මැදපෙරදිග පවතින යුදමය වාතාවරණය හමුවේ එල්ල වී ඇති බලශක්ති අභියෝග කළමනාකරණය කරමින් රටේ ආර්ථිකය සහ අත්යවශ්ය සේවා අඛණ්ඩව පවත්වාගෙන යාමේ විශේෂ සැලසුම් ක්රියාත්මක කරන බව ජනාධිපති අනුර කුමාර දිසානායක පවසයි.
අද (16) පස්වරුවේ ජනාධිපති කාර්යාලයේදී පැවැති විශේෂ සාකච්ඡාවකදී ජනාධිපතිවරයා මේ බව සඳහන් කළේය. බලශක්ති සැපයුමට එල්ල වී ඇති බාධා හමුවේ ගත යුතු කඩිනම් පියවර පිළිබඳ සොයා බැලීම මෙම සාකච්ඡාවේ ප්රධාන අරමුණ විය.
රාජ්ය සේවයට නිවාඩු දීමේ යෝජනාවක්
බලශක්ති පරිභෝජනය සීමා කිරීම සඳහා රාජ්ය සේවයට එක් දිනක නිවාඩුවක් ලබා දීම හෝ විකල්ප ක්රමවේද අනුගමනය කිරීම පිළිබඳව මෙහිදී දීර්ඝ ලෙස සාකච්ඡා විය. එමෙන්ම සේවා අවශ්යතාව මත නිලධාරීන් කැඳවීමේ තීරණය ආයතන ප්රධානීන්ට පැවරීමටත්, ප්රායෝගික විය හැකි සෑම අවස්ථාවකම ‘නිවසේ සිට රාජකාරි කිරීමේ’ (Work from Home) ක්රමය ක්රියාත්මක කිරීමටත් යෝජනා වී තිබේ.
අත්යවශ්ය සේවා සඳහා විශේෂ අවධානය
අධ්යාපන, සෞඛ්ය, සංචාරක, ධීවර, කර්මාන්ත සහ කෘෂිකර්ම ඇතුළු ක්ෂේත්රයන්හි සේවාවන් අවම බලශක්ති පරිභෝජනයක් සහිතව පවත්වාගෙන යාම පිළිබඳව මෙහිදී වෙන් වෙන් වශයෙන් විමසා බැලුණි. ප්රධාන ක්ෂේත්ර සඳහා ලබා දිය යුතු ඉන්ධන ප්රමාණය තීරණය කිරීම සඳහා අමාත්යාංශ ලේකම්වරුන් සහ විශේෂඥයන්ගෙන් සමන්විත කමිටුවක් පත් කළ අතර, ඔවුන්ගේ වාර්තාව අද දිනය තුළම ලබා දෙන ලෙස ජනාධිපතිවරයා උපදෙස් දුන්නේය.
QR ක්රමය විධිමත් කිරීම
දෛනික ඉන්ධන පරිභෝජනය කළමනාකරණය කිරීම සඳහා QR ක්රමය වඩාත් විධිමත් කිරීමට ද තීරණය විය. ඒ සඳහා අවශ්ය දත්ත කඩිනමින් ඩිජිටල් කටයුතු අමාත්යාංශය වෙත ලබා දෙන ලෙස අදාළ අංශ වෙත දැනුම් දී ඇත. පවතින තත්ත්වය හමුවේ රාජ්ය උත්සව තාවකාලිකව නතර කිරීමට ද මෙහිදී තීරණය කෙරිණි.
මෙම සාකච්ඡාව සඳහා අග්රාමාත්ය ආචාර්ය හරිනි අමරසූරිය, අමාත්ය විජිත හේරත්, වසන්ත සමරසිංහ, වෛද්ය නලින්ද ජයතිස්ස ඇතුළු අමාත්ය මණ්ඩලය සහ රාජ්ය නිලධාරීන් පිරිසක් එක්ව සිටියහ.
