රවිශාන් ප්රනාන්දු –
-
අධිකරණය ඉදිරියේ සාධාරණ සැකයකින් ඔබ්බට ඔප්පු කිරීමකින් තොරව වුව ද එම දේපළ රාජසන්තක කිරීමට මෙම නව නීතිවලින් බලය ඇති බව අධිකරණ ඇමති කියයි1
මෙරට හෝ විදේශ රටවල තැන්පත් කර ඇති බව කියන සොරකම් සහ වංචාවලින් උපයා ගත් දේපළ ආපසු රජයට අත්පත් කර ගැනීමේ නීති රීති කඩිනමින් බලාත්මක කිරීමට රජයට සිදුව ඇති බව අනාවරණය වේ.
ජාත්යන්තර මූල්ය අරමුදල සමග ඇති කරගෙන තිබෙන එකඟතාවන්ට අනුව මේ වනවිටත් එම නීති සැකසුම ප්රමාද වී ඇති අතර එම කටයුතු කඩිනම් කරන ලෙස අධිකරණ අමාත්යංශයට දැනුම් දී ඇතැයි මෙම ආරංචිමාර්ග අනාවරණය කර තිබේ.
මෙම පනත පසුගිය අප්රේල් මාසය වනවිට බලාත්මක කිරීමට රජය පොරොන්දු වී තිබුණ ද මෙතෙක් එම කටයුතු සිදුව නැති අතර ඒ අනුව කටයුතු කඩිනම් කරන ලෙස දැනුම් දී ඇති බව සඳහන් වේ.
මේ පිළිබඳව අධිකරණ අමාත්ය විජයදාස රාජපක්ෂගෙන් කළ විමසීමකදී ඔහු සඳහන් කළේ, අධිකරණය ඉදිරියේ සාධාරණ සැකයකින් ඔබ්බට ඔප්පු කිරීමකින් තොරව වුව ද එම දේපළ රාජසන්තක කිරීමට මෙම නව නීතිවලින් බලය ලැබෙන බව ය.
මේ වනවිට පිටු 182කින් සමන්විත ඊට අදාළ නීති කෙටුම්පත මේ සම්බන්ධයෙන් පත් කරන ලද කමිටුවක් විසින් සකසා ඇති අතර විදේශගතව පවතින මෙරටින් කොල්ලකන ලද වස්තුව සහ ධනය ආපසු ලබාගැනීමට අදාළව එක් එක් රටවල් සමග ක්රියා කිරීම පහසු කරවීමට අදාළව එක්සත් ජාතීන්ගේ අපරාධ සහ මත්ද්රව්ය පිළිබඳව කාර්යාලය සමග ඉදිරියේදී ගිවිසුමකට එළැඹෙන බව ද ඔහු සඳහන් කළේ ය.
එහිදී ඔහු මෙසේ ද කීය.
“අයුතු ලෙස උපයාගත් දේපළ ගණන් බැලීමේ ක්රමවේදයක් දැනට නෑ. ඊට යෝග්ය නීතියක් දැනට නැති නිසා කවුරුවත් ඒ ගැන පැමිණිලි කරන්නෙත් නෑ. පරීක්ෂණ කරන්නත් බලයක් නෑ. අලුත් නීතියෙන් මේ ගැන තොරතුරු දැනගැනීමට හා ක්රියා කිරීමට රාජ්ය ආයතනවලට හා ජනතාවට බලය ලැබෙනවා. දැනට ඊට කැබිනට් අනුමැතිය ලබාගෙන තිබෙනවා. නීති කෙටුම්පත් සම්පාදකට යවලා තිබෙනවා. නීතිපතිගේ අනුමැතිය මත ලබන මාසේ එය ඉදිරිපත් කරනවා. ඉන්පසු දේශීය පරීක්ෂණ කතාවක් ඕනෑ නෑ. තොරතුරක් ලැබුණොත් අධිකරණයෙන් නඩු විභාගයක් කළ හැකියි.” – ඉරිදා මව්බිම –
