ඊයේ ( 23) පාර්ලිමේන්තුව උනුසුම් කළ චමින්ද වාස්ගේ ඉල්ලා අස්වීමේ සිදුවීම සම්බන්ධව ක්රීඩා අමාත්ය නාමල් රාජපක්ෂ පාර්ලිමේන්තුවට ප්රකාශ කර තිබුණේ අමූලික බොරුවක් බව ශ්රී ලංකා ක්රිකට් අභ්යන්තර ආරංචි මාර්ගම වාර්තා කරයි.
වාස්ගේ ඉල්ලා අස්වීම සම්බන්ධව සමගි ජන බලවේගයේ පාර්ලිමේන්තු මන්ත්රී තුෂාර ඉඳුනිල් සිදුකළ ප්රශ්න කිරීමේ දී ක්රීඩා අමාත්ය නාමල් රාජපක්ෂ ඊට පිළිතුර දුන්නේ වාස් අවසාන මොහොතේ දීමනා ඉල්ලා තනතුරු අත්හරින අශිෂ්ටයෙක් බව හැඟවෙන ආකාරයටය. වාස්ගේ විනය ගැන ප්රශ්න කළ ක්රීඩා ඇමතිවරයා මේ ආකාරයට හැසිරෙන්නේ නැතිව තමන්ගේ හෝ ක්රීඩා තාක්ෂණික කමිටුව සමග මේ ගැන සාකච්ඡා කළේ නම් ගැටලුව මේ තරම් දුර දිග නොයන බවත් කීවේය. ශ්රී ලංකා ක්රිකට් ආයතනයේ අවිනීත හැසිරීම් ආරක්ෂා කරමින් ඇමතිවරයා මේ කළ ප්රකාශයත් සමග ශ්රී ලංකා ක්රිකට් අභ්යන්තරයෙන්ම සිදුවී සැබෑ සිදුවීම වාර්තා වෙමින් ඇත.
ක්රීඩාවේදී ක්රීඩකයින් හා පුහුණුකරුවන් ඇතුළු නිලධාරීන් සදහා දෛනිකව දීමනාවක් ලබා දෙයි. එය හදුන් වන්නේ පර්ඩියම් (Per diem) යනුවෙනි.
චමින්ද වාස් බටහිර ඉන්දීය කොදෙව් ක්රිකට් සංචාරයට නම් කළ පසු තමන්ට ලබාදෙන පර්ඩියම් (Per diem) එක වැඩිකර එම තනතුරට සරිලන ලෙස ලබා දෙන ලෙස ක්රිකට් බලධාරීන්ගෙන් පළමුව ඉල්ලීම් කළේය.
එවිට ක්රිකට් ආයතන සභාපති ශම්මි සිල්වා එය ඉවත දමා ඇත්තේ පිළිකුල් සහගතවය. අනතුරුව චමින්ද වාස් මෙම තත්වය ක්රීඩා අමාත්ය නාමල් රාජපක්ෂට දන්වා තිබිණි. ඇමතිවරයා වාස්ට පවසා ඇත්තේ අරවින්ද ද සිල්වා ප්රමුඛ ක්රිකට් තාක්ෂණ කමිටුවට එම ගැටලුව යොමු කරන ලෙසය.
මේ අනුව වාස් මේ ඉල්ලීම ක්රිකට් තාක්ෂණික කමිටුවට යොමු කළේය. එම කමිටුවේ රොෂාන් මහානාම ඊමේල් පණිවිඩයක් මගින් වාස්ට දැනුම් දී ඇත්තේ වැටුප් වැඩි කිරීම හා දීමනා ගැන තම කමිටුව කටයුතු නොකරන බවය.
තත්වය එසේ තිබිය දී ක්රීඩා අමාත්යවරයා පාර්ලිමේන්තුවේ දී කීවේ තමන්ට හෝ ක්රීඩා තාක්ෂණික කමිටුවට මේ ගැන කීවා නම් වාස්ට විසඳුමක් ලැබෙන බවය. ඇත්ත තත්වය වසං කර වාස් විනාශ කරමින් ක්රීඩා ඇමතිවරයා පාර්ලිමේන්තුවට බොරු කියා ඇති බව එම ආරංචි මාර්ග ලංකාසරට හෙළි කළේය.
බටහිර ඉන්දීය කොදෙව් ක්රිකට් තරගාවලියට එක්වන තමන්ගේ තම දෛනික දීමනාව (Per diem) ඇමරිකා ඩොලර් 100 සිට 300 දක්වා වැඩි කර ගැනීමේ සියළු උත්සාහයන් ව්යර්ථ වූ විට චමින්ද වාස් තමන් දැරූ සියළු පුහුණුකාර ධූරයන්ගෙන් ඉල්ලා අස්වීමේ ලිපිය භාර දුන්නේය.
ක්රීඩා අමාත්ය නාමල් නොදන්නා පර්ඩියම් (Per diem) ශ්රී ලංකා ක්රිකට් ආයතන විධායක කමිටු නිලධාරීහු දන්නා බවත් ඔවුන් විදේශ ගතවන විට දිනකට ඇමරිකා ඩොලර් 300 – 400 දක්වා වූ දීමනාවක් ලබා ගන්නා බවත් ශ්රී ලංකා ක්රිකට් ආරංචි මාර්ග හෙළිදරවු කරයි.
ශ්රී ලංකා ක්රිකට් උප සභාපති රවීන් වික්රමරත්න පමණක් මේ දක්වා ලබා ගත් පර්ඩියම් (Per diem) ගණන රුපියල් කොටි ගණනක් බවත් එම ආරංචි මාර්ග පෙන්වා දෙයි. වාස් කළ මෙම ඉල්ලීමට වඩා වැඩි මුදලක් ක්රිකට් ආයතන බලධාරීන් නිකරුනේ දිනපතා විනාශ කරන ආකාරය පාර්ලිමේන්තු කෝප් කමිටුවේ දී පසුගියදා යළි ප්රශ්න කෙරී තිබිණි.
සම බරව ඇත්ත කියන ලංකාසර පුවත් ඔබට සෑම විටෙක දැකීමට ඕනෑ නම් පහත අපේ වට්ස්ඇප් / ටෙලිග්රෑම් සමූහයන්ට එක්වෙන්න.
වාස්ට ඩොලර් 300 ක් දෙන්න බැරි ශ්රී ලංකා ක්රිකට් ආයතනය ටොම් මූඩිව ශ්රී ලංකා ක්රිකට් අධ්යක්ෂ ධූරයට ගෙනෙන්න සූදානම් වන්නේ මාසයට ඇමරිකා ඩොලර් 30,000 ක මුදලක් ගෙවමින් බව වාර්තා වේ. ඒ වසරේ මාස තුනක් මෙම වැටුප් සමගින් සියලු පහසුකම් සහිතව ලංකාවේ සේවය කර මාස 06කට ආසන්න කාලයක් ඉන්දීය ප්රිමියර් ලීග් (IPL) වෙනුවෙන් සේවය කිරීමේ එකඟතාව ඇතුව බව lankasportsnews වෙබ් අඩවිය ඊයේ වාර්තා කළේය.
