ශ්රී ලංකා නිදහස් පක්ෂයේ යැයි කියා ගන්නා ආණ්ඩුවේ කණ්ඩායම විසින් කැඳවා ඇති නීති විරෝධී විධායක සභාවට සහභාගි නොවන ලෙස ඊට සහභාගි විය හැකි සියලු දෙනාගෙන් තමන් ඉල්ලා සිටින බව ශ්රි ලංකා නිදහස් පක්ෂයේ ජ්යෙෂ්ඨ උප සභාපති මහාචාර්ය රෝහණ ලක්ෂ්මන් පියදාස පැවසුවේය.
අද නුවර පැවති මාධ්ය හමුවක් අමතමින් ඔහු පැවසුවේ ආණ්ඩුවේ කණ්ඩායමක් ශ්රි ලංකා නිදහස් පක්ෂය යැයි පවසමින් හෙට කැදවන විධායක සභාව සපුරා අනිතික බවය.
මහාචාර්ය රෝහණ ලක්ෂ්මන් පියදාස මෙසේ ද පැවසුවේය.
“ශ්රී ලංකා නිදහස් පක්ෂයේ හෙට පැවැත්වෙනවා යැයි කියන විධායක සභාවක් පිළිබඳව තොරතුරු නිවේදන මේ වනවිට අනීතිකව ආණ්ඩුවට සම්බන්ධ මැති ඇමැතිවරු පිරිසක් සංවිධායකවරුන්ට දැනුම් දී තිබෙනවා. ලිපි, දුරකතන හා වට්ස් ඇප් ඔස්සේ මේ පණිවිඩ ලබා දෙමින් විධායක සභාවට එන්න කියලා මේ අය බලපෑම් කරනවා. විධායක සභාව පක්ෂයේ ප්රධාන නිල සංවිධාන වලින් එකක්. විධායක සභාවට සෑම සංවිධායකවරයෙකුටම සහභාගි වීමේ අවකාශය තිබෙනවා. නායකතුමා විසින් පත් කරන විශේෂිත කණ්ඩායමකටත් ඒකට සහභාගි වීමේ හැකියාව තිබෙනවා. ”
“රජයට සම්බන්ධ ඇමැතිවරු හෙට කැඳවා තිබෙන රැස්වීම සම්පූර්ණයෙන්ම අනීතිකයි. ඒක ආචාර ධර්මවලට පටහැනි සදාචාර විරෝධී එකක්.පසුගිය කාලයේ දී ඔවුන් සංවිධායකරුන්ගේ රැස්වීමක් කැඳෙව්වා. නිල සංවිධායකවරු සහභාගි වූණේ 15 ක 20 ක විතර පිරිසක්. මොවුන් සියලු දෙනා එයට සහභාගි වූණේ අනවබෝධයෙක් කියලා කිව්වා. පක්ෂයේ තනතුරු සම්බන්ධයෙන් අධිකරණය ඉදිරියේ වාරණ නියෝගයක් තිබෙනවා. නීති කාරුණු සාකචඡා වෙමින් තිබෙනවා. ආණ්ඩුවේ කොන්ත්රාත් ඉටු කරන ශ්රී ලංකා නිදහස් පක්ෂයේ යැයි කියන පිරිස කැඳවා තිබෙන නීති විරෝධී විධායක සභාවට සහභාගි නොවන ලෙස ඊට සහභාගි විය හැකි සියලු දෙනාගෙන් මා ඉල්ලා සිටිනවා.”
“ස්වාධීනව ශ්රී ලංකා නිදහස් පක්ෂිකයින්ට ඉදිරි මැතිවරණ වල දී ඡන්දය ප්රකාශ කරන්න අවකාශ ලබාදිය යුතුයි. වත්මන් ආණ්ඩුවට සම්බන්ධ හත අටක් එකතු වෙලා ඔවුන්ට එකතු විය හැකි සුළු පිරිසක් අල්ලාගෙන කල්ලියක් ලෙස ක්රියාත්මකයි. මේ අය රැලි පවත්වන්න උත්සහ කරනවා. ඒවාහි කතා කරන සියලු දෙනා ආණ්ඩුවට සම්බන්ධ අයයි. පක්ෂයේ මතවාදය හෝ ඉදිරි වැඩසටහන සම්බන්ධව කිසි දෙයක් කියන්නේ නැහැ. සියලු වරප්රසාද බුක්ති විඳිමින් මොවුන් ගෙන යන නග්න වැඩපිළිවෙළ අපි පරාජය කළ යුුතුයි.”
