ශ්රියානි විජේසිංහ –
ආසියානු සංවර්ධන බැංකුවේ ණය අධාර මගින් පිළිකා ප්රතිකාර සදහා අත්යාවශ්ය යන්ත්රයන් වන ලීනියර් ඇක්සලරේට විකිරණ ප්රතිකාර යන්ත්ර සහ බ්රැකිතෙරපි යන්ත්ර මිලදී ගැනීම සෞඛ්ය අමාත්යාංශයේ සමහර නිලධාරීන් ප්රමාද කිරීම හේතුවෙන් පිළිකා රෝගීන් අසරණ වී ඇතැයි රෝහල් ආරංචි මාර්ග සඳහන් කරයි.
මේ වන විට ආසියානු සංවර්ධන බැංකුවේ ණය ආධාර යටතේ මහරගම අපේක්ෂා රෝහලට සහ ගාල්ල ජාතික රෝහලේ පිළිකා ප්රතිකාර ඒකකයන් සඳහා ඇමරිකානු ඩොලර් මිලියන 8 ක මුදලක් වෙන් කර ඇතත් යන්ත්ර මිලදී ගැනීමට අවශ්ය කටයුතු ප්රමාද කිරීම හේතුවෙන් එම මුදල නොලැබී යාමට ආසන්න බව ආරංචි මාර්ග පවසයි.
මෙම ආසියානු සංවර්ධන බැංකුවේ ආධාර යටතේ මෙම රෝහල්වලට අමතරව තවත් පිළිකා ප්රතිකාර ඒකක පහක් සඳහා සී.ටී යන්ත මිලදී ගැනීමටද සියලු කටයුතු ආරම්භ කළත් සෞඛ්ය අමාත්යාංශයේ සමහර නිලධාරීන්ගේ කටයුතු හේතුවෙන් දිගින් දිගටම ප්රමාද වෙමින් පවතින බව වාර්තා වේ.
මෙම වසරේ දෙසැම්බර් 31 වෙනිදාට පෙර මෙම යන්ත්ර මිලදී ගැනීමට අදාල තාක්ෂණික ඇගයීම් කටයුතු අවසන් කොට ණයවර ලිපි නිකුත් කිරීම සිදුකළ යුතු වුවත් මේ වනතුරුත් එහි තාක්ෂණික ඇගයීම් කටයුතු සම්පූර්ණ කිරීමට නොහැකි වී ඇත. මේ ආකාරයෙන් ප්රමාද වීම නිසා මෙම යන්ත්ර මිලදී ගැනීමේ කටයුතු මෙම වසර තුළදී ද සිදුකළ නොහැකි වනු ඇති බව අදාළ ආරංචි මාර්ග තහවුරු කරයි.
මේ වන විට අපේක්ෂා රෝහලෙහි විකිරණ ප්රතිකාර ලබා ගැනීම සඳහා පිළිකා රෝගීන්ට මාස 5ක කාලයක් පොරොත්තු ලේඛනගතව බලා සිටිය යුතු අතර එම රෝහලේ ලීනියර් ඇක්සලරේට යන්ත්ර 5 න් මේ වන විට ක්රියාත්මක තත්ත්වයේ පවතින්නේ යන්ත්ර 4ක් පමණි.
එමෙන්ම ගාල්ල ජාතික රෝහලේ දැනට පවතින්නේ එක් විකිරණ ප්රතිකාර යන්ත්රයක් පමණක් වන අතර එම රෝහලෙහි පොරොත්තු ලේඛනය මේ වනවිට මාස 4 කට වඩා දිගු වී ඇත.
නව රජය පත්වීමෙන් අනතුරුව රෝහල්වල පහසුකම් දියුණු කිරීම සහ පිළිකා රෝගීන්ගේ ප්රතිකාර කටයුතු කාර්යක්ෂම කිරීම සඳහා උපරිම උත්සාහයක් දරන මෙවැනි මොහොතක සෞඛ්ය අමාත්යාංශයේ සමහර නිලධාරීන්ගේ හැසිරීම හේතුවෙන් රජය ගෙනයන වැඩ පිළිවෙළ අසාර්ථක වීමට හේතු වී ඇතැයි සෞඛ්ය ආරංචි මාර්ග හෙළිදරවු කරයි.
මෙවැනි නිලධාරීන් සම්බන්ධයෙන් සොයා බලා කඩිනම් පියවර ගැනීම සෞඛ්ය අමාත්යවරයා සහ සෞඛ්ය ලේකම්වරයා සතු වගකීමක් බව ද එම ආරංචි මාර්ග පෙන්වා දෙයි.
