මාස 06කට ඉහත දිනයක දී පිරිතකට වැඩම කිරීමෙන් අනතුරුව උඩුදුම්බර උයන්වල ප්රදේශයේ දායක නිවසක නවත්වා ගිය හොර වාහනය හිමි භික්ෂුව පොලීසිය විසින් ඊයේ (10) පස්වරුවේ අත්අඩංගුවට ගෙන තිබේ.
ටෲපර් වර්ගයට අයත් මෙම ජීප් රථය පෙරේදා (09) පස්වරුවේ පොලීසිය විසින් සොයාගනු ලැබූ අතර නිවසේ හිමිකරු පවසා තිබුණේ මහියංගනය ප්රදේශයේ සිට පිරිතකට වැඩම කළ එක්තරා හිමිනමක් විසින් මෙයට මාස 06 කට පමණ ඉහත දී එය නිවසේ නතරකර ගිය බවයි. හිමිනම විසින් වාහනය රැගෙන යන තුරු තමන්ද බලා සිටි බව නිවෙස් හිමියා පොලීසියට පවසා තිබිණි.
ඔහුගෙන් ලද තොරතුරු මත ප්රකාශයක් ලබා ගැනීම සඳහා අදාළ හිමිනම පොලීසියට කැඳවා තිබූ අතර ජීප් රථය සම්බන්ධයෙන් නීත්යානුකූල ලියකියවිලි ඉදිරිපත් කිරීමට හිමි නම අපොහොසත් වීම හේතුවෙන් පොලීසිය ඊයේ (10) පස්වරුවේ එම හිමිනම සැකපිට අත්අඩංගුවට ගෙන තිබේ. සැකපිට අත්අඩංගුවට ගත් හිමිනම තෙල්දෙණිය කොට්ඨාසයේ පාසලක ගුරුවරයෙකු ලෙස සේවය කරන බව ද දැන ගන්නට ඇත.
මෙම වාහනයේ ලියාපදිංචි අංකය මෝටර් රථ වාහන දෙපාර්තමේන්තුව මගින් විමසූ විට එම අංකයම ඇති තවත් වාහනයක් කුරණෑගල ආඳාගල ප්රදේශයේ පුද්ගලයෙකුගේ නමට ලියාපදිංචි වී තිබෙන බව අනාවරණය වී තිබේ. උඩුදුම්බර පොලිසිය වැඩිදුර පරීක්ෂණ පවත්වයි
