හිටපු රාජ්ය අමාත්ය සුජීව සේනසිංහ තම Toyota Land Cruiser V8 රථය නීතිවිරෝධී ලෙස එකලස් කළාද යන්න සෙවීම සඳහා අපරාධ පරීක්ෂණ දෙපාර්තමේන්තුවේ (CID) විමර්ශනයක කොටසක් ලෙස රජයේ රස පරීක්ෂකවරයාගේ මූලික පරීක්ෂාවකට යොමු කර ඇත. එම මූලික විමර්ශනයෙන් අනතුරුව රථය යළි හිටපු අමාත්යවරයාගේ සන්තකයට පත් කර තිබේ.
වලාන දූෂණ මර්දන කාර්ය සාධක බළකායට ලැබුණු තොරතුරක් මත වාහනය එකලස් කර ඇතිදැයි යන්න පිළිබඳව සැක මතුවී තිබිණි. අද පෙරවරුවේ කොටුව මහෙස්ත්රාත් අධිකරණය හමුවේ මෝසමක් ගොනුකරමින් විමර්ශන නිලධාරීන් සඳහන් කළේ, සේනසිංහ මහතාගේ නිවසේ එකලස් කරන ලද බවට පැවසෙන මෝටර් රථයක් ඇති බවට තොරතුරක් ලැබුණු බවය.
සුජීව සේනසිංහගේ නිවසට ගොස් විමර්ශන නිලධාරීන් විසින් මෝටර් රථ වාහන ලියාපදිංචි කිරීමේ දෙපාර්තමේන්තුවට ගොස් රථයේ චැසි අංකය පමණක් පරීක්ෂා කළ බවත්, එකලස් කළ වාහනයක් ද නැද්ද යන්න සෙවීම සඳහා රථය රස පරීක්ෂක දෙපාර්තමේන්තුවට ඉදිරිපත් කළ යුතු බවත් විමර්ශන නිලධාරීහු අධිකරණයට දැන්වූහ. සුජීව සේනසිංහ වෙනුවෙන් පෙනී සිටි ජනාධිපති නීතීඥ මෛත්රී ගුණරත්න අධිකරණයට දන්වා සිටියේ මෙම වාහනය නීත්යානුකූලව ආනයනය කර ලියාපදිංචි කර ඇති බවය. ඔහු කිසිදු නීතිවිරෝධී එකලස් කිරීමක් කර නැති බව කියමින් එම චෝදනාව ප්රතික්ෂේප කර තිබිණි. මෙම විමර්ශනයට බලපෑම් එල්ල වී ඇතැයි වාර්තාවන බව ද මෛත්රී ගුණරත්න අධිකරණයේ දී කීවේය. නමුත් සහකාර පොලිස් අධිකාරී මිහිඳු අබේසිංහ ප්රකාශ කළේ කිසිදු බාහිර මැදිහත්වීමක් මේ සම්බන්ධව සිදුවී නැති බවය.
කරුණු සලකා බැලූ කොටුව මහෙස්ත්රාත් තනූජා ලක්මාලි මෙම රථය රජයේ රස පරීක්ෂක වෙත ඉදිරිපත් කර විමර්ශනයේ ප්රගතිය කඩිනමින් දැනුම්දෙන ලෙස අපරාධ පරීක්ෂණ දෙපාර්තමේන්තුවට නියෝග කළාය. ඒ අනුව අද එම වාහනය රජයේ රස පරීක්ෂ වෙත යොමු කර තිබිණි. එම වාර්තාව සහ රේගුවේත් මෝටර් රථ ලියාපදිංචි කිරීමේ දෙපාර්තමේන්තුවේත් වාර්තා ගෙන්වා ගැනීමෙන් අනතුරුව අවසන් නිගමනයට පැමිණෙන බව පොලිස් මාධ්ය ප්රකාශකරවරයා ප්රකාශ කළේය.
