ඉන්ධන සපයා ගැනීමේදී මතුව ඇති ගැටලුකාරී තත්ත්වය සැලකිල්ලට ගෙන ලබන බදාදා (17) සිට සෑම සතියකම බදාදා දිනය රජයේ සේවකයින් සඳහා නිවාඩු දිනයක් ලෙස ප්රකාශයට පත් කිරීමට රජය තීරණය කර තිබේ.
අත්යවශ්ය සේවා කොමසාරිස් ජනරාල් ප්රභාත් චන්ද්රකීර්ති අද (16) රජයේ ප්රවෘත්ති දෙපාර්තමේන්තුවේ පැවැති විශේෂ ප්රවෘත්ති සාකච්ඡාවකදී මේ බව අනාවරණය කළේය.
මෙම නිවාඩුව පාසල්, විශ්වවිද්යාල සහ අධිකරණ ක්ෂේත්රයට ද අදාළ වන අතර සෞඛ්ය, වරාය, ජලය සහ රේගුව වැනි අත්යවශ්ය සේවා සඳහා මෙම සහනය හිමි නොවේ. සතියේ ඉතිරි දින 4 තුළ සේවයට කැඳවිය යුතු සේවකයින් සංඛ්යාව තීරණය කිරීමේ බලය ආයතන ප්රධානීන්ට පවරා ඇත.
පෞද්ගලික අංශය ද මෙම ක්රමවේදය අනුගමනය කරනු ඇතැයි අපේක්ෂා කරන බවත්, ඒ සම්බන්ධයෙන් වාණිජ මණ්ඩලය සහ ලංකා සේවක සම්මේලනයෙන් ඉල්ලීම් කර ඇති බවත් කොමසාරිස් ජනරාල්වරයා පැවසීය. මීට අමතරව සියලු රාජ්ය උත්සව තාවකාලිකව නතර කිරීමටත්, විශ්වවිද්යාල දේශන කටයුතු Zoom තාක්ෂණය ඔස්සේ සිදු කිරීමටත් අවසර දී තිබේ.
රට තුළ ඉන්ධන හිඟයක් නොමැති වුවද, QR ක්රමවේදයේ පවතින ගැටලු නිරාකරණය කරන තෙක් මෙම පියවර ගත් බව හෙතෙම අවධාරණය කළේය. දැනට මාසයකට සරිලන ඉන්ධන පවතින අතර තවත් නෞකා 4ක් මෙරටට පැමිණීමට නියමිතය.
පවතින තත්ත්වය කළමනාකරණය සඳහා අමාත්ය මණ්ඩල තීරණයකට අනුව ප්රධාන කමිටු 4ක් ද පත් කර ඇත:
-
රාජ්ය සේවා කමිටුව: අග්රාමාත්යවරියගේ ප්රධානත්වයෙන්.
-
බලශක්ති කමිටුව: අමාත්ය විජිත හේරත්ගේ ප්රධානත්වයෙන්.
-
අත්යවශ්ය භාණ්ඩ බෙදා හැරීමේ කමිටුව: අමාත්ය බිමල් රත්නායකගේ ප්රධානත්වයෙන්.
-
සුබසාධන කමිටුව: අමාත්ය උපාලි පන්නිලගේ ප්රධානත්වයෙන්
