මහේන්ද්ර සිං දෝනි දැන් 41 හැවිරිදිය. මේ දිනවල තමිල් නාඩුවේ පමණක් නොව සමස්ත ඉන්දියාවේත් ලංකාවේත් ජනප්රියතම ක්රිකට් ක්රීඩකයා ඔහුය.
මෙවර දෝනි ජනප්රිය වූයේ ඔහුගේ සුපුරුදු හයේ පහරවල් හෝ හෙලිකොප්ටර් ෂොට් නිසා නොවේය.
තැන්පත් පුද්ගලයකු ලෙස ප්රකට දෝනි මෙවර මේ ජනප්රියත්වය හිමි කරගත්තේ අයිපීඑල් 2023 තරගාවලියේ ශූරතාව දිනා ගැනීමට චෙන්නායි පිලට නායකත්වය සැපයූ විලාශය නිසාය.
චෙන්නායි පිල නියෝජනය කළ ලංකාවේ පොඩි උන් දෙදෙනා වන මහේෂ් තීක්ෂණ හා මතීෂ පතිරණ ගැන ලංකාවේ පුහුණුකරුවන් හෝ නායකයන්ටත් වඩා විශ්වාසය තැබූ දෝනි ඔවුන්ගේ විශ්වාසනීයත්වය නංවාලීම සඳහා ඔවුන් හැමවිටම දිරිමත් කළේය.
ලසිත් මාලිංග පන්නයේ පන්දු යවන 20 හැවිරිදි වියේ පසුවන මතීෂ ලොව පුරා අවධානයට ලක් වන පරිදි ඔප දමා ඉදිරියට ගෙනාවේ දෝනි මිස මතීෂගෙන් ලකුණු දාගන්නට වෙර දරණ අපේ ලෝකල් අයියලා නොවේය.
ඉන්දියානු පිල මෙහෙය වූ නායකයන් අතර දෝනි සුපිරිතමයා විය. ඔහුගේ නායකත්වය යටතේ ඉන්දියාව දිනා නොගත් කුසලානයක් නොමැති තරම් ය. චෙන්නායි පිලේත් සුපිරිතම නායකයා දෝනි ය.
දෝනිගේ විශේෂත්වය නම් කිසි විටෙක පීඩනයක් හිස මතට නොගැනීමයි. හැමවිටම ඔහු සන්සුන් ය.
තරගයේ කුමන අවස්ථාවක වුවත් දෝනි කලබල නොවෙයි. ලෙහෙසියෙන් තරහ නොයයි.
තම පන්දු යවන්නන්ට පිට පිට හයේ පහර ගැසුවත් පන්දු රකින්නන් උඩ පන්දු අත හැරියත් දෝනි දෝනි මය. වෙනසක් නැත.
ඔහුට කැප්ටන් කූල් කියන්නේ එනිසාය.
අර්ජුන රණතුංගත් කලක් කැප්ටන් කූල් ලෙස හැඳින්වුවත් වචනයේ පරිසමාප්ත අර්ථයෙන් කිවහොත් ඒ දෝනි ය.
දෝනි ඉන්දීය පිලට ලෝක ශූරතාව දිනා දීම තෙක් ඔහුගේ ජීවිත කතාව අලලා නිපදවන ලද ” දෝනි- අන් ටෝල්ඩ් ස්ටෝරි” චිත්රපටය මෙන්ම එහි දෝනිගේ චරිතය කදිමට නිරූපනය කළ සුසාන්ට් සින්ග් රාජ්පුට් ද අතිශයින් ජනප්රිය විය.
චෙන්නායි පිල ශූරතාව දිනූ විගස පිටියට පිවිසුණු ක්රීඩකයන්ගේ බිරින්දෑවරු හා ළමුන් අතර දෝනිගේ බිරිඳ හා දුවත් කැපී පෙණින. ඒ ඔවුන්ද දෝනි මෙන්ම චාම්ව හැඳ පැළඳ සිටි සරල අය වීම නිසයි.
අද කාලයේ අපේ රටේ ක්රිකට් ක්රීඩකයන්ටද ඉහළින්ම ආදර්ශයක් ගත හැකි මහේන්ද්ර සිං දෝනි ගේ ජීවිත කතාවේ දෙවෙනි කොටසත් චිත්රපටයකට නැංවීමට මේ කාලයයි.
එහෙත් එහි දෝනිගේ චරිතය නිරූපනය කරන්නට සුසාන්ට් සින්ග් අද ජීවතුන් අතර නැත.
එහෙත් එය දෝනිටම රඟපෑමට හැකි බවට සැකයක් නොමැත.
නිහතමානිත්වයේ හා සරල බවේ ප්රතිමූර්තියක් බඳු කැප්ටන් කූල් දෝනි හෙවත් කිංග් දෝනි කෙනෙකු වන්නට අපේ ක්රීඩකයනුත් උත්සාහ කළ යුතු වන්නේ යම්තම් තරග කිහිපයක් ගසා හිස උදුම්මවාගෙන ඉක්මනින්ම පිටියෙන් අතු ගෑවී යන ක්රීඩකයන් ඕනෑ තරම් අප දැක ඇති නිසාය.
