ශ්රී ලංකා කණ්ඩායම විශිෂ්ට ජයග්රහණයකය. ඊයේ (09) දඹුල්ල ක්රීඩාංගනය සතුටින් සහ ආඩම්බරයෙන් පිරි ගිය තැනක් වූයේය. පන්දු 6ක් ඉතිරිව තිබියදී කඩුළු හයකින් නවසීලන්ත කණ්ඩායම පරාජය කර තරගාවලියේ පළමු විස්සයි 20 තරගයේ දී ජයග්රහණය වාර්තා කිරීමට අපට හැකි වී ඇත.
පරාජයේ දරාගත නොහැකි වේදනාව, අසාර්ථකත්වය සහ බිඳවැටීම හරහා ඇතිවුන බලාපොරොත්තු රහිත කම්පනය, කුලප්පු වූ කුළු හරකුන් සේ හැසිරෙමින් දකින්නන් කෙරෙහි අප්රසාදය ඇති කළ මුග්ධ හැසිරීම පිරි ක්රීඩක චර්යා සහිත වකවානුව අවසන් වී තිබේ. ටීම් එක වෙනස් වූයේ නැත. කොණ්ඩ කපා කරාබු ගලවා, අයි.ආර්.සී කාරයින් ලෙස හැසිරුණ කණ්ඩායම පොලිම් කර විනය හැදුවා පමණි. යළිත් පෙර පුරුදු ජයග්රහණ සහිත රිද්මයට කණ්ඩායම පැමිණ තිබේ. ක්රීඩා ලෝලීන් ගේ ආදරය කණ්ඩායම වෙත ලැබෙමින් තිබේ. ආපහු ක්රිකට් ලැබීම ගැන ඇතිවන බලාපොරොත්තුව සියල්ලන්ගේම හිත් පුරවා ඇත.
නවසීලන්තය ලංකාවට පැමිණෙන්නේ ටෙස්ට් තරගාවලියකින් අනතුරුව ඉන්දියානු කණ්ඩායමේ අභිමානය වළදමා ඒ මත මල්වඩම් තැන්පත් කිරීමෙන් පසුය. ඒ ජයග්රහණයේ ප්රහර්ෂය ක්රිකට් ඉසව් පිළිබඳ භේදයකින් තොරව නවසීලන්ත ක්රිකට් ආත්මයම පුබුදු කර තිබුණේය. ඔවුන් දඹුල්ලට එන්නේ ඒ ජයග්රාහී මානසිකත්වය සහිතවය. තරගයේ කාසියේ වාසියත් ඔවුන්ගේය. එය තවත් උත්තේජනයකි. එවැනි තත්ත්වයක් තුළ නවසීලන්ත කණ්ඩායම දඹුල්ල ක්රීඩාංගනයේ දී මුලින්ම පන්දුවට පහරදීම තේරුවේය. එය බිහිසුණු තීන්දුවක් බව ශ්රී ලංකා පන්දු යවන්නෝ නවසීලන්ත පිතිකරුවන්ට පෙන්වා දුන්හ. පිටියේ පන්දු රැකීම විශිෂ්ට විය. පන්දු යැවීම බලාපොරොත්තු සහගත විය. නවසීලන්ත මුල් පෙළ කුඩු කර දැමීමට ශ්රි ලංකා පන්දු යවන්නෝ සමත් වූහ.
