ඉඳුනිල් කහටපිටිය –
භික්ෂූන් වහන්සේලාගේ විදේශගත වීම් සම්බන්ධයෙන් දැනට පවතින රෙගුලාසි දැඩිව බලාත්මක කිරීමට සහ නව රෙගුලාසි හඳුන්වා දීමට රජය තීරණය කර තිබේ. මෑත කාලීනව ශාසනික විනය පිරිහීමට තුඩු දුන් ඇතැම් සිදුවීම් සැලකිල්ලට ගනිමින් ශාසනයේ ගෞරවය රැක ගැනීම මෙහි ප්රධාන අරමුණ වී ඇත.
බුද්ධශාසන, ආගමික සහ සංස්කෘතික කටයුතු නියෝජ්ය අමාත්ය ගමගෙදර දිසානායක මාධ්යයට ප්රකාශ කර තිබුණේ විදේශගත වීමට අපේක්ෂා කරන භික්ෂූන් වහන්සේලා සම්බන්ධයෙන් වන නීති නිසි පරිදි ක්රියාත්මක වන බව අමාත්යාංශය මගින් තහවුරු කරන බවය.
- භික්ෂු විදෙස් ගමන් නියාමනය සහ නීතිමය පසුබිම
පවත්නා රෙගුලාසිවලට අනුව භික්ෂූන් වහන්සේ නමකට විදෙස් ගමන් බලපත්රයක් ලබා ගැනීමට හෝ විදෙස්ගත වීමට නම් අනිවාර්යයෙන්ම බලයලත් පාර්ශ්වයන්ගෙන් ලිඛිත නිර්දේශ (Recommendations) ලබාගත යුතුව තිබේ. ඒ අනුව, තමන් වහන්සේගේ ගුරු ස්වාමීන් වහන්සේ හෙවත් උපදේශක ස්වාමීන් වහන්සේගේ නිර්දේශය, අදාළ ප්රාදේශීය බෞද්ධ නායක හිමියන්ගේ නිර්දේශය සහ තමන් වහන්සේ අයත් වන නිකායේ මහානායක හිමිපාණන් වහන්සේගේ අනුමැතිය යන නිර්දේශ තුනම සම්පූර්ණ විය යුතුය.
මෙම සහතික කිරීම් නොමැතිව භික්ෂූන් වහන්සේලාට විදෙස් ගමන් බලපත්ර නිකුත් නොකිරීමට මීට පෙර තීරණය කර තිබුණද, කාලයත් සමඟ එම නීති රෙගුලාසි ක්රියාත්මක කිරීමේදී යම් ලිහිල් ස්වභාවයක් දක්නට ලැබුණි. මෙම ලිඛිත අනුමැතිය ලබාගැනීමේ ක්රියාවලිය ප්රායෝගිකව අක්රිය මට්ටමක පැවතීම හේතුවෙන්, මෑත වසරවලදී එවැනි විධිමත් පරීක්ෂාවකින් තොරව විදෙස් ගමන් බලපත්ර නිකුත් කිරීමට බලධාරීන් කටයුතු කර තිබේ.
මෑතකදී වාර්තා වූ මෙම මහා පරිමාණ මත්ද්රව්ය ජාවාරම සම්බන්ධ පුවත ශාසනයේ ගෞරවයට සහ නාමයට දැඩි අගතියක් එක් කර ඇති බැවින්, යටපත් ව තිබූ මෙම නීති රෙගුලාසි නැවත දැඩි ලෙස ක්රියාත්මක කිරීමේ අවශ්යතාව මහානායක හිමිවරුන් විසින් අවධාරණය කර ඇත.
මීට පෙර මෙම නීති පැවතියද ඒවා බලාත්මක නොකිරීම හේතුවෙන් විවිධ පුද්ගලයන්ට චීවරධාරීන් ලෙස පෙනී සිටිමින් මෙවැනි අයථා ක්රියාවල නිරත වීමට අවස්ථාව සැලසුණු බව උන්වහන්සේලා පෙන්වා දී තිබුණහ.
- මින් පසු නීතිය බලාත්මක වන හැටි
ඒ අනුව, මින් ඉදිරියට භික්ෂූන් වහන්සේලා විදෙස්ගත වීමේදී මහානායක හිමිවරුන්ගේ නිර්දේශය අනිවාර්ය කිරීමටත්, ඒ සම්බන්ධ නීති රෙගුලාසි දැඩිව ක්රියාත්මක කිරීමට රජයේ පූර්ණ සහාය ලබා දෙන ලෙසත් මහා සංඝරත්නය බලධාරීන්ගෙන් ඉල්ලා සිටියහ. මේ තත්ත්වය තුළ ඉදිරි විදේශ ගමන් සඳහා මෙම ක්රියාපටිපාටිය යළි දැඩිව බලාත්මක කිරීමටත්, වඩාත් කාර්යක්ෂමව ප්රායෝගික කිරීමටත් කඩිනම් සහ ස්ථාවර පියවර ගනිමින් සිටින බව බුද්ධශානස අමාත්යාංශය නිවේදනය කර තිබේ.
මේ සතිය මුලදී නිකාය ලේඛකාධිකාරී හිමිවරුන්, නීතිපතිවරයා සහ බුද්ධශාසන අමාත්යාංශයේ නිලධාරීන් අතර පැවති සාකච්ඡාවල ප්රතිඵලයක් ලෙස විහාර දේවාලගම් පනත සංශෝධනය කිරීමේ යෝජනා කඩිනම් කිරීමට ද පියවර ගෙන ඇත.
