ශ්රී ලංකාවට එරෙහිව සෙනසුරාදා ඩර්බන් හිදී පැවැති පළමු ටෙස්ට් තරගයෙන් ලකුණු 233ක විශිෂ්ට ජයක් අත්කර ගනිමින් දකුණු අප්රිකාව ලෝක ටෙස්ට් ශූරතා (WTC) ශ්රේණිගත කිරීම්වල දෙවැනි ස්ථානයට පත් වූයේය. මෙම තරගය ආරම්භයට පෙර ඔවුන් සිටියේ ශ්රේණිගත කිරීම්වල 5වැනි තැනය.
ශ්රී ලංකාව ඔවුන්ගේ විදෙස් තරඟාවලියේ පළමු ටෙස්ට් තරඟය විශාල පරතරයකින් පරාජය වීමෙන් පසුව, 2023 -25 ලෝක ටෙස්ට් තරගාවලියේ ප්රසාද ලකුණු සටහනේ 50%ක ප්රසාද ප්රතිශතයක් සමඟින් 5 වන ස්ථානය දක්වා පහත වැටුනි. ශ්රී ලංකා කණ්ඩායම සිටියේ 03 තැනය. ඔවුන් තරගය ආරම්භ කළේ 55.56% ප්රසාද ප්රතිශතයක් සමගය.
ප්රදර්ශනාත්මක තුන් ඉරියව් සංදර්ශනයක් සමඟින්, දකුණු අප්රිකාව ඕස්ට්රේලියාව දෙවන ස්ථානයෙන් ඉවත් කර ලබන වසරේ ලන්ඩන් හිදී WTC අවසන් මහා තරගයට ස්ථානයක් ලබා ගැනීමට සමීප විය. මේ වන විට දකුණු අප්රිකාව 59.26%ක ප්රසාද ලකුණු ප්රතිශතයක් ලබා දෙවැනි ස්ථානය හිමිකරගෙන සිටින අතර ඔවුන් සහභාගී වූ තරග 9 න් 5ක් ජයගෙන තුනක් පරාජය වී ඇත. ඔවුන් තරග 15 කදී ජයග්රහණ 9 ක් සහ පරාජයන් 5 කින් 61.11% ක ප්රසාද ලකුණු ප්රතිශතයක් ලබා ගනිමින් පළමු ස්ථානයේ රැඳී සිටින ඉන්දියාවට වඩා පසුපසින් සිටී.
ඔස්ට්රේලියාවට එරෙහිව පැවැත්වෙන තරග පහකින් සමන්විත ටෙස්ට් තරගාවලියේ පළමු ටෙස්ට් තරගයෙන් ඉන්දියාව ලකුණු 295ක ජයග්රහණයක් අත්කර ගනිමින් නොවැම්බර් 25 වැනිදා අංක 1 ස්ථානය යළි ලබා ගත්තේය. ප්රසාද ලකුණු ප්රතිශතය 61.11%ක් සමඟින් ඉන්දියාව ඉදිරියෙන් සිටින අතර දකුණු අප්රිකාව දෙවැනි ස්ථානයේ සිටී. ඔස්ට්රේලියාව (57.69%) රැගෙන තුන්වැනි ස්ථානයට වැටුනේය. ඒ අතර ලෝක ටෙස්ට් ශූරතාවයේ 2021 ජයග්රාහකයින්වන නවසීලන්තය (54.55%) පළමු පස් දෙනා අතරට පැමිණ සිවු වන ස්ථානයට පැමිණෙද්දී අප 5ට වැටුනේය.
බලාපොරොත්තු සහිතව ගිය දකුණු අප්රිකානු සංචාරය ආරම්භයේ දීම අප ලෝක ටෙස්ට් ශූරතාවයේ වාටියට තල්ලු වී තිබේ. මේ ක්රිකට් ගැහිල්ලෙන්නම් කිසිම පලක් නැති බව මුල් තරගයේ දි සන්නිවේදනය කර ඇත. අවුරුදු හතලිහකටත් වැඩිය ටෙස්ට් ක්රිකට් ගසා වේගපන්දුවට හුරු තණ තීරුවකදී දෙකොණ මූට්ටුවන තැන හදාගන්නට බැරිවීම ඛේදවාචකයක් බව ක්රිකට්වලට ආදරය කිරිම පමණක් සහිත ක්රීඩාවට හිතවත් අපට ගැටලුවකි. පසුගිය එංගලන්ත සංචාරයේ දී වෙනසක් වූ බව සැබෑය. එහෙත් අප ප්රශ්න කරන්නේ ක්රීඩා විලාශයේ අඛන්ඩතාවය ය. මිනිස්සුන්ට ස්වීප් ඇදෙන්නේය. එවැනි ජයග්රහණ ක්රිකට්වලට වැඩක් නැත. පරාද විය හැකිය. එහෙත් පරාජයට තර්කයක් තිබිය යුතුය. රටින් පිටට අඩිය තැබූ වහාම අප අතාර්කික පරාජයන් රැසක ඛේදනීය ගොදුරුය. උත්තරය ඕනෑ මෙතැනටය.