ආරම්භක පිතිකරු ටිම් රොබින්සන් දැවී යන්නේ ලකුණු 03කට ය. දුනිත් වෙල්ලාලගේ ගේ පන්දුවකට ඔහු පා ඉන්න කුඩු කරගන්නේ සිදුවන්නේ කුමක් දැයි කිසිම අවබෝධයක් රහිතවය. මාර්ක් චැම්ප්මන් ලකුණු 1කි. ග්ලෙන් පිලිප් ලකුණු 13කි. මිචෙල් හායි ලකුණු නැත. කණ්ඩායමේ වැඩිම ලකුණු ලාභීයා මිෂෙල් බ්රැක්වෙල් ලකුණු 27කි. සකාරි ෆොල්කස් ලකුණු 27කි. පන්දු ඕවර 14.4 වෙද්දි නවසීලන්ත කන්ඩායම ලකුණු 86ට කඩුළු 07කි. 08වන කඩුල්ලත් ලකුණු 96ක් වනවිට දැවී ගොස්ය. ඉන් අනතුරුව නවසීලන්ත කණඩායමේ වැදගත්ම කඩුළු සම්බන්ධතාවය ගොඩ නැගිනි. ඒ ඉෂ් සෝධි සහ සකාරි ෆොල්කස් අතරය. ලකුණු 39ක මෙම සම්බන්ධතාවය නවසීලන්තයේ වාර්තා පොත් අතරට එක්වන්නේ ඉතිහාසයේ විස්සයි 20 තරගයකදී 09 වැනි කඩුලුල වෙනුවෙන් වාර්තාකා කළ වැඩිම සම්බන්ධතාවය ලෙසය.
මතීෂ පතිරණගේ “කොහෙදො යන්නේ – කවුදෝ දන්නේ” පන්නයේ පන්දු කීපයක් හැරෙන්නට සෑම පන්දු යවන්නෙක්ම මනරම් පන්දු යැවීමක නිරත වූහ. පන්දු යැවීමේ දී විශිෂ්ට සලකුණ තබන්නේ දුනිත් වෙල්ලාලගේය. ඔහු පන්දු ඕවර 3.3 ක දී ලකුණු 20කට කඩුළු 03කි. නුවන් තුෂාර පන්දු ඕවර 3ක දී ලකුණු 14ට කඩුල්ලක්, වනිඳු හසරංග පන්දු ඕවර 4 තුළ ලකුණු 20ට කඩුළු 2ක්, මතීෂ පතිරණ පන්දු ඕවර 3ක දී ලකුණු 25කට කඩුළු 2ක් සහ මහීෂ් තීක්ෂණ පන්දු ඕවර 4 තුළ ලකුණු 21ට කඩුල්ලක් දවා ගත්තේය. නවසීලන්ත කණ්ඩායම පන්දු ඕවර 20 ක්රීඩා කළේ නැත. ඕවර 19.3 ක දි සියල්ලන් දැවී ඔවුන් ලබා ගන්නේ ලකුණු 135ක් පමණි. එහෙත් තරගයේ අමතර ලකුණු 16කි. ඉන් වැඩිම ප්රමාණය මතීෂ පතිරණගෙනි. මතීෂගේ හතරේ සීමාව ඉක්මවා ගිය වයිඩ් පන්දුවක් නිපන්දුවක් ලෙස ද සලකුණු වූ අවස්ථාවක් තිබිණි. එවැනි පන්දුවකට තවත් වෙන්න දෙයක් නැත. කෙසේ වෙතත් ඔහු කඩුළු 02ක් ලබා ගත්තේය.
