දිනසේන රතුගමගේ –
දෙමළ ජාතික සන්ධානයේ දේශපාලනඥයින් විසින් ඊයේ (13) යාපනයේ පවත්වන ලද සාකච්ඡාවක් අතර තුර දෙපිරිසක් අතර ඇති වූ ගුටිබැට හුවමාරුවකින් පසු එක් අයෙකු තුවාල ලබා යාපනය ශීක්ෂණ රෝහලට ඇතුළත් කොට තිබේ.
දෙමළ දේශපාලන පක්ෂ නායකයින් කීප දෙනෙකු ජනාධිපතිවරයා හමු වී කළ සාකච්ඡාවේ තොරතුරු සම්බන්ධයෙන් හා තවත් කාරණා කීපයක් සම්බන්ධයෙන් සාකච්ඡා කිරීමට එම රැස්වීම යාපනයේ මාර්ටින් පාරේ පිහිටි දෙමළ ජාතික සන්ධාන මුලස්ථානයේදී සංවිධානය කොට තිබුණු බව දෙමළ ජාතික සන්ධානයේ ප්රකාශකයෙකු පැවසීය.
සාකච්ඡාව අතරවාරයේ පැන නැගුණු ප්රශ්නයක් නිසා දෙපිරිසක් අතර වචන හුවමාරුවක් සිදුව ඇති අතර ඒ අවස්ථාවේදී යාපනය මහ නගර සභාවේ හිටපු නගරාධිපතිවරයෙකු වූ ආනෝල්ඩ් විසින් දෙමළ ජාතික සන්ධානයේම ක්රියාකාරී දේශපාලනඥයෙකු වූ ශිව සේනා සංවිධානයේ නායක එස්.චෙයමාරන් නැමැත්තාට පහර දී තිබේ.
පහර කෑමෙන් පසුව තුවාල ලැබු ඔහු රෝහල් ගත වී ඇති අතර ඒ සම්බන්ධයෙන් යාපනය පොලීසියටද පැමිණිල්ලක් ඉදිරිපත් කොට තිබේ.
යාපනය මහ නගර සභාවේ හිටපු නගරාධිපතිවරයා ශිව සේනා සංවිධානයේ නායකයාට පහර දී ඇත්තේ මීට පෙර ඒ දෙදෙනා අතර ආගමික කටයුත්තක් සම්බන්ධයෙන් වූ විරසකයකින් පලිගැනීමට බව දෙමළ ජාතික සන්ධානයේ සෙසු පිරිස ප්රකාශ කළ අතර එම පහර දීම කිසිසේත්ම අනුමත කළ නොහැකි බවද ඔවුහු කියා සිටියහ.
