ශ්රී ලංකා ඇෆ්ගනිස්ථාන එක්දින තරගාවලියේ අවසන් එක්දින තරගය තව ස්වල්ප වේලාවකින් පල්ලෙකැලේ අන්තර්ජාතික ක්රීඩාංගනයේ දී ආරම්භ වීමට නියමිතව තිබේ. කාසියේ වාසිය දිනූ ඇෆ්ගනිස්ථාන කණ්ඩායම මුලින්ම පන්දුවට පහරදීම තෝරා ඇත. මුල් තරග දෙකේම ජයග්රහණය ලබා ගත්තේ මුලින්ම පන්දුවට පහර දුන් කණ්ඩායම ය.
කුසල් මෙන්ඩිස්ගේ නායකත්වයෙන් යුතුව අවිශ්ක ප්රනාන්දු, පැතුම් නිශ්ශංක, සධීර සමරවික්රම, චරිත් අසලංක, ජනිත් ලියනගේ, දුනිත් වෙල්ලාලගේ, අකිල ධනංජය, අසිත ප්රනාන්දු, ප්රමෝද් මධුෂාන්, සහ ඩිල්ෂාන් මදුශංක අද ශ්රී ලංකා කණ්ඩායම වෙනුවෙන් තරගවදිති.
විස්සයි 20 කණ්ඩායමේ නායක වනිඳු හසරංග සහ මුල් තරග දෙකේ ප්රධාන දඟපන්දු යවන්නා වූ මහීෂ් තීක්ෂණ තරගයෙන් විවේක ගන්වා ඇත. වනිඳු වෙනුවට තුන් ඉරියව් දඟපන්දු යවන්නා දුනිත් වෙල්ලාලගේ සහ මහීෂ් තීක්ෂණ වෙනුවට අඛිල ධනංජය කණ්ඩායමට කැඳවා තිබේ.
හස්මතුල්ලා සහීඩි යටතේ තරග වදින ඇෆ්ගනිස්ථාන කණ්ඩායම රහ්මතුල්ලා ගුර්බාස්, ඊබ්රහීම් සද්රාන්, රහ්මට් ෂා, අස්මතුල්ලා ඕමාර්සායි, මොහොමඩ් නබී, කඩුළු රකින ක්රීඩක ඉක්රාම් අලිඛිල්, ෂාරෆුඩීන් අෂ්රාෆ්, ක්වයිස් අහමඩ්, ෆසාල්හක් ෆාරුකී, සහ ෆරීඩ් අහමඩ් ක්රීඩා කරති. ගුල්බඩීන් නබී වෙනුවට ෂරෆ්ඩීන් අෂ්රාෆ් කණ්ඩායමට කැඳවා තිබේ.
තරගාවලියේ විශිෂ්ඨ ප්රවේශයක් ලබාගෙන සිටින ශ්රි ලංකා කන්ඩායම පසුගිය 09 දා පල්ලේකැලේ දී පැවති පළමු තරගයෙන් ලකුණු 42ක ද, පෙරේදා (11) පැවති දෙවැනි තරගයෙන් ලකුනු 155ක් ලෙස ද ජයග්රහණයන් වාර්තා කරගෙන තරගාවලිය දිනාගෙන සිටී.
“අප අපේ ක්රිකට් ක්රීඩා කළ යුත්තේ කෙසේ ද, එම ක්රීඩාවේ පවත්වාගෙන යන්න උවමනා හොඳ තණතීරු අපට අවශ්යයයි. එමෙන්ම ක්රීඩකයන්ට තම ක්රීඩා සැලැස්ම ශක්තිමත් කරගැනීම සඳහා ක්රීඩක සංචලනයන් අවශ්යයයි. එය සැරින් සැරේ වෙනස්වන මන්දගාමී තණතීරු මේ කටයුත්තට ගැලපෙන්නේ නෑ. මුලින්ම කිව යුත්තේ පල්ලේ කැලේ තණතිරුව විශිෂ්ටයි. මම ඉල්ලුව ෆ්ලැට් විකට් එක ලැබුණා. ඒ ලැබුණ සහයෝගයට බලධාරීන්ට ස්තුතිවන්ත වෙනවා. “ ක්රිස් සිල්වර්වුඩ් පවසා තිබිණි.
ඇෆ්ගනිස්ථානය සමග පැවති අවසන් එක්දින තරග 05න් 04ක් ජයග්රහණය කර ඇත්තේ ශ්රී ලංකා කණ්ඩායමය. පසුගිය වසරේ ජූනි 07වැනි දා හම්බන්තොට අන්තර්ජාතික ක්රීඩාංගනයේ දී ඇෆ්ගනිස්ථානය සමග පැවති තරගයෙන් කඩුළු 09ක ජයග්රහණයක්, ආසියානු කුසලාන තරගාවලියේ දී පසුගිය සැප්තැම්බර් 05 වැනිදා ලාහෝර් ක්රීඩාංගනයේ පැවති තරගයෙන් ලකුණු 02ක ජයග්රහණයක් සහ මේ තරගාවලියේ තරග දෙක සමග මේ ජයග්රහණ 04 ශ්රී ලංකා කණ්ඩායම අත් කරගෙන තිබේ.
ඔක්තොම්බර් මස 30 වැනිදා ආසියානු කුසලාන තරගාවලියේ 30 වැනි තරගය ලෙස පූනේ දී පැවති තරගයේ දී කඩුළු 07ක ජයග්රහණයක් ලබා ගැනීමට ඇෆ්ගනිස්ථාන කණ්ඩායම සමත් විය. ශ්රි ලංකාව හා පැවති අවසන් තරග පහෙන් ඇෆ්ගනිස්ථානය ජයග්රහණය කළ එකම තරගය මෙයය.
මේ තරගාවලියේ මුල් තරග දෙක ජයග්රහණය කරන්නේ මුලින් පන්දුවට පහර දුන් කණ්ඩායම ය. දැන් එම අවස්ථාව ඇෆ්ගනිස්ථානයට ලැබී තිබේ. අද තරගය සම්බන්ධව ඔවුහු බලාපොරොත්තු සහගතව සිටිති.