ජයග්රහණය හඹා යෑමට පැමිණි ශ්රී ලංකා කණ්ඩායමට ද පිතිකරණය පහසු එකක් වුයේ නැත. දඹුල්ල තණ තීරුවේ හැසිරීම පිළිබඳ බටහිර ඉන්දීය කොදෙව් සංචාරය අතරතුර සිදුවන විවේචනාත්මක වෙනස ඒ අයුරින්ම පැවතෙමින් තිබිණි. එය පිතිකරණයට අභියෝග කරමින් සැලකිය යුතු ලෙස වෙනස් හැසිරීමක් පෙන්වමින් තිබුණේය. අංක 2 පිතිකරු කුසල් මෙණ්ඩිස් දැවී යන්නේ ලකුණු ලබා නොගෙනය. මිචෙල් සැන්ට්නර් ගේ පන්දුවකට ඔහු කඩුල්ල මුවා කිරීමේ වරදට හසුවන්නේය. සකාරි ෆොල්කස්ගේ පන්දුවකට පැතුම් නිශ්ශංකගේ කඩුල්ල කුඩු වී යන විට ඔහු ලකුණු 19කි. භානුක රාජපක්ෂ ලකුණු 04ක් ලබා සිටිය දී ෆොල්කස්ට ගොදුරු වන්නේය. කුසල් පෙරේරා ලකුණු 23කි. කමිඳු මෙන්ඩිස් ලකුණු 23කි. වනිඳු හසරංග ලකුණු 22 කි. තරගයේ වගකීම් සහිත පිතිකරණය නායක චරිත් අසලංකගෙනි. ඔහු ලකුණු 35කි. ඒ පන්දු 28ක දීය. හයේ පහර 2ක් සහ හතරේ පහරක් ඒ ලකුණු 35ට ඇතුළත්ය. වැදගත්ම කාරණාව වන්නේ ජයග්රහණයෙන් තරගය නිමා කරන තුරු ඔහු එක් අන්තයක් රැකගෙන නොදැවී ක්රීඩා කිරීමය. අංක 08 ක්රීඩකයා ලෙස පිටියට පැමිණි දුනිත් වෙල්ලාලගේ ලකුණු 06කින් ජයග්රාහී ලකුණ සලකුණු කළේය. පන්දු ඕවර 19ක් තුළ අප ජයග්රාහී ඉලක්කය පසු කළේය.
මේ තරගයේ දී ශ්රී ලංකා වාර්තා අලුතු වුනේය. එක්දින ජාත්යාන්තර තරගවලදී වැඩිම ලකුණු ප්රමාණයක් රැස් කළ ශ්රී ලංකා ක්රීඩකයා බවට කුසල් පෙරේරා වාර්තා අතරට එක් විය. ඔහු ලකුණු 1904ක් වාර්තා කරමින් තිලකරත්න ඩිල්ෂාන් ලකුණු 1889ක් ලබාගෙන තබා තිබූ වාර්තාව බිඳ හෙලුවේය. ඩිල්ෂාන් මෙම ලකුණු 1889 ලබාගෙන තිබුණේ තරග 80කට ක්රීඩා කරමිනි. කුසල් ජනිත් පෙරේරා එම වාර්තාව බිඳ දමන්නේ තරග 73කට පමණක් ක්රීඩා කරය.
නවසීලන්තය වෙනුවෙන් හොඳම පන්දු යැවීම සකාරි ෆොල්කස් සලකුණු කළේය. ඔහු පන්දු ඕවර 3ක් තුළ ලකුණු 20කට කඩුලු 03කි. මිචෙල් සැන්ට්නර් ලකුණු 30කට කඩුල්ලක්, මිචෙල් බ්රෙක්වෙල් ලකුණු 31කට කඩුල්ලක්, ග්ලෙන් පිලිප්ස් ලකුණු 12කට කඩුල්ලක් ලැබුවේය. විශේෂත්වය වන්නේ නවසීලන්ත කණ්ඩායම මේ පන්දු ඕවර 19 තුළ ලබා දී තිබුණේ අතිරේක ලකුණු 3ක් පමණක් වීමය. අපට ඉදිරි තරගවලදී යම් තීරණාත්මක අභියෝගයක් වනු ඇත්තේ නවසීලන්ත කණ්ඩායමේ මේ පන්දු යැවීමේ විනය විය හැකිය. දැන් අප තරගාවලිය 1-0 ලෙස අප ඉදිරියෙනි. තරගයේ වීරයා ශ්රී ලංකා නායක චරිත් අසලංකය. මේ ජයග්රහණය තරගාවලි ජයග්රහණයක් බවට පත්වනු දැකීම අපේ අපේක්ෂාවය. ජයග්රහණයෙන් කෙලවර වුවද මේ තරගයේ දී අත්හැරුණු තැන් සමාලෝචනය කරගනිමින් ඒ අවසන් ප්රාර්ථනා පිරි ඉලක්කය වෙත ශ්රී ලංකා කණ්ඩායම ගමන් කරන තුරු අපේක්ෂා සහිතව බලාගෙන හිඳිමු.
