ලලිත් චාමින්ද –
ගාල්ල දුම්රිය ස්ථානයේ කළු පාලම අසල ගාල් කර තිබූ, භාවිතයෙන් ඉවත් කරන ලද දුම්රිය මැදිරි දෙකක් සම්පූර්ණයෙන් ගිනිබත් කරමින් ඊයේ (31) රාත්රියේ ඇති වූ ගින්න සම්බන්ධව විශේෂ පොලිස් විමර්ශනයක් ආරම්භ කර තිබේ.
වසර 15කට පමණ පෙර භාවිතයෙන් ඉවත් කරන ලද දුම්රිය මැදිරි 05ක් මෙම ස්ථානයේ ගාල් කර තිබී ඇත. මෙම මැදිරි පද්ධතිය එම ස්ථානයෙන් ඉවත් කරන ලෙස ගාල්ල දුම්රිය ස්ථාන බලධාරීන් විසින් අදාළ අංශ වෙත ලිඛිතව දැනුම් දී තිබියදී මෙම ගින්න හටගෙන තිබිණි.
කළු පාලම අසල ගාල් කර තිබූ මෙම මැදිරි තුළ විවිධ සමාජ විරෝධී ක්රියා සිදුවන බවට මීට පෙර තොරතුරු අනාවරණය වූයේය. මෙම ගින්න කිසිවෙකු විසින් සිතාමතා ඇති කළ එකක්ද නැතහොත් වෙනත් හේතුවක් මත හටගත්තක්ද යන්න පිළිබඳව ගාල්ල පොලිසිය විශේෂ විමර්ශනයක් ආරම්භ කර ඇත.
පොලිස් සොකෝ (SOCO) නිලධාරීන් ඇතුළු කණ්ඩායමක් මේ වන විටත් පරීක්ෂණ පවත්වන අතර, රජයේ රස පරීක්ෂක වාර්තාව ලැබීමෙන් පසු ගින්නට නිශ්චිත හේතුව අනාවරණය කරගත හැකි බව පොලිසිය සඳහන් කරයි.
ගාල්ල මහ නගර සභාවේ ගින් නිවන ඒකකය සහ පොලිසිය එක්ව ගින්න මැඩපැවැත්වීමට කටයුතු කර තිබේ.
ගාල්ල පොලිසිය මේ පිළිබඳ වැඩිදුර විමර්ශන මෙහෙයවනු ලබයි.
මේ ලිපියත් බලන්න…
සම බරව ඇත්ත කියන ලංකාසර පුවත් ඔබට සෑම විටෙක දැකීමට ඕනෑ නම් පහත අපේ වට්ස්ඇප් / ටෙලිග්රෑම් සමූහයන්ට එක්වෙන්න.
ගාල්ල දුම්රිය ස්ථානයේ ගාල් කර තිබූ මැදිරි දෙකක් ගින්නෙන් විනාශයි! ( වීඩියෝ සහිතයි)
