“ජනාධිපති ඊබ්රහීම් රයිසි සහ විදේශ අමාත්යව හොසේන් අමිරබ්දොල්ලාහියන් ඇතුළු හෙලිකොප්ටරයේ සිටි සියලුම මගීන් අනතුරින් මිය ගිය බව” ඉරාන රජයේ නිලධාරීන් නිල වශයෙන් තහවුරු කළේය.
අයිස් සහිත කටුක කාලගුණ තත්ත්වය තුළ මෙහෙයුම් දියත් කළ සෝදිසි කණ්ඩායම් නැගෙනහිර අසර්බයිජාන් පළාතේ හිම සහිත කඳුකර ප්රදේශයක් මත හෙළිකොප්ටරයේ සුන්බුන් සොයා ගන්නේ සැක සහිත අනතුර සිදුවී පැය 12කින් පසුවය.
ඉරාන මාධ්ය සහ ජාත්යන්තර මාධ්ය ආයතන කඩාවැටුණු ස්ථානයේ ඡායාරූප පලකර තිබිණි. එහි ජනාධිපති රයිසිගේ හෙලිකොප්ටරය කඳු මුදුනක කැබලිවලට බිඳී සුන් වී ඇති අයුරු පෙන්වයි. Al Jazeera වාර්තාකරු Ali Hashem විසින් සමාජ මාධ්ය වෙත පළ කරන ලද එක් ඡායාරූපයක හෙලිකොප්ටරයේ වලිගය තණකොළ සහිත ප්රදේශයක උඩු යටිකුරු වී ඇති අයුරු පෙනුණි.
“ජනාධිපති රයිසි, විදේශ අමාත්යවරයා සහ හෙලිකොප්ටරයේ සිටි සියලුම මගීන් අනතුරින් මිය ගියහ,” ජ්යෙෂ්ඨ ඉරාන නිලධාරියෙක් රොයිටර් පුවත් සේවයට පවසා තිබුණේ ස්වකීය අනන්යතාවය හෙළි නොකරන ලෙස ඉල්ලා සිටිමිනි.
ඉරානයේ Mehr ප්රවෘත්ති ඒජන්සිය මරණ තහවුරු කර තිබිණි. “ඉරාන ජනාධිපතිවරයා සහ විදේශ අමාත්යවරයා රැගත් හෙලිකොප්ටරයේ සිටි සියලුම මගීන් ප්රාණ පරිත්යාග කර ඇත..” පුවත් ඒජන්සිය කීවේය.
ඉරාන නිලධාරියෙකු මීට පෙර රොයිටර් පුවත් සේවයට පැවසුවේ රයිසි සහ විදේශ අමාත්ය හොසේන් අමිරබ්දොල්ලාහියන් රැගත් හෙලිකොප්ටරය ඉරිදා අනතුරෙන් සම්පූර්ණයෙන්ම දැවී ගිය බවය.
රාජ්ය රූපවාහිනිය වාර්තා කළේ ගුවන් යානය කඳු මුදුනක ගැටී ඇති බව ඡායාරූපවලින් පෙන්නුම් කළ නමුත් අනතුරට හේතුව පිළිබඳව නිල වශයෙන් දන්වා නොමැති බවය.
රයිසි එක්සත් ජනපදයේ නිෂ්පාදිත බෙල් 212 හෙලිකොප්ටරයකින් පියාසර කරමින් සිටිය දී මෙම අනතුර සිදුවී ඇතැයි රාජ්ය ප්රවෘත්ති ඒජන්සිය IRNA පැවසුවේය.
