ආසියානු කුසලාන අවසන් මහා තරගයකට නොතරම්වන තරග රටාවකින් අනතුරුව ශ්රී ලංකා කාන්තා කණ්ඩායම ලකුණු 65 ක් තරම් වූ සොච්චමකට සීමා වී ඇත. කඩුළු 09ක් දැවී ගොස් තිබිණි. ඒ කාසියේ වාසිය ලබාගෙන මුලින් පන්දුවට පහරදීමට තේරීමේ අවසන් ප්රතිඵලය ය.
කණ්ඩායම පන්දු ඕවර 20 ක්රීඩා කළේය. එහෙත් එක් ඕවරය දල ලකුණු ලබා ගැනීමේ වේගය 3.25කි. ක්රීඩා විලාශය අදහා ගත නොහැකි තරම් දුර්වල වීම ගැන සංවාදයක් ඇති කළ යුතුය.
ආරම්භක පිතිකාරිනියන් දෙදෙනාම දුවද්දී දැවී ගියහ. නායක චමරි අතපත්තු දුවද්දී දැවී යන්නේ දෙවැනි ඕවරයේ 4 වැනි පන්දුවේ දිය. අනෙක් පසින් පිතිකරණයේ යෙදුන කඩුළු රකින ක්රීඩිකා අනුෂ්කා සංජීවනී 3 වැනි ඕවරයේ දී දුවද්දී දැවී යනවිට ඇය ලබාගෙන සිටියේ ලකුණු 02කි.
අවසන් පිතිකාර යුගලය හැර කිසිවෙක් වගකීම් සහගත පිතිකරණයක යෙදුනේ නැත. අඩුම තරමින් නොදැවී කඩුල්ලේ ඉන්නට ඔවුහු උත්සාහ කළහ.
කණ්ඩායමේ ඉහළම ලකුණු ලබා ගැනීම ලකුණු 18කි. ඒත් 09 වැන කඩුල්ල සේ පිටියට පැමිණි ඉනෝකා රණවීරය. ඇය පන්දු 22ක දී ලකුණු 18 ලැබුවාය. ඕෂධී රණසිංහ පන්දු 20ක දී ලකුණු 13ක් ලැබුවාය. වෙන කිසිම ක්රීඩිකාවක් ලකුණු 10 සීමාව පසු කළේ නැත.
විශිෂ්ට පන්දු යැවීමක නිරත රේණුකා සිං පන්දු ඕවර 03 යවා ලකුණු 05කට කඩුළු 03ක් බිඳැම්මාය. ස්නෙහ් රානා පන්දු ඕවර 4ක් යවා ලකුණු 13කට කඩුළු 02ක් ලැබුවාය. රාජේෂ්වරී ගයාක්වාඩ් පන්දු ඕවර 04ක් යවා ලකුණු 16කට කඩුළු 02ක් ලැබුවාය.
ඉන්දියාවට ජයග්රාහී ඉලක්කය ඕවර 20 තුළ ලකුණු 66කි.
