සූරියවැව නුවන් ජයසේකර –
සූරියවැව මන්දපෝෂණය සම්බන්ධව විශේෂ සාකච්ඡාවක් සඳහා රජයේ ප්රධාන දේශපාලන බලධාරියා ලෙස පැමිණීමට නියමිතව සිටි පාර්ලිමේන්තු මන්ත්රී නාමල් රාජපක්ෂගේ පැමිණීමට සූරිය වැව ජනතාවගෙන් එල්ල වූ බලවත් විරෝධතාවයක් නිසා ඔහුගේ පැමිණීම වැළකී ගියේය.
සූරියවැව දරුවන්ගේ මන්දපෝෂණය පිළිබඳ පලවූ කතාව අමූලික බොරුවක් බව සෞඛ්ය අමාත්යවරයා ඊයේ පාර්ලිමේන්තුවේ ප්රකාශයක් කළ අතර මේ පරීක්ෂණය සිදුකළ වෛද්යවරයා දේශපාලන වෛරයකින් පෙළෙන පුද්ගලයෙක් බව ද සඳහන් කළේය. මේ සම්බන්ධව පලවූ මාධ්ය වාර්තා කිසිම පදනමකින් තොර වගකීම් රහිත ඒවා බවත් කීවේය.
මේ ළමා මන්දාපෝෂණ තත්ත්ය සම්බන්ධයෙන් පලවූ වාර්තා සොයා බලා ගතයුතු ඉදිරි පියවර පිළිබඳ සාකච්ජාවක් අද (23) පෙරවරුවේ පාර්ලිමේන්තු මන්ත්රී නාමල් රාජපක්ෂගේ ප්රධානත්වයෙන් සූරියවැව ප්රාදේශීය ලේකම් කාර්යාලයේ සංවිධානය කර තිබිණි.
සූරියවැව ප්රාදේශීය ලේකම් කාර්යලය තුළ අදාල රැස්වීම පැවැත්වෙමින් තිබු අවස්ථාවේදීම එම අවස්ථාවට පාර්ලිමේන්තු මන්ත්රී නාමල් රාජපක්ෂගේ සහභාගීත්වයට විරෝධය පළ කළ ගැමියෙන් පිරිසක් ප්රාදේශීය ලේකම් කාර්යාලය ඉදිරිපිට විරෝධතාවයක් දියත් කළහ.
විරෝධතාවයට එක්ව සිටි ජනතාව පැවසුවේ වසර ගනනාවක් තිස්සේ තමන් මෙම පිරිසට සිය ඡන්දය දුන් නමුත් මේ දක්වා නැතිබැරි අහිංසකයින් වෙනුවෙන් කිසිම දෙයක් නොකළ බවත් තමන් මේ තරම් අසරණ තත්ත්වයකට පත්වීමට මේ දේශපාලකයින් වගකිව යුතු බවත්ය.
“දේශපාලකයින් වගේම නිලධාරීගේ අදූරදර්ශී ක්රියා කලාපයන් නිසා අද සූරියවැව ජනතාව මන්දපෝෂණයට ගොදුරු වෙමින් යනවා. ඒ නිසා මේ සම්බන්ධයෙන් හෙළිදරව් කළ පිරිස් මර්ධනය කිරීම හා තවදුරටත් සීතල කාමරවල සිට සාකච්ජා නොපවත්වා ගමට ගොස් හැබෑවටම මේ පිළිබඳව සොයා බලන්න…“ විරෝධතා කරුවෝ පැවසූහ. 
මෙහිදී විරෝධතාවයට එක්ව සිටි පිරිස “ අපේ දරුවන්ට එක වේලයි-රජ දරුවන්ට තුන් වෙලයි“ , “ සූරියවැව ළමා මන්දපෝෂණය ඉහළට“ , කන්න නැතුව පාසැල්වල උදෑසන රැස්වීම් නවතී – ඇමති මණ්ඩලය දිනෙන් දින ඉහළට“ ආදී පුවරු රැගෙන පිරිස විරෝධතාවයේ නිරත වූහ.
ජනතා විරෝධය නිසා නාමල් රාජපක්ෂට එක්වීමට බැරි වූ රැස්වීම හම්බන්තොට දිස්ත්රික් ලේකම් සුමනසේකරගේ ප්රධානත්වයෙන්, සූරියවැව ප්රාදේශීය ලේකම් අංජලා අමාලි හා සූරියවැව සෞඛ්ය වෛද්ය නිළධාරී රහල් රාජපක්ෂ ඇතුළු රාජ්ය නිළධාරීන් පිරිසකගේ සහභාගීත්වයෙන් පැවැත්විනි.
