සිනමන් ලයිෆ් නිවාස සංකීර්ණයේ සුඛෝපභෝගී නිවසක් සම්බන්ධවයෙන් තමන් සම්බන්ධව ප්රවෘත්තියක් නිර්මාණය කර ඇති බවත්, එම ද්වේශ සහගත සහ අසත්ය ප්රකාශය සම්බන්ධව සහ ඒ මත පිහිටා කරන ප්රචාරයන් සම්බන්ධව අපරාධ පරීක්ෂණ දෙපාර්තමේන්තුවට පැමිණිල්ලක් සිදුකළ බවත් මහජන ආරක්ෂාව පිළිබඳ නියෝජ්ය ඇමති සුනිල් වටගල පවසයි.
සිය ෆේස් බුක් ගිනුමේ සටහනක් තබමින් ඔහු ප්රකාශ කරන්නේ අදාළ ප්රකාශය නිර්මාණය කළ හා සමාජ මාධ්ය හරහා එය ප්රචාරය කළ පාර්ශවයන්ට එරෙහිව සිවිල් හා අපරාධ නීතීය යටතේ නඩු පැවරීමට කටයුතු කරන බවය.
කොළඹ අති සුඛෝපභෝගී නිවාස සංකීර්ණය වන සිනමන් ලයිෆ් නිවාස සංකීර්ණයක නිවසක් මහජන ආරක්ෂක නියෝජ්ය අමාත්ය සුනිල් වටගල මිලදීගෙන ඇති බවට මේ දිනවල සමාජ මාධ්ය ඔස්සේ ප්රචාරය වීමත් සමග ඊට පිළිතුරු දෙමින් නියෝජ්ය ඇමතිවරයා මේ සටහන සිය ෆේස් බුක් ගිනුමේ තබා ඇත.
එම ප්රචාරයේ කිසිදු සත්යතාවක් නොමැති අතර පක්ෂය ද මහජනතාව ද තමා කෙරෙහි තබා ඇති විශ්වාසයට අබමල් රේණුවකින් හානියක් සිදුවන කටයුත්තක් තමා විසින් සිදුකර නොමැති බවද ඔහු සහතික වී තිබේ.
නීතීඥවරයෙකු ලෙස ද දේශපාලන ක්රියාකාරිකයෙකු ලෙසද අදහස් ප්රකාශ කිරීමේ නිදහස වෙනුවෙන් තමා අඛණ්ඩව කොන්දේසි විරහිතව පෙනී සිටින අතර, එම නිදහස දුෂ්ඨ ලෙස අවභාවිතා කිරීමට එය දිනාගැනීමට අනේකවිධ කැපකිරීම් සිදුකළ සියලු ශ්රේෂ්ඨ මිනිසුන්ට කෙරෙන අවමානයක් බවද නියෝජ්ය අමාත්ය සුනිල් වටගල පෙන්වා දී තිබේ.
අදාළ ද්වේශ සහගත සහ අසත්ය ප්රචාරය සම්බන්ධයෙන් හඳුනාගනු ලබන පාර්ශවයන්ට එරෙහිව සිවිල් නීතිය යටතේ වන්දි අයකර ගැනීමට කටයුතු කරන බව ද නියෝජ්ය අමාත්යවරයා සහතික වෙයි.
