පුරා වසර 14ක් තිස්සේ වසා දමා ඇති ජාතික කලා භවන මේ වසරේ දෙසැම්බර් මසට පෙර විවෘත කිරීමට ඉලක්ක කර ඇතැයි බුද්ධශාසන, ආගමික සහ සංස්කෘතික කටයුතු අමාත්ය ආචාර්ය හිනිදුම සුනිල් සෙනවි අද පාර්ලිමේන්තුවේ දී පැවසුවේය.
පුරා වසර 14ක් තිස්සේ ජාතික කලා භවන වසා දමා තිබිණි. යළිත් 2020 වසර තුළ කලා භවනේ නැගෙනහිර ගැලරිය විවෘත කර ප්රදර්ශන සඳහා ඉඩකඩ සලසා තිබිණි. නමුත් 2020.12.19 දිනෙන් පසු මුලු කලා භවනම යළිත් වසා දැම්මේය.
මේ පිළිබඳව අද පාර්ලිමේන්තුවේ දී සමගි ජන බලවේග පාර්ලිමේන්තු මන්ත්රි මුජිබර් රහුමාන් ඇසූ ප්රශ්නයකට පිළිතුරු දෙමින් බුද්ධශාසන, ආගමික සහ සංස්කෘතික කටයුතු අමාත්යවරයා පැවසුවේ අලුත්වැඩියා කටයුතු සඳහා ජොන් ද සිල්වා සමරු රඟහලත් වසා දමා ඇති අතර ජාතික කලා භවන සහ ජොන් ද සිල්වා සමරු රඟහල එක්වර විවෘත කිරීමට මේ දක්වා සැලසුම් කර තිබුණු බවය.
ජොන් ද සිල්වා සමරු රඟහලේ අලුත්වැඩියා කටයුතු තවදුරටත් ප්රමාද වන බැවින් කැබිනට් මණ්ඩලය අනුමැතියක් සහිතව මේ වසරේ ජෝන් ද සිල්වා සමරු රඟහල වෙනුවෙන් වෙන් කර තිබූ ප්රතිපාදනවලින් ද කොටසක් ලබා ගෙන මේ වසර අවසන් වන්නට පෙර කලා භවනේ ප්රතිසංස්කරණ කටයුතු නිමා කර විවෘත කිරීමට සැලසුම් වී ඇතැයි ඔහු කීවේය.
මේ සඳහා වැය කර ඇති මුදල රුපියල් මිලියන 163.5ක් බව ද ඇමතිවරයා පැවසුවේය.
කලා භවනේ චිත්ර 42ක සොරකම – විමර්ශන ප්රගතිය
මෙහිදී බුද්ධශාසන, ආගමික සහ සංස්කෘතික කටයුතු අමාත්යවරයාගෙන් කලා භවනේ චිත්ර සොරකම ගැන මුජිබර් රහුමාන් මන්ත්රීවරයා ඇසුවේය. එම ප්රශ්නයට පිළිතුරු දෙමින් කලා භවනේ පෞරාණික චිත්ර 42ක් සොරකම් කර ඇති බව ඇමතිවරයා පිළිගත්තේය.
මෙම සොරකම අනාවරණය වන්නේ 2015 වසරේ දී ජාතික කලා භවනේ චිත්ර සහ මූර්ති පරීක්ෂා කිරීමෙන් අනතුරුව ඉදිරිපත් කළ භාණ්ඩ සමීක්ෂණයේ දී දි බවත් එම වාර්තාව අනුව තොග පොතේ සඳහන්ව ඇති චිත්ර සහ මූර්ති ප්රමාණය 281ක් වුව ද කලා භවනේ භෞතිකව ඇත්තේ චිත්ර සහ මූර්ති 239ක් බව ඇමතිවරයා අනාවරණය කළේය.
“මේ සම්බන්ධව දැනටමත් අරන් තියනවා. මේ සිදුවිම සම්බන්ධයෙන් බුද්ධ ශාසන ආගමික හා සංස්කෘතික කටයුතු අමාත්යාංශයේ ලේකම්වරයා විසින් පත් කරන ලද කමිටුවක් විසින් මූලික විමර්ශනයක් ආරම්භ කර තිබෙනවා. කමිටුව විසින් මේ වනවිට අදාල පාර්ශවයන්ගෙන් සාක්ෂි සටහන් කරගෙන යමින් ඉන්නේ.”
“මේ පිළිබඳව සිදුකරන පොලිස් විමර්ශනවලට අදාලව කොළඹ දකුණ කොට්ඨාස අපරාධ විමර්ශන කාර්යාංශය විසින් වරින් වර සිදුකරන ලද තොරතුරු කැඳවීම්වලට අනුව අවසාන වශයෙන් එම කාර්යාංශයේ DCDB/CS/OTU/760 – 2024 සහ 2025.7.14 දිනැති ලිපියෙන් විමසන ලද කරුණුවලට පිළිතුරු ලෙස මගේ අංක DCA 6105 පොදු ගොනුව හා 2025.08.13 දිනැති ලිපියෙන් මා තොරතුරු ලබා දීලා තියනවා. “ ඇමතිවරයා පැවසුවේය.
