එල්පීඑල් තරගාවලියේ ක්රීඩක වෙන්දේසියේදී ක්රීඩකයන්ට තරග පාවාදීමට යෝජනා කිරීමේ චෝදනාව මත පසුගියදා අත්අඩංගුවට පත්ව රක්ෂිත බන්ධනාගාරගත කර සිටින දඹුල්ල තන්ඩර්ස් පිලේ හිමිකරු වූ බ්රිතාන්ය පුරවැසිභාවය හිමි බංග්ලාදේශ ජාතික ටමීම් රහ්මාන් සමඟ සමීපව කටයුතු කළ බව කියන විදූෂ සිල්වා නමැති තරුණ ව්යාපාරිකයාගෙන් සහ එල්පීඑල් තරගාවලියේ අධ්යක්ෂ සමන්ත දොඩම්වෙලගෙන් ක්රීඩාවේ වැරැදි වැළැක්වීමේ විශේෂ පොලිස් විමර්ශන ඒකකයේ නිලධාරීන් විසින් ඊයේ (28) ප්රශ්න කරනු ලැබීය.
එල්පීඑල් තරගාවලියේ අධ්යක්ෂවරයාගෙන් පැය දෙකකට ආසන්න කාලයක් සහ ව්යාපාරිකයාගෙන් පැය 7කට අධික කාලයක් ප්රශ්න කර තිබේ. අදාළ සිදුවීම සම්බන්ධව ප්රශ්න කිරීමට ඊයේ උදෑසන 9.00ට පමණ පැමිණි එම ව්යාපාරිකයා විමර්ශන ඒකකයෙන් පිටව ගොස් ඇත්තේ පස්වරු 4.30ට පමණය.
එල්පීඑල් තරගාවලියේ අධ්යක්ෂවරයා සහ ව්යාපාරිකයා ඊයේ විශේෂ විමර්ශන ඒකකයට පැමිණ ඇත්තේ සිය නීතිඥවරුන් සමඟ බවත් තරග පාවාදීමේ කුමන්ත්රණයට අදාළව ඉහත කී දෙදෙනාගේ මූලික ප්රශ්න කිරීම් ඊයේ අවසන් වූවද අවශ්යතාව මත නැවත කැඳවීමට වැරදි වැළැක්වීමේ විශේෂ පොලිස් විමර්ශන ඒකකය පියවර ගනු ඇති බවත් වැඩිදුරටත් වාර්තා වේ.
සමාජ මාධ්ය ජාල සම්බන්ධ සමාගමක හිමිකරුවකු බව කියන විදූෂ සිල්වා නමැති පුද්ගලයා පසුගිය වසරේ එල්පීඑල් තරගාවලියේදී ‘ගෝල් ටයිටන්ස්‘ පිල සමඟ ද කටයුතු කර ඇතැයි වාර්තා වන අතර, ඔහු මෙවර දඹුල්ල කණ්ඩායම සමඟ සිදු කිරීමට නියමිත කාර්ය කවරේදැයි යන්න විමර්ශන නිලධාරීන්ගේ ප්රශ්න කිරීම්වලට ලක්වී ඇතැයි වාර්තා වේ.
එමෙන්ම ඔහු පසුගියදා පැවැති ක්රීඩකයන්ගේ වෙන්දේසියේදී එල්පීඑල් තරගාවලියේ හිමිකාරීත්වය දරන ඩුබායි නුවර කේන්ද්ර කරගත් අයිපීජී සමාගමේ නිලධාරීන් සිටි ස්ථානයේ ගැවසෙන අයුරු සමාජ මාධ්ය ජාලයේ සජීවීව විකාශය වූ අතර, ඒ පිළිබඳ ඔහුගෙන් වැඩිදුරටත් ප්රශ්න කර ඇතැයි ද සඳහන් වේ.
අදාළ ව්යාපාරිකයා එල්පීඑල් තරගාවලියට සම්බන්ධව කටයුතු කිරීමේ අභිලාෂය පිළිබඳ විමර්ශන නිලධාරීන්ගේ ප්රශ්න කිරීමට ලක්වන්නට ඇතැයි ද තරග පාවාදීමේ කුමන්ත්රණයට සම්බන්ධ තවත් පුද්ගලයන් කිහිපදෙනකු පිළිබඳ එම ව්යාපාරිකයාගෙන් තොරතුරු හෙළිවන්නට ඇතැයි ද ක්රීඩාවට සම්බන්ධ විශ්වාස කටයුතු ආරංචි මාර්ග සඳහන් කළේය.
එම තොරතුරු මත ඉදිරියේදී එල්පීඑල් තරග පාවාදීමේ කුමන්ත්රණයට සම්බන්ධ තවත් පුද්ගලයන් කිහිපදෙනකු ක්රීඩාවේ වැරැදි වැළැක්වීමේ විශේෂ පොලිස් විමර්ශන ඒකකයේ නිලධාරීන් ප්රශ්න කරනු ඇතැයි ද එම ආරංචි මාර්ග වැඩිදුරටත් වාර්තා වේ. – දිනමිණ
