමිණ මිනිත්තු 203ක් කඩුල්ලේ රැදෙමින් පන්දු 147කට මුහුණ දී ලකුණු 137ක් රැස් කළේය. හතරේ පහර 11ක් සහ හයේ පහර 02ක් ඒ විශිෂ්ට ඉනිමට ඇතුළත් වූයේය. ඔහු පන්දු ඕවර 47ක් පුර පිටියේ රැඳී සිටියේය. පැතුම්ගේ විශිෂ්ට පිතිකරණය ප්රතිවාදී ඕසට්රේලියානුවනුත් අගය කරනු පෙනුණි. ඔහු දැවී යන්නේ 48 වැනි ඕවරයේ පළමු පන්දුවේ දී ය. ඒ වනවිට ශ්රී ලංකා කණ්ඩායම ලකුණු 284ක් ලබා සිටියේය. ඒ කඩුළු 03කටය.
අනතුරුව පිටියට පැමිණි දසුන් ශානක මුහුණ දුන්නේ පන්දු දෙකකට පමණි. රිචඩ්සන් එවූ පන්දුවක් කෙළින්ම කඩුල්ලේ දැවටී ඔහු ලකුණු නොලබා දැවී ගියේය. ඒ වනවිට ජයග්රහණයට අවශ්ය වී තිබුණේ ලකුණු 07ක් පමණි.
ඒ වනවිටත් කඩුල්ලේ රැඳී සිටි චරිත් අසලංක 48 වැනි පන්දු ඕවරයේ 2 වැනි පන්දුවට දැවැන්ත හයේ පහරක් එල්ල කර ලකුණු මට්ටම සම කළේය. 48 වැනි ඕවරයේ 03වන පන්දුවේ දී ශ්රී ලංකාව ලකුණු 292ක ඉලක්කය ලබා ගත්තේය. පන්දු 09ක් ඉතිරිව තිබිය දී කඩුළු 06 අති විශිෂ්ට ජයක් ශ්රී ලංකා කණ්ඩායමට හිමි විය.
තරගයේ වීරයා පැතුම් නිශ්ශංකය.
