හිටපු ජනාධිපති රනිල් වික්රමසිංහ රජයේ මුදල් යොදාගෙන සිදුකළ විදේශ සංචාරයක් මුල් කරගනෙ සිදුකරන විමර්ශනයකට අදාලව ඔහුගේ පුද්ගලික ලේකම්වරියක වූ සැන්ඩ්රා පෙරේරාගෙන් අපරාධ පරීක්ෂණ දෙපාර්තමේන්තුව අද ( 04) පැය හයකට ආසන්න කාලයක් ප්රකාශ ලබා ගත්තේය.
සැන්ඩ්රා පෙරේරා අද උදෑසන 9ට පමණ අපරාධ පරීක්ෂණ දෙපාර්තමේන්තුවට පැමිණෙන්නේ අපරාධ පරික්ෂණ දෙපාර්තමේන්තුවේ මූල්ය විමර්ශන අංශ අංක 03 සිදුකළ කැඳවීමකට අනුවය. 2023 සැප්තැම්බර් 13 සහ 24 දක්වා කාලය තුළ හිටපු ජනාධිපතිවරයා විසින් සිදුකර ඇති විදේශ සංචාරයන්ට අදාල තොරතුරු ද රැගෙන එන ලෙස ඇයට අපරාධ පරීක්ෂණ දෙපාර්තමේන්තුව දැනුම් දී තිබිණි.
සැන්ඩ්රා පෙරේරාගෙන් පැය 06කට ආසන්න කාලයක් ප්රකාශ ලබා ගැනීමෙන් පසුව ඇය පස්වරු 3ට පමණ අපරාධ පරික්ෂණ දෙපාර්තමේන්තුවෙන් පිටව ගියේය.
මෙම විමර්ශනය සඳහා හිටපු ජනාධිපති ලේකම් සමන් ඒකනායක ද හෙට (05) පෙරවරුවේ අපරාධ පරීක්ෂණ දෙපාර්තමේන්තුව වෙත කැඳවා තිබේ.
හිටපු ජනාධිපති රනිල් වික්රමසිංහ රජයේ මුදල් යොදාගෙන සිදුකර ඇති පෞද්ගලික විදේශ සංචාරයක් සම්බන්ධයෙන් විශේෂ විමර්ශනයක් ආරම්භ කළ බව බී වාර්තාවක් මගින් කොටුව මහේස්ත්රාත් අධිකරණයට අපරාධ පරීක්ෂණ දෙපාර්තමේන්තුව දැනුම් දෙන්නේ පසුගිය ජුනි මාසයේ අවසන් සතියේදී ය.
එම බී වාර්තාවේ දැක්වෙන්නේ රජයේ මුදලින් රුපියල් එක් කෝටි හැට අට ලක්ෂයක් වියදම් කර හිටපු ජනාධිපතිවරයා සිය බිරියගේ උපාධි ප්රධානෝත්සවයක් සඳහා එංගලන්තයට ගොස් ඇති බවය. 2023 වර්ෂයේ සැප්තැම්බර් 22 සහ 23 දිනවල මෙම සංචාරය සිදුකර තිබිණි. හිටපු ජනාධිපතිවරයා සමග 10 දෙනෙක් මේ සංචාරයට එක් වී ඇත.
සම බරව ඇත්ත කියන ලංකාසර පුවත් ඔබට සෑම විටෙක දැකීමට ඕනෑ නම් පහත අපේ වට්ස්ඇප් / ටෙලිග්රෑම් සමූහයන්ට එක්වෙන්න.
ජනාධිපතිවරයා කියුබාවේ සහ ඇමරිකාවේ සංචාරයක නිරත වෙමින් ඇමරිකාවේ සිට එංගලන්තයට පැමිණ පෞද්ගලික සංචාරය සිදුකර ඇතැයි පොලිසිය අධිකරණයට දැනුම් දී තිබිණි.
