ඉඳුනිල් කහටපිටිය –
භාණ්ඩාගාර ලේකම් හර්ෂණ සූරියප්පෙරුම මුදල් කමිටුව ඉදිරියේ පෙනී සිටීමට සූදානම් බව රජයේ ආරංචි මාර්ග පවසයි. ඒ අනුව අද (30) මුදල් කමිටු රැස්වීමට ඔහු සහභාගීවනු ඇති බව එම ආරංචි මාර්ග තහවුරු කරයි.
ඔහු මුදල් කමිටුවේ සභාපති ආචාර්ය හර්ෂ ද සිල්වා වෙත ලිඛිතව දැනුම් දී තිබුණේ මෙම තත්ත්වය සම්බන්ධව පාර්ලිමේන්තුවේ දී සිදුකරන විශේෂ පැහැදිලි කිරීමකින් පසු මැයි මස 05 දා ට පසු දිනයක් මුදල් කමිටුව ඉදිරියේ පෙනී සිටීමට ලබා දෙන ලෙස පමණක් බව ද එම ආරංචි මාර්ග කියයි. මුදල් කමිටුව භාණ්ඩාගාර ලේකම්වරයාගේ ඉල්ලීමට එකඟ නොවූ තත්ත්වයක් තුළ ඔහු අද එම කමිටුව ඉදිරියේ පෙනී සිටීමට තීරණය කර ඇත.
ඊයේ විශේෂ මාධ්ය සාකච්ඡාවක් පවත්වමින් මුදල් කමිටුවේ සභාපති හර්ෂ ද සිල්වා කීවේ මහා භාණ්ඩාගාර ලේකම්වරයා අද (30) දින මුදල් කමිටුව ඉදිරියට පැමිණීමට නොහැකි බවත් එළඹෙන 05 වැනිදාට පසු දිනයක් ලබා දෙන ලෙසත් කළ ඉල්ලීම දැඩිව විවේචනයකරමින් ප්රකාශ කළේ ඔහු මේ ආකාරයට පැන යන හේතුව බරපතල ප්රශ්නාර්ථයක් නිර්මාණය කර ඇති බවය.
ජනමාධ්යයට විවෘත නොවූ මෙම කමිටු රැස්වීම මුදල් කමිටුවේ සාමාජිකයින් සහ නිලධාරීන් අතර පමණක් පැවැත්වීමට සූදානම් කර තිබූ රැස්වීමක් බැවින් ඊට සහභාගී වීම ප්රතික්ෂේප කිරීමට කිසිම සාධාරණ හේතුවක් නැති බවත් මෙතෙක් සිටි කිසිම මහා භාණ්ඩාගාර ලේකම්වරයෙක් මේ ආකාරයෙන් මුදල් කමිටුව මග හැර නොමැති බවත්ය.
ඉතිහාසයේ පළමු වරට පාර්ලිමේන්තු මන්ත්රීවරයෙක් භාණ්ඩාගාර ලේකම් ධූරයට පත් වී සිටින බැවින් වෙන කිසිම ලේකම්වරයෙකුට නැති වගවීමක් පාර්ලිමේන්තුවේම කොටසක් වූ මුදල් කමිටුවේ බලයට ගරු කර ප්රජාතන්ත්රවාදය ආරක්ෂා කිරීමට වත්මන් භාණ්ඩාගාර ලේකම් හර්ෂණ සූරියප්පේරුමට ඇති බවත් ආචාර්ය හර්ෂ ද සිල්වා අවධාරණය කළේය.
මුදල් කමිටුවට ඉදිරියට නොපැමිණීම හරහා නැති ප්රශ්නයක් හර්ෂණ සූරියප්පෙරුම භාණ්ඩාගාර ලේකම්වරයා ඇති කර තිබෙන බව හර්ෂ ද සිල්වා පැවසුවේය.
මේ පිළිබඳව අදහස් දක්වමින් රජයේ ආරංචි මාර්ග පවසන්නේ මුදල් කමිටුව මතුකරන විරෝධයට හිස නමා භාණ්ඩාගාර ලේකම් හර්ෂණ සූරියප්පෙරුම අද (30) මුදල් කමිටුව ඉදිරියට පැමිණ අදාල පැහැදිලි කිරීම කිරීමට සූදානම් බවය. මැයි 05 වැනිදා මේ තත්ත්වය සම්බන්ධව නියෝජ්ය මුදල් ඇමති ආචාර්ය අනිල් ජයන්ත ප්රනාන්දු විසින් පාර්ලිමේන්තුවට පැහැදිලි කිරීමක් කරනු ඇති බවත් එම ආරංචි මාර්ග තහවුරු කරයි.
