මේ වනවිට ක්රිකට් ලෝකයම අවුරුදු 14ක පුංචි එකෙක් ගැන කතා කරමින්ය. තවම දැළි රැවුලවත් මෝදු නොවනු මේ පොඩි එකා ලෝකයේ ක්රිකට් දැවැන්තයින්ට වඩාගෙන පහර දුන්නේය. පන්දු 38ක දී ලකුණු 101කි.
ලෝකයේ ජනප්රියම ක්රිකට් සැනකෙළිය වූ IPL හි 2025 සංස්කරණය ලෝකයට අමතක නොවන මතකයක් කළ මේ පොඩි එකා වෙයිභව් සූර්යවංශී ය.
අද ජායිපූර්හිදී ගුජරාට් ටයිටන්ස් කණ්ඩායම සහ රාජාස්ථාන් රෝයලස් කණ්ඩායම අතර තරගය පැවැත්විනි. කාසියේ වාසිය දිනුවේ රාජස්ථාන් රෝයල්ස් කණ්ඩායමේ රියාන් පරාග්ය. ඔවුහු පන්දු රැකීම තේරූහ.
ඔවුන්ට ප්රතිවාදී ගුජරාට් ටයිටන්ස් කණ්ඩායම ලෝ ප්රකට ක්රිකට් දැවැන්තයින්ගේ කඳවුරක් වැනිය. එම කණ්ඩායම ශුබ්මන් ගිල්, ජොස් බට්ලර්, වොෂින්ටන් සුන්දර්, රෂීඩ් ඛාන්, මොහොමඩ් ශිරාජ්, වැනි ක්රීඩකයින් මෙන්ම මෙතෙක් මේ තරගාවලිය වර්ණවත් කළ සායි සුදර්ශන් වැනි තරුණයෝ ද බළමුලු බැඳගත් තැනකි. එම බලය ප්රකට කරමින් ගුජරාට් ටයිටන්ස් කණ්ඩායම පන්දු ඕවර 20 තුළ කඩුළු 04කට ලකුණු 209ක් ලැබූහ. නායක ශුබ්මන් ගිල් පන්දු 50ක දී ලකුණු 84කි. ජොස් බට්ලර් පන්දු 26ක දී ලකුණු 50කි. සායි දුර්ශන් පන්දු 30ක දී ලකුණු 39කි.
IPL නොවේ නම් විස්සයි 20 තරගයක දී ලකුණු 209ක් යනු හීනයක් තරම් දුරකි. ලකුණු 210ක ඉලක්කයක් සොයාගෙන රාජස්ථාන් රෝයල්ස් කණ්ඩායමේ ආරම්භක පිතිකරුවන් දෙදෙනා එන්නේය. එකෙක් ලෝකයම දන්නා දළකාර තරුණයා ඉන්දීය ජාතික කණ්ඩායමේ ආරම්භක පිතිකරුගේ වගකීම ඉටු කරන 23 හැවිරිදි යශස්වී ජයිස්වාල්ය. අනෙක් අන්තයෙන් තවම කටේ කිරි සුවඳ නොගිය ක්රිකට් ලෝකයේ කුතුහලය දිනා ගත් 14 හැවිරිදි පොඩි එකා වෙයිභව් සූර්යවංශී ය.
ඒ තරුණයින්ගේ පිතිකරණය අප විශ්වාස කරන පරිදි ක්රිකට් ලෝකය මවිත කළේය. 14 හැවිරිදි සූර්යවංශී අප දැක්කේ මහා පතාක යෝධයෙක් ලෙසය. මේ පොඩි එකා අද IPL ඉතිහාසය වෙනස් කළේය. ඔහු අද ශතකයක් වාර්තා කළේය. ඒ පන්දු 35කිනි. පන්දු 35කින් ශතකයක් ලබා ගත් මේ 14 වියැති පොඩි එකා වාර්තා කලේ IPL ඉතිහාසයේ දෙවන වේගවත්ම ශතකය ය. සූර්යවංශි ලෝකයේ පිරිමි T20 ක්රිකට් ක්රීඩාවේ ශතකයක් රැස් කළ ලාබාලතම ක්රීඩකයා බවට පත්විය.
ඔහුගේ ලකුණු 101ට හයේ පහර 11කි. හතරේ පහර 07කි. IPL ඉතිහාසයේ රාජස්ථාන් රෝයල්ස් කණ්ඩායම වෙනුවෙන් ඉනිමකදී වැඩිම හයේ පහර ප්රමාණයක් එල්ල කළ ක්රීඩකයා සූර්යවංශීය. එමෙන්ම වෙයිභව් සූර්යවංශී ය සහ යශස්වී ජයිස්වාල් අතර පළමු කඩුල්ල සඳහා ගොඩනැගෙන සම්බන්ධතාවය ලකුණු 166කි. මේ සම්බන්ධතාව රාජස්ථාන් රෝයල්ස් කණ්ඩායමේ ඉතිහාසය තුළ ඕනෑම කඩුල්ලක් වෙනුවෙන් රැස් කළ වැඩම ලකුණු ප්රමාණය ය.
ඒ සියල්ලසේම 2025 ක IPL තරගාවලිය සඳහා සූර්යවංශී මිලදී ගන්නේ ඉන්දීය කෝටි 1.1කට ය. ඔහු IPL ඉතිහාසයේ කණ්ඩායමක් විසින් මිලදී ගත් ලාබාලම ක්රීඩකයා ය.
වෙයිභව් සූර්යවංශී දැනටමත් ඉන්දියානු 19න් පහළ කණ්ඩායම නියෝජනය කරන්නේය. වෙයිබව් ඕස්ට්රේලියාවේ 19න් පහළ කණ්ඩායමට එරෙහිව දින හතරක තරගයකදී පන්දු 58 කින් ශතකයක් රැස් කර තිබුණි. ඔහු 2024 දී ACC 19න් පහළ ආසියානු කුසලාන තරගාවලියේ අවසන් මහා තරගයට පිවිසි කණ්ඩායමේ සාමාජිකයෙකු ද වූ අතර එහිදී ඔහු ලකුණු 176ක් රැස් කළේ සාමාන්ය 44ක් ලෙසයි.
බිහාර්හි පැවති 19න් පහළ තරගාවලියක් වන රන්ධීර් වර්මා තරගාවලියේදී සූර්යවංශි නොදැවී ලකුණු 332ක් ලබා ගනිමින් ත්රිත්ව ශතකයක් ලබා ගත්තේය.
ලකුණු 209ක ඉලක්කයක් රාජස්ථාන් රෝයලස් කණ්ඩායම ලබා ගන්නේ ලකුණු 15ක් තුළය. වෙයිභව් සූර්යවංශී ඒ මහා මෙහෙයුමේ ගෞරවනීය අනාගත සංකේතය ය. ඔහු පන්දු 35ක දී ලබා ගත් ශතකය මේ මහා ගමනට අත්තිවාරමක් වූයේය. තරගයේ වීරයා සූර්යවංශී ය.
