පළමුවෙනි තරගයෙන්ම අපි හොඳටෝම පරාදය. විස්සයි 20 තරගයක දී ලකුණු 62කින් පරාද වීම දරාගන්නට අසීරුය. ලකුණු 199ක ඉලක්කයක් කරා ගිය ශ්රී ලංකා කණ්ඩායමට පන්දු ඕවර 20 තුළ ලබා ගත හැකි වූයේ ලකුණු 137ක් පමණි. කඩුළු 06ක් දැවී ගියේය.
එක පිට එක කඩුලු වැටුනේය. බලාපොරොත්තු සහගත ආරම්භක පිතිකාර පැතුම් නිශ්ශංක ලකුණු නොලබා පළමු පන්දුවේදීම දැවී ගියේය. අත්හදා බැලූ නවකයන් දෙදෙනා අසමත්ය. කමිල් මෙන්ඩිස් ලකුණු 13කටත්, ජනිත් ලියනගේ ලකුණු 11කටත් දැවී ගියේය.
චන්දිමාල් ෆේල්ය. පන්දු 09ක දී ලකුණු 10ක් ලබාගෙන දැවී ගියේය. දසුන් ශානක ලබා ගත්තේ ලකුණු 03කි. ගෞරවය රැකදීම සඳහා චරිත් අසලංකගේ හුදකලා සටනින්වත් ගෞරවය රැකුණේ නැත. චරිත් ලකුණු 53ක් ලබා ගත්තේය. ඒ පන්දු 47කට මුහුණ දෙමිනි. දුෂ්මන්ත චමීර පන්දු 14ක දී ලකුණු 24ක් රැස් කළේය. ඔවුන් දෙදෙනා ලකුණු 40ක සබඳතාවයක් හත්වන කඩුල්ල වෙනුවෙන් ගොඩ නැගුවේය.
ඉන්දීය පන්දු යවන්නෝ හොඳටම කළහ. හැම පන්දු යන්නෙක්ම ශ්රී ලංකා පිතිකරුවන්ට කදිම පීඩනයක් එල්ල කළේය. හොඳින්ම පන්දු යැවූ බුවනේෂ් කුමාර් යැව්වේත් පන්දු ඕවර දෙකක් පමණි. ඔහු ලකුණු 9කට කඩුලු 02ක් දවා ගත්තේය. වෙන්කටේෂ් ලියර් පන්දු ඕවර 03ක් යවා ලකුණු 36ට කඩුලු 02ක් දවා ගත්තේය. යුස්වේනද්ර ෂව්ලා පන්දු ඕවර 03ක් යවා ලබා දුන්නේ ලකුණු 11කි. කඩුල්ලක් දවා ගත්තේය. රවීන්ද්ර ජඩේජා පමණක් පන්දු ඕවර 04ම යැව්වේය. ඔහු ලකුණු 28ට කඩුල්ලක් දවා ගත්තේය.
කාසියේ වාසිය ජයගෙන හඹා යෑමක් තීන්දු කිරීම මොන තරම් වැරදි තීන්දුවක් දැයි ශ්රී ලංකා කණ්ඩායමට ඉන්දියානුවන් පෙන්වා දුන්නේය.
ජයග්රහණය සඳහා ලකුණු 200ක් ලබා ගත යුතු විය. ඉන්දියාව ලකුණු 199ක් ලබා ගත්තේය. ඒ කඩුලු දෙකක් පමණක් දැවී යාමෙනි.
ශ්රී ලංකා පන්දු යවන්නෝ අනුකම්පා රහිත ඉන්දීය ප්රහාරයකට ලක් වූහ.
ඉෂාන් ක්රිෂාන් ආරම්භක පිතිකරු සේ ලකුණු 89ක් රැස්කළේය. ඒ පන්දු 56ක දීය. හයේ පහර තුනක් සහ හතරේ පහර දහයක් ඒ ලකුණු 89ට එක් විය. හයේ පහර සහ හතරේ පහර වලින් ඔහු රැස්කළ ලකුණු සංඛ්යාව 58කි. නායක රෝහිත් ෂර්මා පන්දු 32ක දී ලකුණු 44ක් රැස් කළේය. ආරම්භක කඩුල්ලේ සබඳතාවය ලකුණු 111කි. ශ්රෙයාස් ලියර් පන්දු 28ක දී ලකුණු 57ක් රැස් කළේය. හයේ පහර දෙකක් සහ හතරේ පහර දෙක්ක ඊට ඇතුළත් විය.
පන්දු යැවීමේ දී ලහිරු කුමාර සහ දසුන් ශානක කඩුල්ල බැගින් බිඳ හෙළූහ.
පළමු තරගයම ශ්රී ලංකාවේ අපේක්ෂා සුනු විසුනු කර ඇත. අප තරගකාරීත්වයේ අහලකවත් නැති බව පළමු තරගයෙන් පෙන්නුවේය. ශ්රී ලංකා ක්රීඩා ලෝලීහු විසල් පරිවර්තනයක් අපේක්ෂාවෙන් සිටිති.
