දිනසේන රතුගමගේ-
යාපනයේ කෝවිල් උත්සව හා වෙනත් පෙරහැර සඳහා හීලෑ අලි ඇතුන් රැගෙන ඒම සීමා කරන ලෙස දැනුම් දෙමින් යාපනය දිසාපති අම්බලවානර් සිවපාලසුන්දරන් ඊයේ (23) නිවේදනයක් නිකුත් කොට තිබේ.
කිසිම නිලධාරියෙකුගේ අධීක්ෂණයකින් හෝ අනු දැනුමකින් තොරව මහජනතාව බහුලව ගැවසෙන ස්ථානවලට අලි ඇතුන් රැගෙන ඒමෙන් සතුන්ට විශාල හානියක් සිදු වන බවත් මහජනතාවට අනතුරු සිදු විය හැකි බවත් දිසාපතිවරයා පෙන්වා දෙයි.
මේ නිසා යාපනයේ කවර හෝ අවශ්යතාවයකට හීලෑ අලි ඇතුන් රැගෙන ඒමට අවශ්යවේනම් මුලින්ම ඒ ගැන උතුරු පළාත් පශු සම්පත් නිෂ්පාදන සෞඛ්ය දෙපාර්තමේන්තු අධ්යක්ෂවරයා වෙත දන්වා ඔහුගෙන් මූලික අවසරය ලබා ගත යුතු බවට දිසාපති වරයා නියෝගයක් නිකුත් කොට තිබේ.
ඔහුගෙන් මූලික අවසරය ලබාගත් පසුව යාපනය දිස්ත්රික් ලේකම් කාර්යාලයේ විශේෂ කමිටුවකට ඒ බව දැණුම් දී ඔවුන්ගේ නිර්දේශ ලබාගත් පසුව පමණක් යාපනයට හීලෑ අලි ඇතුන් රැගෙන ඒමට අවසරයක් ලබා දීමට දිසාපතිවරයා තීරණය කොට තිබේ.
කෝවිල් උත්සවවලට අලි ඇතුන් රැගෙන ඒම සාමාන්ය සිරිතක් නොවූවත් මෑතක සිට කෝවිල් උත්සව සඳහාත් පෙරහැර සඳහාත් අලි ඇතුන් දිවයිනේ දකුණු ප්රදේශයෙන් රැගෙන ඒමට උත්සව සංවිධායකයින් පියවර තිබේ. නමුත් ඔවුන් කිසි විටකත් එම සතුන් ගැන හෝ මහජනතාව ගැන කිසිදු සැලකිල්ලක් දක්වා නොමැති බව යාපනය දිසපතිවරයා පෙන්වා දෙයි.
මේ නිසා යාපනයට දකුණේ සිට හීලෑ අලි ඇතුන් රැගෙන ඒමේදී දැඩි ප්රතිපත්තිමය තීරණයක් අනුගමනය කිරීමට සිදු වන බව යාපනය දිසාපතිවරයා කියා සිටියි.
