ශ්රියානි විජේසිංහ –
පසුගිය වසරේ (2023) පෙබරවාරි මාසයේ සිට කළුතර මහ රෝහලේ CT ස්කෑන් යන්ත්රයේ ක්රියාකාරිත්වය බිඳවැටී ඇති බැවින් රෝහලේ CT scan පරීක්ෂණ සිදු කළ යුතු රෝගීන් මුල් කාලයේදී පෞද්ගලික අංශය වෙත යොමුකිරිම හේතුවෙන් රුපියල් කෝටි 5කට අධික මුදලක් වැය කිරීමට සෞඛ්ය අමාත්යංශයට සිදුව ඇති බව රජයේ විකිරණ විද්යා තාක්ෂණ වේදීන්ගේ සංගමය පෙන්වාදේ.
මේ වන තෙක් එම යන්ත්රය අලුත්වැඩියා කිරීමක් හෝ නව යන්ත්රයක් මිලදී නොගැනීම හේතුවෙන් නාගොඩ රෝහලේ රෝගීන් සී. ටී. පරික්ෂණ සඳහා කොළඹ ජාතික රෝහල, කළුබෝවිල ශික්ෂණ රෝහල, හොරණ මූලික රෝහල වැනි රෝහල් වෙත ගිලන් රථ මගින් ප්රවාහනය කරන අතර මේ සඳහා ද විශාල මුදලක් වැය වන බව එම සංගමයේ සභාපති චානක ධර්මවික්රම පැවසුවේය.
වසර 2021 වර්ෂයේදී කළුතර මහ රෝහලට CT යන්ත්රයක් මිලදී ගැනීම සඳහා ටෙන්ඩර් කැඳවීම සිදුකරන ලද අතර අදාළ සපයුම්කරුවකු තෝරා ගැනීම ආසන්න කාලයේ සිදුකළද යන්ත්රය මිලදී ගැනීම සඳහා තෝරාගත් සැපයුම්කරුට යන්ත්රය සැපයීමට අදාළ ලිපි නිකුත් කිරීම සිදුකර ඇත්තේ වසර 2024 වර්ෂයේ මුල් අවදියේ යැයි හෙතෙම කිය. ආරම්භයේ සිටම දැඩි මන්දගාමී ස්වරූපයකින් කටයුතු සිදුවූ මෙම ක්රියාවලියේ ණයවර ලිපි නිකුත් කිරීම ජූලි මාසයේ සිදු කිරීමට නියමිතව තිබුණත් මේ වනතුරුත් සෞඛ්ය අමාත්යාංශය එම ණයවර ලිපි නිකුත් කිරීම සිදුකර නොමැත.
මෙම යන්ත්රය 2021 වර්ෂයේදී කැඳවූ මිල ගණන් අනුව සෞඛ්ය අමාත්යාංශයට සැපයිය යුතු අතර තවදුරටත් ප්රමාද වීමේදී පැරණි මිල ගණන්වලට යන්ත්රය සැපයීම කළ හැකිදැයි ප්රශ්න සහගත වී ඇත.එසේම යම් හෙයකින් මෙම ටෙන්ඩර් ගනුදෙනුව අහෝසි කොට නැවත ටෙන්ඩර් කැඳවීමක් සිදුකළ හොත් යන්ත්රයක් මිලදී ගැනීමට සිදුවන්නේ වර්තමාන මිල ගණන් යටතේය. මේ වන විට නව යන්ත්ර වල මිල දෙතුන් ගුණයකින් ඉහළ ගොස් ඇත. නව කැඳවීමක් හමුවේ ඉහළ මිල ගණන් යටතේ යන්ත්රය මිලදී ගැනීමට සිදුවුවහොත් එය සෞඛ්ය අමාත්යංශයට බරපතළ පාඩුවක් වනු ඇත.
එවකට යන්ත්රය සැපයීමට නියමිතව තිබූනේ රුපියල් මිලියන 150 මුදලකට නමුත් නව මිල ගණන් යටතේ යන්ත්රය මිලදී ගැනීමට සිදුවන්නේ නම් එය එම මිලට වඩා විශාල මුදලක් වනු ඇති බවද චානක ධර්මවර්ධන පෙන්වාදේ.
