හැට විය ඉක්මවූ ගොවීන් දෙලක්ෂ හැට හතර දහසකට ගොවි විශ්‍රාම වැටුප් ගෙවා නෑ… විගණනය කියයි!

ලලිත් චාමින්ද –

ගොවි විශ්‍රාම වැටුප් හිමිවිය යුතු  වයස අවුරුදු 60 සම්පුර්ණ වු ගොවින්  දෙලක්ෂ, හැට හතර දහස්,දෙසිය විසි හත්  (264,227) දෙනෙකුට  ගොවි විශ්‍රාම වැටුප් ගෙවා නොතිබු බව ජාතික විගණන කාර්යාලය මගින් නිකුත්කොට ඇති  විගණන වාර්තාවක සඳහන් වේ.

මෙම  විගණන වාර්තාවට අනුව ගොවි විශ්‍රාම වැටුප් යෝජනා  ක්‍රමය තුළ  ලියාපදිංචි වි ඇති ගොවින්  සංඛ්‍යාව අට ලක්ෂ හැත්තැ එක් දහස්, හාරසිය විසි පහකි ( 871,425.) 2023 වර්ෂයේ දෙසැම්බර් මස 31 දිනට  වයස අවුරුදු 61 සිට  අවුරුදු 93 දක්වා   වයස්ගත වු ගොවින් සංඛ්‍යාව හාරලක්ෂ හැත්තැ හතර දහස් අටසිය තුනකි ( 474,803). මින් ගොවින් 264,227 දෙනෙකුට   ගොවි විශ්‍රාම වැටුප ගෙවා නොතිබු බවද  විගණනය මගින් අනාවරණය කොට ඇත. 

2022 වර්ෂයේ දි අවුරු දු 60 සම්පුර්ණ කළ විශ්‍රාම වැටුප හිමිවිය යුතු  ඉල්ලුම්පත් එවා නොමැති දායකයින් සොයා විශ්‍රාම වැටුප් ලබාදිමට අවශ්‍ය  කටයුතු කරණ ලෙස  කෘෂිරක්ෂණ මණ්ඩලයේ  සියලුම දිස්ත්‍රික් හා සහකාර  අධ්‍යක්ෂකවරුන් වෙත  ලිඛිතව දන්වා තිබුණි. එහෙත් දිස්ත්‍රික් කාර්යාල  12ක  නියැදියක් පරික්ෂා කිරීමේදී     ඉන් දිස්ත්‍රික් කාර්යාල 06ක්  එම ලිඛිත දැනුම්දීම අනුව කටයුතු කර නොතිබුණි. වයස අවුරුදු 60 සම්පුර්ණ කළ  විශ්‍රාම වැටුප ඉල්ලුම් නොකළ  දායකයින් හඳුනා ගැනීමට අවශ්‍ය කටයුතු කරණ ලෙස  විගණනය මගින් නිර් දේශ කොට ඇත.

මේ පිළිබද  වයස අවුරුදු 60  සම්පුර්ණ  වී මෙතෙක්  ගොවි විශ්‍රාම වැටුප  ලබා නොගත්  ගොවින් මේ වනවිට දැනුවත් කර ඇති අතර  සියළුම දිස්ත්‍රික් කාර්යාලවල  සහකාර අධ්‍යක්ෂකවරුන්  මෙම කටයුත්ත ප්‍රමුක කාර්යයක් ලෙස  සලකා කටයුතු කර ඇති බැව්  ගොවි විශ්‍රාම වැටුප් හා  සමාජ ආරක්ෂණ ප්‍රතිලාභ යෝජනා ක්‍රමයේ  කළමණාකාරිත්වය විසින් විගණනයට සදහන් කොට ඇත. ගොවි විශ්‍රාම වැටුප් හා  සමාජ ආරක්ෂණ ප්‍රතිලාභ යෝජනා ක්‍රමය පිළිබඳ 2023 වර්ෂයට අදාළව  නිකුත්කොට ඇති විගණන වාර්තාවේ මෙම තොරතුරු ඇතුළත්ව  ඇත.